ထိုင်းအရှေ့ပိုင်း၊ လယောင်းခရိုင်ထဲမှာ မြန်မာရေလုပ်သား ၆ ဦးပါတဲ့ ထိုင်းငါးဖမ်းလှေတစ်စီး ပင်လယ်ထဲ နစ်မြုပ်သွားတယ်လို့ ထိုင်းသတင်းတွေမှာဖော်ပြပါတယ်။
လယောင်းမြို့ ဘန့်ဖေးဆိပ်ကမ်းနဲ့ ရေလမ်းခရီး ၇ မိုင်အကွာ ကော်ကျန့်ကျွန်းနားမှာ ငါးဖမ်းလှေတစ်စီး နစ်မြုပ်သွားတယ်လို့ လှေပိုင်ရှင်က မနေ့ညက ဆက်သွယ်အကူအညီတောင်းလာတာကြောင့် ကယ်ဆယ်ရေးလှေနဲ့တကွ အနီးနားတဝိုက်ရှိ တခြားငါးဖမ်းလှေတွေနဲ့အတူ သွားရောက်ကယ်တင်ခဲ့တာဖြစ်ပါတယ်။
ရေထဲခေါင်းဖော်ပြီးကူးခတ်နေတဲ့ လှေသားတွေကို ကယ်တင်ရာမှာ စက်တင်ဘာ ၂၇ ရက် မနက် ၁ နာရီကျော်မှာ ၇ ဦးကို ကယ်တင်နိုင်ခဲ့တယ်လို့ ရေကြောင်းကယ်ဆယ်ရေးအဖွဲ့က ပြောပါတယ်။
အဆိုပါ ၇ ဦးအနက် ၆ ဦးမှာ မြန်မာရေလုပ်သားတွေဖြစ်ပြီး ၁ ဦးကတော့ ဗီယက်နမ်နိုင်ငံသားဖြစ် ကြောင်း သူတို့အားလုံး တညလုံးရေကူးထားရလို့ နွမ်းလျနုံးခွေနေကြပြီး လယောင်းဆေးရုံကို ပို့ဆောင်ထားကာ အသက်အန္တရာယ်မစိုးရိမ်ရတော့ဘူးလို့ ဆိုပါတယ်။
ဒါပေမဲ့လည်း အသက် ၅၆ နှစ်ရွယ်ရှိ နိုင်းအနုဆဒ်ချေ့ခုံးမန့်ဆိုသူ ထိုင်းလူမျိုး လှေသူကြီးကတော့ ပျောက်ဆုံးနေဆဲဖြစ်ပြီး ဒီကနေ့ မနက် ၅ နာရီခွဲမှာ ကယ်ဆယ်ရေးလှေအပါအဝင် လှေပေါင်း ၁၇ စီးနဲ့ လိုက်လံရှာဖွေနေကြောင်း ပင်လယ်ထဲမှာ လှိုင်းထန်လွန်းတဲ့အတွက် ရှာဖွေရေး လုပ်ငန်းအခက်အခဲဖြစ်နေကြောင်း ကယ်ဆယ်ရေးအဖွဲ့က ပြောပါတယ် ။
အသက်ဘေးမှလွတ်မြောက်လာသူ မြန်မာလုပ်သား ၁ ဦးပြောပြချက်အရ မနေ့က ငါးဖမ်း ထွက်စဉ် ပင်လယ်ပြင်မှာ လှိုင်းထန်လာကြောင်း ၊ ခဏအကြာ အလွန်ကြီးမားတဲ့ လှိုင်းလုံးကြီးက သူတို့လှေကို ပုတ်ထုတ်လိုက်ပြီး လှေလည်းနစ်သွားကြောင်း၊ အကုန်လှေထဲကထွက်ပြီး ပင် လယ်ထဲကူးခတ်ကာ အသက်မရှင်နိုင်တော့ဘူးလို့ တွေးနေစဉ်မှာ ကယ်ဆယ်ရေးလှေတွေ ရောက် လာလို့အရမ်းဝမ်းသာသွားကြောင်းနဲ့ ကယ်ဆယ်ရေးအဖွဲ့အားလုံးကိုကျေးဇူးတင်ကြောင်း ပြောပါတယ်။
လှေသူကြီးကတော့ လှေထဲကနေအချိန်မီထွက်မလာနိုင်လို့ လှေနဲ့အတူနစ်မြုပ်သွားပြီလို့ ယူဆ ကြောင်း ရေလုပ်သားက ပြောပါတယ်။
Ref- Matichon/Khaosod
ထိုင်းတောင်ပိုင်း ပတ္တနီခရိုင် ပတ္တနီမြို့က ငါးဖမ်းလှေတစ်စီးပေါ်မှာ မြန်မာရေလုပ်သား ၃ ဦး စွန့်ပစ်ငါးသေတွေကို ဝင်တူးစဉ် အပုပ်နံ့တွေကြောင့် အဆိပ်သင့်ပြီး ၃ ဦးလုံး သေဆုံးသွားခဲ့ကြပါတယ်။
