ရန်ကုန်၊ ဒဂုံမြို့သစ် (တောင်ပိုင်း)မြို့နယ်၊ ၁၈ ရပ်ကွက်၊ ကော့သောင်းလမ်းမှာ ဇန်နဝါရီ ၇ ရက် ညက သားအမိနှစ်ယောက် ကိုယ့်ကိုယ်ကိုယ် ဆွဲကြိုးချသတ်သေသွားတယ်လို့ ရပ်ကွက်နေသူတွေဆီက သိရပါတယ်။

မနေ့ည ၆ နာရီကျော်က ကော့သောင်းလမ်းမှာ အသက် ၆ နှစ်အရွယ်သမီးနဲ့အတူ အသက် ၄၀ အရွယ်အမျိုးသမီးတဦး  ဆွဲကြိုးချသတ်သေသွားတယ်လို့ ရပ်ကွက်နေသူတစ်ဦးက ပြောပါတယ်။

"သူ့ယောကျ်ားက နောက်မယားငယ်ထားတာကို မိန်းမကသိသွားပြီး အခုလိုလုပ်သွားတာ။ စိတ်ထဲမကောင်းဘူး။ လူနာတင်ယာဥ်နဲ့ လာသယ်သွားတယ်"လို့ပြောပါတယ်။

သားအမိနှစ်ယောက် သတ်သေပြီးနောက် ရပ်ကွက်အုပ်ချုပ်ရေးက ပရဟိတအဖွဲ့ကို ဖုန်ဆက် အကြောင်းကြားရာမှာ ရှင်သန်ခွင့်လူမှုကူညီရေးအသင်းက အလောင်းကိုလာရောက်သယ်သွားပြီး စံပြဆေးရုံကြီးကို ပို့ဆောင်ခဲ့တယ်လို့ အုပ်ချုပ်ရေးနဲ့နီးစပ်သူတစ်ဦးက ပြောပါတယ်။

"သူများအိမ်တွင်းရေးဆိုတော့ သေချာတော့ မသိဘူး။ ပြောနေကြတာတော့ အိမ်ထောင်ရေးပြဿနာကြောင့် အခုလိုလုပ်သွားတယ်လို့ ကြားတယ်"လို့ ပြောပါတယ်။

လတ်တလော အဆိုပါသေဆုံးမှုဖြစ်စဥ်နဲ့ပတ်သက်ပြီး တောင်ဒဂုံမြို့မရဲစခန်းက သေမှုသေခင်းဖွင့်ကာ ဆက်လက်စစ်ဆေးနေပါတယ်။ 

စစ်တပ်က အာဏာသိမ်းပြီးတဲ့နောက်ပိုင်း  မြန်မာပြည်တွင်းမှာ အလုပ်အကိုင်ရှားပါးမှု၊ ကုန်စျေးနှုန်းကြီးမြင့်မှုနဲ့ တခြားအထွေထွေပြဿနာတွေကြောင့် မိမိကိုယ်ကိုယ် အဆုံးစီရင်ခဲ့သူ အယောက်  ၇၀ လောက်ရှိသွားပြီ ဖြစ်ပါတယ်။

တောင်ဒဂုံကမ္ဘာ့ရတနာဘဏ် မန်နေဂျာသေဆုံးမှုနဲ့ ပတ်သက်ပြီး  ကျောင်းသား ၇ ယောက် နိုဝင်ဘာ ၃၀ ရက်မှာ အင်းစိန်ထောင်အတွင်း စစ်ခုံရုံးကနေ သေဒဏ်ချမှတ်ခဲ့သလို တခြားသူ ၅ ယောက်ကိုလည်း သေဒဏ်ခဲ့မှတ်ခဲ့တယ်လို့  ထောင်နဲ့နီးစပ်တဲ့ ရှေ့နေထံက သိရပါတယ်။

