ဂျာမန်အနောက်ပိုင်း လူဒန်ရှိုက်မြို့နားက A 45 အော်တိုဘာဟန်မှာရှိတဲ့ ပျက်စီးနေတဲ့ ရာမန်ဒက်တယ်လ်တံတားကို မေ ၇ ရက်မှာ ထိန်းချုပ်ဖောက်ခွဲခဲ့လို့ ပြိုကျသွားခဲ့ပါတယ်။
ပရိသတ် အများအပြားက ဒီမြင်ကွင်းကို ကြည့်ဖို့ အဝေးကနေ စုဝေးခဲ့ကြပြီး သူတို့ရဲ့ စမတ်ဖုန်း တွေနဲ့ ဓာတ်ပုံတွေ ရုပ်သံတွေ ရိုက်ကူးခဲ့ကြပါတယ်။
လာကြည့်သူ တဦးက"ဖောက်ခွဲမှုက အရမ်းကောင်းတယ်။ ငယ်ငယ်က ဆောက်ထားတဲ့ တံတားကို မြင်ခဲ့ရပြီး အခုလည်း ဖြိုချခံရတာကို မြင်ချင်ခဲ့တယ်" လို့ ပြောပါတယ်။
ဂျာမန်သယ်ယူပို့ဆောင်ရေးဝန်ကြီး ဗော့ခ်ခါ ဝစ်ဆင်းက "အစားထိုးအဆောက်အအုံသစ်ကို အမြင့်ဆုံးအမြန်နှုန်းနဲ့ ဆောက်နိုင်စေဖို့ ကျနော်တို့ တတ်နိုင်သမျှ လုပ်ဆောင်မယ်”လို့ ပြောရင်း ကတိပြုခဲ့ပါတယ်။
၁၉၆၅ ခုနှစ်ကနေ ၁၉၆၈ ခုနှစ်အတွင်း တည်ဆောက် ခဲ့တဲ့ ၄၅၃ မီတာရှည်တဲ့ တံတားကို ဖြိုချဖို့ ဖောက်ခွဲရေးပစ္စည်း ၁၅၀ ကီလိုဂရမ် လိုအပ်ခဲ့ပါတယ်။
မွန်ပြည်နယ် ရေးမြို့နယ်၊ လမိုင်းနဲ့ သောင်ပြင်ကြား ကျေးရွာချင်းဆက်တံတား တစင်း ဇန်နဝါရီ ၂၇ ရက် မွန်းလွဲ ၂ နာရီ ၄၀ မိနစ်လောက် မိုင်းဆွဲဖျက်ဆီးခံခဲ့ရတယ်လို့ ဒေသခံတွေက ပြောပါတယ်။
တံတားအစိတ်အပိုင်းတချို့ ပျက်စီးသွားခဲ့ပေမဲ့ ဆိုင်ကယ်လောက်တော့ သွားလို့ရနိုင်ပြီး တန်ချိန်များတဲ့ ကုန်ကားကြီးတွေ သွားလာမရတော့ဘူးလို့ ဒေသခံတယောက်က ပြောပါတယ်။
ဒေသခံတဦးက “စစ်ကားတွေဟာ မော့ကနင်ရွာသစ်ကနေ လမိုင်း၊ သောင်ပြင်၊ တောင်ဘုံနဲ့ အာယုတောင် ကျေးရွာဘက် ကားလမ်းကို သွားလာကြတယ်။ ချုံခိုတိုက်ခိုက်တာခံရတာ များတာကြောင့် ရေး-သံဖြူဇရပ်ကားလမ်းက နှင်းစုံဘက်က အခုနောက်ပိုင်း မသွားတော့ဘဲ အခု လမိုင်း သောင်ပြင်လမ်းကို သွားလာတော့ တံတားပါ ဖျက်ဆီးခံရတယ်” လို့ ပြောပါတယ်။
အဲဒီ ရွာချင်းဆက်တံတားကို ရွာပေါင်း ၆ ရွာလောက်ဟာ သုံးနေတာဖြစ်ပြီး စစ်တပ်က ရေးဘက်ကို အဓိကသွားလာနေတဲ့ လမ်းတံတားလည်း ဖြစ်လာပါတယ်။
မွန်ပြည်နယ် ကျိုက်မရောမြို့နယ်၊ တောင်ကလေးကျေးရွာအရှေ့စုမှာ ဇန်နဝါရီ ၂၆ ရက် ညနေဘက်က ကလေး ၃ ယောက် ပစ္စည်းတခုကို ထုခွဲရာက ပေါက်ကွဲမှုဖြစ်ပြီး ထိခိုက်ဒဏ်ရာ ရခဲ့တယ်လို့ ဒေသခံတွေက ပြောပါတယ်။
ဒေသခံတဦးက “၃ ယောက်လုံးက မိသားစုဝင်တွေပဲ။ ပလတ်စတစ်ကော်ဘူး ကောက်ရင်း အဲဒါကို နေအိမ်ကို ယူလာတာ။ အိမ်ရောက်တော့ ထုကြည့်လိုက်တာက မတော်တဆ ပေါက်ကွဲခဲ့ တာ” လို့ ပြောပါတယ်။
ပေါက်ကွဲ ဒဏ်ရာရခဲ့တဲ့ ကလေးတွေကို ကျိုက်မရောဆေးရုံကတဆင့် မော်လမြိုင်ဆေးရုံကို လွှဲပြောင်းခဲ့တယ်လို့ လူမှုကယ်ဆယ်ရေးသမားတွေက ပြောပါတယ်။
