ကနေဒါနိုင်ငံအနောက်ပိုင်း၊ အယ်လ်ဘာတာပြည်နယ်မှာ မေ ၈ ရက်က နေရာ ၁၀၀  ကျော်လောက်မှာ တောမီးတွေဆက်လက်လောင်ကျွမ်းနေပြီး အဲဒီထဲက ၂၇ ခုဟာ ထိန်းမနိုင်သိမ်းမရဖြစ်နေတယ်လို့ ယူဆရကြောင်း အာဏာပိုင်တွေက ပြောပါတယ်။ 

အခုနှစ်မှာ ပြည်နယ်အတွင်း ဧရိယာ ၃၉၀၀၀၀ ဟက်တာလောက် မီးလောင်ကျွမ်းခဲ့ကြောင်း အယ်လ်ဘာတာ တောမီးသတင်းအချက်အလက်မန်နေဂျာ ခရစ္စတီတပ်ခ်ကာက ကြေညာခဲ့ပါတယ်။ 

ပြည်နယ်အနှံ့ တောမီးအန္တရာယ် တိုးလာနိုင်ပြီး သီတင်းပတ်ကုန်ပိုင်းမှာ ပြင်ဆင်မှုတွေ လုပ်ထားဖို့ မျှော်လင့်ကြောင်းလည်း အာဏာပိုင်တွေကို သတိပေးထားပါတယ်။ 

အယ်လ်ဘာတာပြည်နယ်မှာ အရေးပေါ်အခြေအနေကြေညာထားပြီး အမြင့်ဆုံး သတိပေးချက်အဆင့် ရှိပါတယ်။ 

နေအိမ်ပြောင်းရွှေ့ရသူတွေကို အစိုးရက ငွေကြေးအကူအညီ ပေးမယ်လို့ အယ်လ်ဘာတာပြည်နယ် ဝန်ကြီးချုပ် ဒယ်နီယဲလ် စမစ်သ်က ကြေညာခဲ့ပါတယ်။ 

လူ ၃၀၀၀၀ လောက် ဘေးလွတ်ရာ ရွှေ့ပြောင်းခဲ့ကြပါတယ်။ မီးသတ်သမား ၇၀၀ ကျော်ကို ဖြန့်ချထားပြီး အယ်လ်ဘာတာပြည်နယ်ဟာ တခြားပြည်နယ်တွေကနေ နောက်ထပ် အင်အား ၁၀၀၀ ကို တောင်းဆိုထားကာ လာမယ့်သီတင်းပတ်မှာ ရောက်လာဖွယ် ရှိကြောင်း တာဝန်ရှိသူတွေက ပြောပါတယ်။ 

ပြည်နယ်အစိုးရဟာ မီးလောင်မှုကို ကူညီဖြေရှင်းပေးဖို့အတွက် မီးသတ်စွမ်းရည်ရှိတဲ့ စေတနာ့ ဝန်ထမ်းတွေကို ပြည်နယ်မှာ စာရင်းပေးသွင်းကြဖို့လည်း ဖိတ်ခေါ်ထားပါတယ်။ 

ထိုင်းမြောက်ပိုင်း၊ ချင်းရိုင်းခရိုင်၊ မယ်ဆိုင်မြို့နယ်နဲ့ ကပ်လျက် ဒွိုင်တုန်းတောင်ပေါ်မှာ ဧပြီ ၅ ရက် မနေ့ညကစ တောမီးလောင်ကျွမ်းနေပြီး  ဧကပေါင်း ၂၀၀ ကျော်လောက်အထိ တောမီး ကူးစက်ပျံ့နှံ့နေတယ်လို့  PBS ထိုင်းသတင်းမှာ ဖော်ပြပါတယ်။ 

အဆိုပါဒွိုင်တုန်းတောင်တန်းဟာ မယ်ဖာ့လုန်မြို့နယ်၊ မယ်ဖာ့လုန်အုပ်စုထဲမှာတည်ရှိပြီး မနေ့ ညနေ ၃ နာရီကစ တောမီးလောင်ကျွမ်းမှုဖြစ်ခဲ့တယ်လို့ ဆိုပါတယ်။ 

အဆိုပါတောမီးကို မယ်ဖာ့လုန်မြို့နယ်နဲ့ မြို့နယ်နီးစပ်က  မီးသတ်၊ ရဲ၊  စစ်တပ်၊ အုပ်ချုပ်ရေး၊ နယ်မြေလုံခြုံရေး၊ လူမှုကူညီရေးစတဲ့ အဖွဲ့ပေါင်းစုံက သွားရောက်ငြှိမ်းသတ်ခဲ့ကြရာမှာ ည ၁၁ နာရီ ၄၀ မိနစ်လောက်မှာ ၇၀ ရာခိုင်နှုန်းကို ငြှိမ်းသတ်နိုင်ခဲ့ကြောင်း၊ လေအရမ်းတိုက်တာကြောင့် တောမီးဟာ အကျယ်အဝန်း ရိုင် ၅၅၀ (ဧက ၂၀၀ ကျော်ခန့်) ပျံ့နှံ့လောင်ကျွမ်းခဲ့တယ်လို့ ဆိုပါတယ်။ 

တောမီးလောင်ရတဲ့ အကြောင်းရင်းကိုတော့ စုံစမ်းစစ်ဆေးဆဲဖြစ်ကြောင်း၊ မီးအားလုံး ငြှိမ်းသတ်နိုင်အောင်နဲ့ နောက်ထပ် ကူးစက်လောင်ကျွမ်းမှုမရှိအောင်လို့ သက်ဆိုင်ရာက ဝိုင်းဝန်းဆောင်ရွက်နေပါတယ်။ 

အဆိုပါတောမီးလောင်ကျွမ်းမှုကြောင့် မီးခိုးမြူမှုန်တွေ မယ်ဆိုင်မြို့ထဲ ပြန့်လွင့်လာပြီး ဒီကနေ့မနက် ၆ နာရီ တိုင်းထွာချက်အရ  မီးခိုးမြူသိပ်သည်းဆမှာ ၁ ကုဗမီတာလျှင် ၄၄၃ မိုခရိုဂရမ်ရှိနေကာ  ၂၄ နာရီ ပျှမ်းမျှသိပ်သည်းဆမှာ ၁ ကုဗမီတာလျှင် ၂၀၀ မိုက်ခရို ဂရမ်ကျော်ရှိတယ်လို့  Thai PBS သတင်းမှာ ဖော်ပြပါတယ်။ 

Ref:-ThaiPBS