မကြာသေးခင်လပိုင်းကမှ သေလုမျောပါးအစာငတ်ခံဆန္ဒပြပြီး မိဘအုပ်ထိန်းသူတို့ရဲ့ အာမခံနဲ့ ပြန်လွတ်လာတဲ့ နိုင်ငံရေးတက်ကြွလှုပ်ရှားသူ ထိုင်းဆယ်ကျော်သက် ကျောင်းသူ မိန်းကလေး ၂ ဦးဖြစ်တဲ့ တဝမ်း နဲ့ ဘဲန်းတို့ဟာ အပေါင်းပါတွေနဲ့အတူ ထပ်မံဖမ်းဆီးခံလိုက်ရပါတယ်။

သူတို့ ၂ ဦးအပါအဝင် ဒီမိုကရေစီရေးတက်ကြွလှုပ်ရှားသူ ၉ ဦးကို ဘန်ကောက် ဆမ်ရန်းရာ့ဆဒွန်းနယ်မြေရဲတပ်ဖွဲ့က ဌာနဆိုင်ရာပစ္စည်းဖျက်ဆီးမှု၊ ဌာနဆိုင်ရာတာဝန်ရှိသူရဲ့ အမိန့်အာဏာဖီဆန်မှု၊ ပိုက်နက်ကျူးကျော်မှုတွေနဲ့ ပြီးခဲ့တဲ့ မေလ ၁၀ ရက်ညက ဖမ်းဆီးလိုက်တာပါ။

အဲဒီမတိုင်ခင်က ဆန္ဒပြသူ ၂၀ လောက်ဟာ ရဲစခန်းရှေ့မှာ လာရောက်စုဝေးပြီး ပုဒ်မ ၁၁၂ ထိုင်းတော်ဝင်မိသားစုဂုဏ်သရေညှိုးနွမ်းအောင် အသရေဖျက်မှုနဲ့ ဖမ်းဆီးထိန်းသိမ်းခံထားရတဲ့ ယုံ   ဆိုသူ အသက် ၁၅ နှစ်အရွယ်ကျောင်းသူလေးကို ပြန်လွှတ်ပေးဖို့ လာရောက်တောင်း ဆိုခဲ့ပါတယ်။ 

ယုံ ဟာ မေလ ၂၃ ရက်နေ့ နောက်ဆုံးထားပြီး ကျောင်းပြန်အပ်ရင် စာမေးပွဲဖြေဆိုခွင့်ရမယ်၊ အဲဒီထက်နောက်ကျရင် ဖြေခွင့်မရှိဘဲ အတန်းပညာ ၁ နှစ်လုံး ဆုံးရှုံးသွားမှာ ဖြစ်ပါတယ်။ 

သူဟာ မေလ ၁၂ ရက်မှာ ဘန့်ဘရဏီလူငယ်ပြုပြင်ရေးစခန်းကနေ လွတ်မြောက်ရမှာဖြစ်ပေမဲ့ ရဲတပ်ဖွဲ့က သူ့ကို ရှေးဟောင်းယဉ်ကျေးမှုနယ်မြေဥပဒေချိုးဖောက်မှုနဲ့ ထပ်မံတရားစွဲလိုက်လို့  တက်ကြွလှုပ်ရှားအဖွဲ့တွေက မကျေနပ်ဘဲ ရဲစခန်းမှာ လာရောက် တောင်းဆိုကြပါတယ်။ အဲဒီအခါမှာ ရဲတွေနဲ့  အဓိကရုဏ်းဖြစ်ပြီး ဆန္ဒပြသူတွေက ရဲစခန်းမှန်တံခါးကိုထုခွဲကာ အထဲဝင်ဖို့ကြိုးစားသလို တချို့ကလည်း လှေကားရင်းနဲ့ ရဲကားတွေကို ရောင်စုံဆေးတွေနဲ့ စပရေးမှုတ်ခဲ့ကြပါတယ်။

အဆိုပါအဓိကရုဏ်းကြောင့် ရဲတပ်ဖွဲ့ဝင် ၁ ဦး ခေါင်းထုခံရကာ ဆေးရုံခေါ်သွားရကြောင်း၊   ရဲစခန်းမှန်တစ်ချပ် ကွဲသွားပြီး နံရံနဲ့ လှေခါးထစ်၊ လှေခါးဘောင်တွေ ဆေးမှုတ်ခံရတယ်၊ ရဲတပ်ဖွဲ့ဝင် ၂ ဦးရဲ့ ကား ၂ စီးဆေးမှုတ်ခံရတယ်၊ သူတို့ပြောတဲ့ ရဲက မိန်းကလေးတယောက်ကို အဝတ်ဆွဲချွတ်ဖို့လုပ်တယ်ဆိုတာမမှန်ကန်ပါဘူးလို့ စခန်းမှူး ထွတ်စဖုန်းအမ်းဖိုင်းဖတ် ထနားကွန်းက သတင်းထောက်တွေကို ပြောပါတယ်။

