ဆူဒန်နိုင်ငံဝန်ကြီးချုပ်ဟောင်းဖြစ်သူ အာဒယ်လ်လာ ဟမ်းဒေါ့က နိုင်ငံရဲ့ စစ်တပ်နဲ့ စင်ပြိုင်လက်နက်ကိုင်တပ်ဖွဲ့ဖြစ်တဲ့ အလျင်အမြန်ကူညီပေးရေးတပ်ဖွဲ့ (RSF)တို့ အကြား ချက်ချင်းအပစ်အခတ်ရပ်စဲကာ တွေ့ဆုံဆွေးနွေးမှုတွေ ပြန်လည်ပြုလုပ်ဖို့တောင်းဆိုလိုက်ပါတယ်။

ဒီစစ်ရေးပဋိပက္ခအတွင်း ကုလသမဂ္ဂဝန်ထမ်း ၃ ဦး အပါအဝင် အနည်းဆုံး အရပ်သား ၉၇ ဦးအထိ သေဆုံးခဲ့ရပြီးပါပြီ။

ဟမ်းဒေါ့က “အနည်းဆုံး အပစ်အခတ်ရပ်စဲရေးကို အကောင်အထည်ဖော်ဖို့ လိုအပ်သလို ဆေးဝါး၊ ကုသမှုနဲ့ အစားအသောက်တွေအပေါ် အရပ်သားပြည်သူတွေ လက်လှမ်းမီနိုင်ဖို့အတွက် လူသားချင်းစာနာ ထောက်ထားမှုဆိုင်ရာ စင်္ကြံတစ်ခု ထူထောင် ပေးရမယ်”လို့ သတင်းစာရှင်းလင်းပွဲမှာ ပြောသွားတာပါ။

ဆူဒန်နိုင်ငံရဲ့ အသွင်းကူးပြောင်းဆိုင်ရာအာဏာပိုင်ကောင်စီအကြီးအကဲဖြစ်သူ ဗိုလ်ချုပ်ကြီး အာဒယ်ဖတ်တာအယ်လ်ဘူရဟန်အပေါ် သစ္စာခံတဲ့စစ်တပ်နဲ့ ဟီမီဒီလို့ လူသိများတဲ့ ကောင်စီရဲ့ လက်ထောက်အကြီးအကဲဖြစ်သူ ဗိုလ်ချုပ်ကြီး မိုဟာမတ်ဟမ်ဒန်ဒါဂါလို ဦးဆောင်ရာ အလျင်အမြန်ကူညီပေးရေး တပ်ဖွဲ့ (RSF)တို့အကြား ဧပြီလ၁၅ ရက်က စလို့ တိုက်ပွဲတွေ ဖြစ်ပွားနေတာပါ။

၂၀၁၉ ခုနှစ်မှာ စစ်ပြန်တစ်ဦးဖြစ်တဲ့ အစ္စလာမ္မစ်အာဏာရှင် အိုမာဟက်ဆန်အယ်လ်ဘာရှီးကို ရာထူးကနေ ဖြုတ်ချနိုင်ရေးအတွက် နှစ်ဖက်တပ်တွေ ပူးပေါင်းခဲ့ပြီးနောက် ပထမဆုံးအကြိမ် အဖြစ် ဒီလို စစ်ရေးပဋိပက္ခပေါ်ပေါက်လာခဲ့တာဖြစ်ပါတယ်။

အရပ်သားအုပ်ချုပ်ရေးဆိုင်ရာ အသွင်ကူးပြောင်းမှု တစ်စိတ်တစ်ပိုင်းအဖြစ် (RSF) တပ်ဖွဲ့က စစ်တပ်ကို ပူးပေါင်းလာချိန်မှာတော့ သဘောထားကွဲလွဲမှုတွေ စတင်လာခဲ့ပါတယ်။

ဟမ်းဒေါ့ကတော့ ပြည်ပကြားဝင်စွက်ဖက်မှုကို ငြင်းဆန်ပြီး ဒီလို စစ်ဘက်ဆိုင်ရာ အုပ်စုကွဲမှု အတွင်း နိုင်ငံတကာအသိုက်အဝန်းအနေနဲ့ တွေ့ဆုံဆွေးနွေးရေးအပေါ် အားပေးထောက်ခံကြဖို့ ၀န်ကြီးချုပ်ဟောင်းက တိုက်တွန်းလိုက်ပါတယ်။

စစ်ကောင်စီ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နဲ့ အပစ်ရပ် ၇ ဖွဲ့ရဲ့ အလွတ်သဘောဆွေးနွေးညှိနှိုင်းရေးအဖွဲ့တို့ဟာ ဒီနေ့ မတ် ၂၈ ရက်နေ့က နေပြည်တော်မှာ အလွတ်သဘောတွေ့ဆုံ ဆွေးနွေးခဲ့တယ်လို့ အပစ်ရပ် ၇ ဖွဲ့က ထုတ်ပြန်ပါတယ်။