သူတို့တွေဟာ ပင်လယ်ထဲမှာ ၁၀ ရက်ကျော် ငါးဖမ်းထွက်ပြီး ပြီးခဲ့တဲ့ မတ် ၃၁ ရက် ည ၉ နာရီလောက်က ကမ်းစပ်ကို ပြန်ကပ်ခဲ့ကြောင်း၊ ကမ်းစပ်ကိုရောက်ခါနီး အလုပ်သမား ၁ ဦးက စွန့်ပစ်ငါးတွေထားတဲ့ကျင်းထဲမှာ ငါးပါကင်တူးရာမှာ အနံ့အသက်ပြင်းလွန်းတာကြောင့် အသက်ရှူ ကြပ်စဉ် နောက်ထပ် ၃ ဦးက သွားရောက်ကူညီရာမှာ ကူညီတဲ့သူတွေပါ အဆိပ်သင့်ပြီး သေဆုံးသွားခဲ့တယ်လို့ အလုပ်သမားတွေကို အကူအညီပေးဖို့ သွားရောက်ခဲ့တဲ့ ရွှေ့ပြောင်း အလုပ်သမားအခွင့်အရေးကွန်ရက်အဖွဲ့ MWRN (ဟတ်ယိုင်နယ်မြေတာဝန်ခံ) ဦးဘရီက ဒီဗွီဘီကို ပြောပါတယ်။
“သူတို့တွေက ငါးဖမ်းလို့ရလာရင် ငါးတွေကို အကြီး၊ အသေးအမျိုးအစားခွဲထုတ်ရတယ်။ ပြီးတော့ ရောင်းပန်းမလှတဲ့ ငါးအရောအနှောတွေ အကောင်သေးတာတို့၊ သေကျေသွားတာတို့ အဲဒါတွေကို သပ်သပ်ထားတယ်၊ အဲဒါက လူမစားဘူး၊ တိရစ္ဆာန်အစားအစာထုတ်လုပ်ဖို့ ပြန်ရောင်းရတယ်။ လှေကမ်းကပ်မယ်ဆိုတော့ အလုပ်သမားက အဲဒီငါးတွေထုတ်တာပေါ့။ ငါးပါကင်တူးတယ်လို့ ခေါ်တယ်။ ငါးအထားခံအောင် ရေခဲတို့၊ ဆားကြမ်းတို့ နိုင်နိုင်ထည့်ပြီး ငါးပုပ်ရေတွေ စုတ်ထုတ်ရ တယ်။ အခုက သန့်ရှင်းရေးမလုပ်တာကြာလို့ အပုပ်နံ့တွေကနေ ဂက်စ်ထွက်ပြီး လူတွေကို သေစေ တဲ့သဘောပါ။ ၄ ယောက်ဆင်းသွားတဲ့ထဲမှာ ၃ ယောက်သေဆုံးပြီး ၁ ယောက်ကတော့ အချိန်မီ ဆေးရုံပို့နိုင်ခဲ့တယ်။”
သေဆုံးသွားတဲ့ အလုပ်သမားတွေဟာ အသက် ၂၀ ကျော် နဲ့ ၃၀ ကြားမှာရှိပြီး ရခိုင်ပြည်နယ် မြောက်ဦးမြို့နယ်ကဖြစ်ကြောင်း၊ အဲဒီထဲက အသက်အငယ်ဆုံး ၁ ယောက်မှာ သူ့ဖခင်က ရဟန်းဝတ်ပေးချင်လို့ ရခိုင်ပြည်ကနေ ပတ္တနီမှာလာစောင့်နေတာ ၁ ပတ်ပဲရှိသေးကြောင်း၊ သားကပြန်လာပေမယ့် အသက်မရှိတော့ဘူးလို့ ဆိုပါတယ်။
သူတို့ရဲ့ ဈာပနကို ပတ္တနီမြို့ ဝပ်လမ်(ခ်)နို့ခ် ဘုန်းကြီးကျောင်းမှာထားရှိပြီး ဒီကနေ့ နဲ့ မနက်ဖန် ၂ ရက်ခွဲပြီး မီးသင်္ဂြိုဟ်မှာဖြစ်ကာ အသုဘကုန်ကျစရိတ်အကုန်လုံးကို လှေပိုင်ရှင်က တာဝန်ယူ ပေးတယ်လို့ ဆိုပါတယ်။
သေဆုံးသွားတဲ့ အလုပ်သမား ၃ ယောက်လုံးဟာ လူမှုဖူလှုံရေးရန်ပုံငွေထဲ လစဉ်ထည့်ဝင်ထားကြ တဲ့အတွက် ဥပဒေအရ လုပ်ငန်းခွင်မတော်တဆသေဆုံးမှု နစ်နာကြေးကို လုပ်သက်အလိုက်ရရှိ ကြမှာဖြစ်ကြောင်း၊ ပျှမ်းမျှ လုပ်အားခ ၁ လ ဘတ် ၉၀၀၀ နှုန်းနဲ့ ၁၂၀ လအတွက် နစ်နာကြေး ၁ ဦးလျှင် ဘတ် ၁ သန်း ၈ သောင်းခန့်ရနိုင်ပြီး မိဘနဲ့ဆွေမျိုးသားရင်းတွေသာ လာရောက်ထုတ်ယူခွင့်ရှိတယ်လို့ MWRN က ပြောသွားပါတယ်။