အဲဒီနေ့က  တဝမ်းနဲ့ ဘဲန်းအပါအဝင် ဆန္ဒပြသူ ၉ ဦးကို ဖမ်းဆီးပြီး လတ်ကဘန်း ၊ ချလောင်ကုန်းနဲ့ ထုန့်ဆောင်ဟောင့်စတဲ့ နယ်မြေရဲစခန်း ၃ ခုမှာခွဲပြီး ထိန်းသိမ်းထားတယ်လို့ စခန်းမှူးက ပြောပါတယ်။ 

Photo-Khaosod

ကိုးကား -  ThaiPBS / Ch3 TV News

ထိုင်းနိုင်ငံအရှေ့မြောက်ပိုင်း မုတ်ဒါဟန်ခရိုင် မုတ်ဒါဟန်မြို့ အထက်တန်းကျောင်း ၁ ကျောင်းက ၁၄ နှစ်ရွယ် ကျောင်းသူလေးအား အဓမ္မပြုကျင့်မှုနဲ့ ကျောင်းဆရာ ၅ ဦးအပါအဝင် ကျောင်းသားဟောင်း ၂ ဦးတို့ကို အမှုဖွင့် ဖမ်းဆီးထားတယ်လို့ သိရပါတယ်။ ၁၄ နှစ်ရွယ်ကျောင်းသူလေးဟာ  ပြီးခဲ့တဲ့ ၂၀၁၉ ခုနှစ် မတ်လကတည်းက ဒီနှစ်ထိ အဆိုပါ ကျောင်းဆရာတွေနဲ့ ကျောင်းသားဟောင်းတို့ရဲ့ ဖြားယောင်းသွေးဆောင်မှု၊ အဓမ္မပြုကျင့်မှုတွေ အကြိမ်ကြိမ်ခံခဲ့ရပြီး မိဘအုပ်ထိန်းသူတွေက ဒီနှစ်မေလဆန်းပိုင်းမှ သိရတာကြောင့် ရဲစခန်းမှာ သွားရောက် အမှုဖွင့်လိုက်တာပါ။  မနှစ် မတ်လတုန်းက သင်္ချာဘာသာရပ်သင်ကြားသူ ဆရာ  ၁ ဦးက စပြီး မိန်းလေးကို သူ့ရဲ့ အဆောင်ကို ဖြားယောင်းခေါ်ယူကာ လိင်ပိုင်းဆိုင်ရာစော်ကားပြီး အဓမ္မပြုကျင့်ခဲ့တယ်လို့ ဆိုပါတယ်။  ဒီနောက် အဆိုပါ ဆရာက အခြားသူတွေခေါ်ကာ အတူအဓမ္မပြုကျင့်တာရှိသလို အခြားဆရာတွေကလည်း သူတို့အဆောင်နဲ့ တခြားနေရာတွေ ခေါ်ယူပြီးပြုကျင့်ခဲ့တာလည်း ဖြစ်ပါတယ်။ ဒီလိုပြုကျင့်တာကို ဗွီဒီယိုရိုက်ထားပြီး လူကြီးတွေကို တိုင်ပြောရင် ဗွီဒီယိုဖိုင်ဖြန့်ချိပြီး သူမကိုလည်းသတ်ပစ်မယ်လို့ ခြိမ်းခြောက်တာကြောင့် အနိုင်ကျင့်စော်ကားမှုတွေကို ဒီနှစ်ထိ ခံလာခဲ့ရတာလို့ ကာယကံရှင်မိန်းကလေးက တာဝန်ရှိသူတွေကို ပြောပါတယ်။  တာဝန်ရှိသူတွေက ဆရာတွေနေတဲ့အဆောင်ကို သွားရောက်စစ်ဆေးရာမှာ အရက်ပုလင်းခွံတွေ ၊ ဘီယာ ဘူးခွံနဲ့ ကွန်ဒုံးတွေ တွေ့ရှိပြီး သက်သေခံပစ္စည်းအဖြစ် သိမ်းယူခဲ့ပါတယ်။  ကျောင်းဆရာ ၅ ဦးမှာ နိုင်းဝိဖုဒ် (၃၁ နှစ်)၊ နိုင်းယုထနာ (၃၆ နှစ်) ၊ နိုင်းအာနုဖတ် (၂၃ နှစ်)၊ နိုင်းဧကလတ် (၃၅ နှစ်) နဲ့ အသက် ၂၁ နှစ်ရွယ် ကျောင်းသားဟောင်း ချနဆဒ် နဲ့ ဖီရဖုန်း တို့ဖြစ်ပြီး သူတို့အားလုံးကို ရဲတပ်ဖွဲ့က ဖမ်းဆီးထိန်းသိမ်းလိုက်ပါတယ်။  ဖမ်းခံရသူတွေကတော့ သူတို့ဟာ မိန်းကလေးကို အဓမ္မပြုကျင့်တာမဟုတ်ဘဲ မိန်းကလေးက အလိုတူတာဖြစ်ကြောင်း