ဒီတွေ့ဆုံပွဲကို အပစ်ရပ် ၇ ဖွဲ့က  အလွတ်သဘောဆွေးနွေးညှိနှိုင်းရေးအဖွဲ့ ခေါင်းဆောင် ဗိုလ်မှူးကြီး စဝ်စိုင်းငင်း(RCSS)၊ ဒုတိယခေါင်းဆောင်တွေဖြစ်တဲ့ စောမြရာဇာလင်း (ALP)၊ နိုင်အောင်မငေး (NMSP) အပါအဝင် အဖွဲ့ဝင် ၅ ဦးနဲ့ အထောက်အကူပြု ကိုယ်စားလှယ် ၅ ဦး၊ စုစုပေါင်း ၁၂ ဦး တက်ရောက်ခဲ့ပါတယ်။

စစ်ကောင်စီဘက်ကတော့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) ဒုတိယဗိုလ်ချုပ်ကြီး ဝင်းဗိုလ်ရှိန် ဦးဆောင်တဲ့ ကိုယ်စားလှယ် ၇ ဦးအဖွဲ့တို့ တက်ရောက် ဆွေးနွေးခဲ့တာပါ။

တွေ့ဆုံပွဲမှာ အပစ်ရပ် ၇ ဖွဲ့ရဲ့ အလွတ်သဘောဆွေးနွေး ညှိနှိုင်းရေးအဖွဲ့က သက်ဆိုင်သူ အားလုံးပါဝင်တဲ့ နိုင်ငံရေးဆွေးနွေးမှု အခင်းအကျင်းတရပ်ပေါ်ပေါက်ရေး၊ ငြိမ်းချမ်းရေးလုပ်ငန်းစဉ်အဆင့်ဆင့်နဲ့ ဖက်ဒရယ်အခြေခံမူတွေ စတဲ့ အကြောင်းအရာတွေ တင်ပြဆွေးနွေးခဲ့တယ်လို့ ထုတ်ပြန်ထားပါတယ်။

အပစ်ရပ် ၇ ဖွဲ့ ပြောခွင့်ရ ဗိုလ်မှူးကြီး စောကျော်ညွှန့်ကတော့ ဒီတွေ့ဆုံမှုဟာ အားလုံးပါဝင်တဲ့ နိုင်ငံရေးဆွေးနွေးပွဲ ဖြစ်မြောက်ရေးအတွက် ကနဦး ကြိုးပမ်းမှု ဖြစ်ပြီး ရပ်ဆိုင်းနေတဲ့ ငြိမ်းချမ်းရေးလုပ်ငန်းစဉ်တွေ စတင်နိုင်ဖို့ လုပ်ဆောင်တာလို့ ဒီဗွီဘီကို ပြောပါတယ်။

စစ်ကောင်စီနဲ့ အပစ်ရပ် ၇ ဖွဲ့ရဲ့ အလွတ်သဘောဆွေးနွေးညှိနှိုင်းရေးအဖွဲ့တို့ဟာ ဒုတိယနေ့အဖြစ် လာမယ့် မတ် ၂၉ ရက်နေ့မှာ ထပ်မံဆွေးနွေးသွားဖို့ ရှိနေတယ်လို့ ဆိုပါတယ်။

စစ်ကောင်စီနဲ့ အလွတ်သဘောဆွေးနွေးမယ့် အပစ်ရပ် EAOs ၇ ဖွဲ့ထဲမှာ ရခိုင်ပြည်လွတ်မြောက်ရေးပါတီ (ALP)၊ မွန်ပြည်သစ်ပါတီ (NMSP) ၊ ဒီမိုကရေစီအကျိုးပြုကရင်တပ်မတော် (DKBA)၊ ကရင်ငြိမ်းချမ်းရေးကောင်စီ (KNU/ KNLA-PC)၊ လားဟူဒီမိုကရက်တစ်အစည်းအရုံး (LDU)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) နဲ့ သျှမ်းပြည်ပြန်လည်ထူထောင်ရေးကောင်စီ (RCSS) တို့ ပါဝင်ပါတယ်။

ဒီအပစ်ရပ် ၇ ဖွဲ့ဟာ စစ်ကောင်စီ ဖိတ်ခေါ်တဲ့ ငြိမ်းချမ်းရေး ဆွေးနွေးပွဲကို ၃ ကြိမ်တိုင် တက်ရောက် ဆွေးနွေးထားတဲ့ တိုင်းရင်းသားလက်နက်ကိုင်တပ်ဖွဲ့တွေ ဖြစ်ပြီး စစ်တပ် အာဏာသိမ်းပြီးနောက် စစ်ကောင်စီတပ်နဲ့ ထိတွေ့တိုက်ပွဲ တကြိမ်မှ ဖြစ်ပွားထားခြင်း မရှိပါဘူး။