တရုတ်နိုင်ငံက၊ ဖူကျန်းပြည်နယ်ရဲ့ ရေကြောင်းလုံခြုံရေးဆိုင်ရာ အုပ်ချုပ်ရေးအဖွဲ့ဟာ ထိုင်ဝမ် ရေလက်ကြားမှာ တရုတ်ကမ်းခြေစောင့်သင်္ဘောတွေ ကင်းလှည့်နေတဲ့ ဗီဒီယိုမှတ်တမ်းကို ဧပြီ ၆ ရက်မှာ ထုတ်ပြန်လိုက်ပါတယ်။ 

ဧပြီ ၅ ရက်မှာ ထိုင်ဝမ်သမ္မတဖြစ်သူ ဆိုင်အင်ဝမ်က အမေရိကန် အောက်လွှတ်တော်ဥက္ကဋ္ဌ ကက်ဗင် မက်ကာသီနဲ့ တွေ့ဆုံခဲ့တဲ့အပေါ် တရုတ်ပြည်မကြီးဘက်က လက်တုံ့ပြန်တဲ့အနေနဲ့ ၃ ရက်ကြာ ကင်းလှည့်စစ်ဆေးမယ့် အထူးစစ်ဆင်ရေးရဲ့ ဒုတိယမြောက်နေ့လည်း ဖြစ်ပါတယ်။

ထိုင်ဝမ်ရေလက်ကြား အလယ်ပိုင်းက ပူးပေါင်းစစ်ဆင်ရေးအတွင်း ဟေ့ဆန်-၀၆ အမည်ရ ကင်းလှည့် ကယ်ဆယ်ရေး သင်္ဘောတစ်စီး ဦးဆောင်လာတဲ့ ရေကြောင်းဥပေဒစိုးမိုးမှုဆိုင်ရာ ရေယာဉ်စုကို  ဗီဒီယိုမှတ်တမ်းထဲမှာ ပြသထားပါတယ်။

တရုတ်အရှေ့တောင်ပိုင်းပြည်နယ်က အာဏာပိုင်တွေဟာ ဒီစစ်ဆင် ရေးအတွင်း ထိုင်ဝမ် ရေလက်ကြားရဲ့ မြောက်ပိုင်းနဲ့ အလယ်ပိုင်းနေရာတွေမှာ ကုန်တင်သင်္ဘောတွေ အပါအဝင် ဝမ်းပြားသင်္ဘောကြီးတွေကိုပါ စစ်ဆေးခဲ့တာ ဖြစ်ပါတယ်။ 

သင်္ဘောသွားလာမှုဆိုင်ရာ ဘေးကင်းမှု အပြင် ရေပေါ်က အဓိကစီမံကိန်းကြီးတွေရဲ့ စနစ်တကျ လုပ်ငန်းလည်ပတ်မှုနဲ့ လုံခြုံရေး သေချာမှုရှိအောင် ရည်ရွယ်တာလို့လည်း ဆိုပါတယ်။

ဒီရေတပ်သင်္ဘောစုဟာ ထိုင်ဝမ်ရေလက်ကြားရဲ့ မြောက်ဘက်ရေပြင်မှာလည်း ဆက်လက် ကင်းလှည့်သွားမှာပါ။

ထိုင်ဝမ်ကို ပြည်မကြီးအနေနဲ့ ပိုင်ဆိုင်ကြောင်း တရုတ်နိုင်ငံဘက်က အခိုင်အမာပြောဆိုထားသလို ထိုင်ဝမ်ရေလက်ကြားဟာလည်း တရုတ်နိုင်ငံရဲ့ အချုပ်အချာ အာဏာပိုင် နယ်မြေဖြစ်တယ်လို့ ဆိုပါတယ်။ 

စစ်အေးကာလ ရန်လိုမှုမြင့်တက်ခဲ့ရာ ၁၉၅၄ ခုနှစ်မှာ အမေရိကန် ဗိုလ်ချုပ်ကြီးတစ်ဦး ရေးဆွဲခဲ့တဲ့ ကြားနေမျဉ်းအပေါ် တရုတ်နိုင်ငံဘက်က တရားဝင် အသိအမှတ်ပြုမှု မရှိပေမယ့် တရုတ်စစ်တပ်ကတော့ ဒီအပေါ်မှာ နှစ်ပေါင်းများစွာ လေးစားမှုရှိခဲ့ပါတယ်။

ထိုင်ဝမ်ဟာ ဘယ်တုန်းကမှ နိုင်ငံတနိုင်ငံမဟုတ်သလို ဘယ်တော့မှလည်း နိုင်ငံတတနိုင်ငံ ဖြစ်လာမှာမဟုတ်ဘူးလို့ တရုတ်နိုင်ငံတော်ကောင်စီ၊ ထိုင်ဝမ်ရေးရာရုံးရဲ့ ပြောရေးဆိုခွင့်ရှိသူ အမျိုးသမီး ကျူးဖှုန့်လျန်က ဖေဖော်ဝါရီ ၈ ရက်မှာ ကျင်းပတဲ့ သတင်းစာရှင်းလင်းပွဲမှာ ပြောလိုက်ပါတယ်။

ဒီမိုကရက်တစ်တိုးတက်ရေးပါတီ (DPP) ရဲ့ ဥက္ကဋ္ဌ လိုင်ကျင်းတာက သူဟာ DPP ရဲ့ ဥက္ကဋ္ဌဟောင်း ချိုင်အင်းဝမ်ရဲ့ ရေလက်ကြားဖြတ်ကျော်မူဝါဒ ရပ်တည်ချက်ကို စွဲကိုင်သွားမယ်လို့ ပြောအပြီးမှာ ကျူးဖှုန့်လျန်က ခုလို မှတ်ချက်ပေးခဲ့တာပါ။

“ထိုင်ဝမ်ရေလက်ကြားရဲ့ နှစ်ဖက်စလုံးဟာ သမိုင်းအထောက်အထားတွေ ရှင်းရှင်းလင်းလင်းနဲ့ တရားဝင်အခြေခံရှိတဲ့ အချက်ဖြစ်တဲ့ တရုတ်နိုင်ငံတခုတည်းက ပိုင်ဆိုင်ပါတယ်။ ထိုင်ဝမ်ဟာ ဘယ်တော့မှ နိုင်ငံတနိုင်ငံ မဟုတ်ခဲ့သလို နိုင်ငံတနိုင်ငံ ဖြစ်လာမှာမဟုတ်ပါဘူး” လို့ ကျူးက ပြောပါတယ်။

“ထိုင်ဝမ်ခွဲထွက်ရေးမှာ ပါဝင်တာဟာ သမိုင်းဆိုင်ရာ ဖွံ့ဖြိုးတိုးတက်မှုနဲ့ တရုတ်ပြည်သူအားလုံးရဲ့ဆန္ဒကို ဆန့်ကျင်ပြီး ထိုင်ဝမ်ရေလက်ကြားရဲ့ နှစ်ဖက်စလုံးက ဆွေမျိုးသားချင်းတွေရဲ့ အကျိုးစီးပွားကို အကြီးအကျယ် ထိခိုက်ပျက်စီးစေပါတယ်” လို့လည်း သူက ပြောပါတယ်။