တွစ်တာ အင် ကော်ပိုရိတ်ဟာ ဒီဇင်ဘာ ၂၉ ရက်က ထောင်ပေါင်းများစွာသော သုံးစွဲသူတွေကို ဖြုတ်ချခဲ့ကြောင်း ပြတ်တောက်မှုခြေရာခံ ဝက်ဘ်ဆိုက် Downdetector.com အရ သိရပါတယ်။
နာမည်ကြီး ဆိုရှယ်မီဒီယာပလက်ဖောင်း တွစ်တာကို ဝင်ရောက်အသုံးပြုသူတွေကို “တခုခုတော့ မှားနေပြီ” ဆိုတဲ့ အမှားမက်ဆေ့ချ်ကို ပြသခဲ့ပါတယ်။
အမေရိကန်ပြည်ထောင်စုရှိ တွစ်တာသုံးစွဲသူ ၁၀,၀၀၀ ကျော်ဟာ ကြာသပတေးနေ့ ဂရင်းနစ်စံတော်ချိန် ၀၀း၄၀ နာရီအထိ ဝက်ဘ်ဆိုက်ကို ချိတ်ဆက်ဝင်ရောက်ခြင်းဆိုင်ရာ ပြဿနာတွေ တွေ့ရတယ်လို့ ဆိုပါတယ်။
တချို့ တွစ်တာသုံးစွဲသူတွေကတော့ သူတို့ရဲ့ တွစ်တာအကြောင်းကြားချက်တွေက အလုပ်မလုပ်ကြောင်း စောဒကတက်ခဲ့ကြပါတယ်။
တွစ်တာကို ဘီလျံနာ သန်းကြွယ်သူဌေး အီလွန်မတ်စ်ခ် ပိုင်ဆိုင်ထားပြီး အစားထိုးခန့်အပ်ရမယ့်သူကို တွေ့ရှိရင် အမှုဆောင်အရာရှိချုပ် အဖြစ်ကနေ နုတ်ထွက်မှာဖြစ်ကြောင်း ပြောဆိုခဲ့ပေမဲ့ ဆိုရှယ်မီဒီယာပလက်ဖောင်းရဲ့ အဓိကပိုင်းခြားမှုတချို့ကို ဆက်လက်လုပ်ဆောင်သွားမယ်လို့လည်း ဆိုပါတယ်။
တွစ်တာဆိုရှယ်မီဒီယာပလက်ဖောင်းရဲ့ အကြောင်းအရာ စိစစ်ရေးမူဝါဒတွေအကြောင်းကို တွစ်တာပိုင်ရှင် အီလွန်မတ်စ်ခ် နဲ့ ပွင့်ပွင့်လင်းလင်း ဆွေးနွေးခဲ့ကြကြောင်း ပြင်သစ်သမ္မတ အီမန်နျူရယ်မက်ခွန်းက ဒီဇင်ဘာလ ၂ ရက်က ပြောပါတယ်။
ပြင်သစ်သမ္မတက ဒီကိစ္စနဲ့ ပတ်သက်ပြီး သူ့ရဲ့စိုးရိမ်ပူပန်မှုတွေကို ထုတ်ဖော်ပြခဲ့ပြီး နောက်တရက်မှာ ခုလို တွေ့ဆုံဆွေးနွေးခဲ့တာပါ။
“ပွင့်လင်းမြင်သာတဲ့ သုံးစွဲသူမူဝါဒတွေ၊ အကြောင်းအရာ ထိန်းညှိမှုအတွက် သိသာထင်ရှားတဲ့ အားဖြည့်မှုနဲ့ လွတ်လပ်စွာပြောဆိုခွင့်ကို အကာအကွယ်ပေးခြင်း တွေမှာ ဥရောပ စည်းမျဉ်း စည်းကမ်းတွေနဲ့အညီ လိုက်နာအောင် တွစ်တာက ကြိုးပမ်းအားထုတ်ရမှာပါ” လို့ မက်ခွန်းက မတ်စ်ခ်နဲ့ တွေ့ဆုံပြီးနောက် တွစ်တာမှာ ပြောကြားခဲ့ပါတယ်။
လွတ်လပ်စွာပြောဆိုခွင့်အတွက် "တာဝန်နဲ့ ကန့်သတ်ချက်တွေ" ရှိတယ်လို့ ယူဆကြောင်း အမေရိကန်ပြည်ထောင်စုကို ရောက်ရှိနေတဲ့ မက်ခွန်းဟာ ဒီဇင်ဘာ ၁ ရက်က Good Morning America ရုပ်သံအစီအစဉ်နဲ့ အင်တာဗျူးမှာ ပြောကြားခဲ့ပါတယ်။
လွတ်လပ်စွာပြောဆိုခွင့်အတွက် ထောက်ခံသူ မတ်စ်ခ်ဟာ အရင် ကုမ္ပဏီခေါင်းဆောင်မှုပိုင်းက ဆိုင်းငံ့ထားတဲ့ အကောင့်တွေအတွက် ပြန်သုံးစွဲခွင့် ပြုလိုက်ပြီးနောက်မှာ ဆိုရှယ်မီဒီယာ ပလက်ဖောင်းပေါ်မှာ အမုန်းစကားတွေ မြင့်တက်လာကြောင်း သုတေသီတွေက အစီရင်ခံခဲ့ ပါတယ်။