ပြီးခဲ့တဲ့ ဧပြီလမှာ ဖြစ်ပွားခဲ့တဲ့ တောင်ဒဂုံမြို့နယ်ရှိ ကမ္ဘာ့ရတနာဘဏ်ခွဲကို ဓားပြတိုက်ပြီး ဘဏ်တာဝန်ခံမန်နေဂျာ ဒုဗိုလ်မှူးဟောင်း စောမိုးဝင်းကို သေနတ်နဲ့  ပစ်ခတ်ခဲ့မှုကြောင့် သေဆုံးခဲ့တဲ့ ဖြစ်စဉ်နဲ့ပတ်သက်လို့ စစ်ကောင်စီတရားရုံးက ပြစ်ဒဏ်ချမှာလိုက်တာဖြစ်ပါတယ်။

ရှေ့နေက “မနေ့က စုစုပေါင်း ၁၂ ယောက်ကို သေဒဏ်ချတာ၊ ဘဏ်မန်နေဂျာသေဆုံးမှုနဲ့ အစွဲခံထားရတဲ့ ကျောင်းသား ၇‌ ယောက်လည်း ပါပါတယ်။ ပုဒ်မ ၃၀၂ က/၃၄ နဲ့ပါ၊ တခြား၅ ဦးကိုတော့ ဘယ်သူတွေပါလဲဆိုတာ အတည်မပြုနိုင်ပါဘူး” လို့ပြောတယ်။

သေဒဏ်ချမှတ်ခံရတဲ့ ကျောင်းသား ၇ ယောက်ကတော့ ဒဂုံတက္ကသိုလ် ကျောင်းသားဟောင်းနဲ့ ကျောင်းတက်ရောက်ဆဲကျောင်းသားတွေဖြစ်ပြီး လူသတ်မှု အပြစ်ဒဏ် ပုဒ်မ ၃၀၂ အပါအဝင် ပုဒ်မ ၃ ခုနဲ့ တရားရင်ဆိုင်နေရတာ ဖြစ်ပါတယ်။ 

ကျန်ရှိနေတဲ့ ပြစ်မှုတွေအတွက် သေဒဏ်ချမှတ်ခံထားရတဲ့  ကျောင်းသား ၇ ဦးထဲက ၃ ‌ဦးကို အကြမ်းဖက်မှုနဲ့ အလုံမြို့နယ်တရားရုံးမှာ ဆက်လက်စစ်ဆေးသွားဖို့ရှိနေပါတယ်။ 

ဖက်ဆစ်ဆန့်ကျင်ရေးလက်ရုံးတပ်ဖွဲ့ တာဝန်ခံ ကော်ပီက “ကျနော်တို့ကတော့ ဒီကိစ္စကလုံးဝ မဖြစ်သင့်တဲ့ကိစ္စ၊ လုံးဝမတရားတဲ့ကိစ္စလို့ မြင်တယ်။ ရန်သူက ရန်သူလို ကျင့်နေတယ်။ မိဘပြည်သူတွေအနေနဲ့လည်း တော်လှန်ရေး ရဲဘော်တွေ၊ UG တွေ၊ မြို့ပြသပိတ်တွေကို အတတ်နိုင်ဆုံးဖေးမ၊ ကူညီပေးကြပါလို့ပဲ ကျနော်ပြောချင်ပါတယ်။ ဘာဖြစ်ဖြစ် ကျနော်တို့ကတော့ အသက်နဲ့ခန္ဓာတည်မြဲနေသရွေ့ ဒီကောင်ကို အတတ်နိုင်ဆုံး တော်လှန်နေဦးမှာပဲ တိုက်ခိုက်နေဦးမှာပဲ” လို့ ပြောပါတယ်။

အဆိုပါ ဖြစ်စဉ်က ၂၀၂၂ ဧပြီ ၁၈ ရက်မှာ ဖြစ်ပွားခဲ့တာဖြစ်ပြီး ဘဏ်ကို ဓားပြဝင်တိုက်စဉ် ဘဏ်မန်နေဂျာ စောမိုးဝင်းက ဘဏ်အဝင်မှာ သေနတ်ကိုင်ထားတဲ့လူကို ဝင်လုံးပြီး ပြန်လည်တိုက်ခိုက်ခဲ့တဲ့အတွက် သေနတ်သမားက သေနတ်နဲ့ ပစ်ခတ်ခဲ့တာ ဖြစ်ပါတယ်။