ငြင်းဆန်ထားပြီး  ကျောင်းဆရာတွေက ကိစ္စပြီးတာနဲ့ မိန်းကလေးကို မုန့်ဖိုး ဘတ် ၂၀၀ ပေးတဲ့ ဗွီဒီယိုဖိုင်တွေကိုလည်း ဖုန်းထဲမှာ တွေ့ရှိခဲ့ပါတယ်။  ဒါပေမယ့် ရဲစခန်းကတော့  မိန်းကလေးသည် အလိုတူတယ်ဆိုတောင်မှ အသက်မပြည့်သေးတဲ့အတွက် သူတို့ ၇ ဦးလုံးကို အသက် ၁၅ နှစ်အောက် မိန်းကလေးအား မုဒိမ်းကျင့်ရန် ဖျားယောင်းသွေးဆောင်မှု၊ လိင်ပိုင်းဆိုင်ရာနှောင့်ယှက်မှု၊ မုဒိမ်းမှု၊ မိမိအုပ်ထိန်းမှုအောက်မှာရှိတဲ့ ကလေးသူငယ်အား လိင်ပိုင်းဆိုင်ရာ နှောင့်ယှက်စော်ကားမှု၊ အဓမ္မကျင့်မှုတွေနဲ့ အမှုဖွင့်အရေးယူထားပါတယ်။  ဒါ့အပြင် နောက်ထပ် အသက် ၁၆ နှစ်ရွယ်ကျောင်းသူတဦးကလည်း သူမပါ အဆိုပါ ကျောင်းဆရာအုပ်စုရဲ့ အဓမ္မပြုကျင့်မှုကို ၁ ကြိမ်ခံခဲ့ရကြောင်း လာရောက်တိုင်ကြားခဲ့ပါတယ်။  လိင်ပိုင်းဆိုင်ရာစော်ကားခံရတဲ့ နောက်ထပ်ကျောင်းသူတွေလည်းရှိသေးကြောင်း ပြောဆိုနေ တာကြောင့် ခံရတဲ့ကာယကံရှင်တွေအနေနဲ့ ကိုယ်တိုင်လာရောက်တိုင်တန်းကြဖို့ ရဲစခန်းက ကြေညာထားပါတယ်။  ဒီကိစ္စနဲ့ ပတ်သက်ပြီး မုတ်တာဟန်ခရိုင်ပညာရေးမှူးမှ အရေးပေါ်အစည်းအဝေး တရပ်ခေါ်ယူကာ ကျောင်း သူကျောင်းသားများကို ပဲ့ပြင်ထိန်းကျောင်းရမယ့် ဆရာတွေက ခုလိုပြုမူကျူးလွန်ခဲ့တဲ့အပေါ် လုံးဝလက်ခံလို့မရကြောင်း ပြောဆိုပြီး အဆိုပါ ပညာရေး ဝန်ထမ်း ၅ ယောက်လုံးကို ချက်ချင်း တာဝန်မှရပ်စဲလိုက်သလို စုံစမ်းစစ်ဆေးရေး ကော်မတီတရပ်ကို ဖွဲ့စည်းလိုက်ပါတယ်။  ထိုင်းပညာရေးဝန်ကြီးဌာနကလည်း ပညာရေးဝန်ထမ်းက အခုလိုပြစ်မှုကျူးလွန်တဲ့အပေါ် ဝန်ထမ်းဆိုင်ရာ ကျင့်ဝတ်စည်းမျဉ်းဥပဒေနဲ့ ပြစ်ဒဏ်တွေ နောက်ထပ်တင်းကျပ်စွာ ဖြည့်စွက်ချမှတ်သွားမယ်လို့ ဆိုပါတယ်။  ထိုင်းဥပဒေအရ အသက်မပြည့်သော မိန်းကလေးပေါ် မုဒိမ်းမှုကျူးလွန်ကြောင်း ထင်ရှားပါက ထောင်ဒဏ် တသက်တကျွန်းကျခံရမှာဖြစ်ပါတယ်။  ကျင့်ကြံစော်ကားခံရသူ မိန်းကလေး ၂ ဦးအတွက် ထိုင်းတရားရေးဝန်ကြီးဌာနမှ ဆေးကုသစရိတ် နစ်နာကြေးတွေ ထုတ်ပေးသွားဖို့ရှိပြီး ဘတ် ၄ သောင်းထက်မပိုတဲ့ ဆေးကုသစရိတ်၊ ဘတ် ၂ သောင်းထက် မပိုတဲ့ ကိုယ်ပိုင်းဆိုင်ရာ/စိတ်ပိုင်းဆိုင်ရာ ပြန်လည်ထူထောင်စရိတ်နဲ့ နောက်ထပ် နစ်နာကြေး ဘတ် ၅ သောင်း ထောက်ပံ့သွားမယ်လို့ ထိုင်းတရားရေးဝန်ကြီး နိုင်းဆုမ်ဆဒ် ထိပ်ဆုဒင်းက သတင်းထောက်တွေကို ပြောသွားပါတယ်။