ထိုင်း-မြန်မာနယ်စပ်၊ ထိုင်းနိုင်ငံဘက်ခြမ်း၊ ချင်းရိုင်ခရိုင်၊ မယ်ဆိုင်မြို့က နေအိမ် တလုံးမှာ ထိုင်းအာဏာပိုင်တွေက သတင်းအရ ဝင်ရောက်ရှာဖွေခဲ့ရာကနေ လက်နက်ခဲယမ်း ၁ဝဝ ကျော် ဖမ်းဆီးရမိခဲ့တယ်လို့ ထိုင်းနိုင်ငံအခြေစိုက် Maesai press သတင်းဌာနက ဖော်ပြထားပါတယ်။

ချင်းရိုင်ခရိုင်၊ မယ်ဆိုင်မြို့၊ ဆရီချိုင်ယာဖန်းရွာနားက နေအိမ်တလုံးကို မသင်္ကာဖွယ် သတင်းရရှိခဲ့တဲ့အတွက် မေ ၉ ရက် မနက်ပိုင်းက ရှာဖွေရေးဝရမ်းထုတ်ကာ ထိုင်းရဲတပ်ဖွဲ့၊ ခရိုတက်ခ် စစ်ထောက်လှမ်းရေးအဖွဲ့၊ နယ်ခြားစောင့်တပ်တွေနဲ့ ဝင်ရောက်စီးနင်း ရှာဖွေခဲ့ရာကနေ လက်နက်တွေ သိမ်းဆည်းရမိခဲ့တာပါ။

ဝင်ရောက်ရှာဖွေရာ အဆိုပါအိမ်အတွင်း သေနတ်အတိုတလက်၊ အရှည်တလက်နဲ့ ခဲယမ်းတွေ သိမ်းဆည်းရမိပြီး နောက်ထပ်အခန်းတခန်းကို ဆက်လက်ရှာဖွေရာ ပါဆယ်သေတ္တာတွေနဲ့ ထုပ်ပိုးထားတဲ့ လက်နက်နဲ့ ဆက်စပ်ပစ္စည်း ၁ဝဝ ကျော်ကို သိမ်းဆည်းရမိခဲ့တာဖြစ်ပြီး အခုလို ဖမ်းဆီးရမိတဲ့အိမ်နေရာ ဆရီချိုင်ရွာက မြန်မာနိုင်ငံ၊ တာချီလိတ်မြို့ နယ်စပ်မှာတည်ရှိပြီး လက်နက်တွေနဲ့အတူ ဖမ်းဆီးရမိတဲ့ အမျိုးသားက မြန်မာလား ထိုင်းလူမျိုးလား ဆိုတာကိုတော့ ဖော်ပြထားခြင်း မရှိပါဘူး။

လက်ရှိမှာတော့ ရွေးကောက်ပွဲကာအတွင်း မှုခင်းကျဆင်းရေး စီမံချက်နဲ့ နယ်စပ်လူကုန်ကူးမှုတွေ၊ တရားမဝင် လုပ်ဆောင်နေတဲ့ လုပ်ငန်းတွေကို အထူးတိုက်ဖျက်နေတာဖြစ်ပြီး ပြီးခဲ့တဲ့ မေ ၈ ရက်ကလည်း မဲဆောက်မြို့ရဲစခန်းမှာ ၃ နိုင်ငံ နယ်စပ်လူကုန်ကူးမှုကျဆင်းရေး တွေ့ဆုံပွဲတခု ပြုလုပ်ခဲ့ပါတယ်။

ထိုင်းနိုင်ငံ၊ ချင်းမိုင်ခရိုင်၊ မဲ့အိုင်းမြို့နယ် ထိုင်း-မြန်မာနယ်စပ်အနီးမှာ ပြီးခဲ့တဲ့ရက်ပိုင်းက မူးယစ်ဆေးဝါးသယ်ဆောင်လာတဲ့အဖွဲ့နဲ့ ထိုင်းစစ်တပ်တို့ ပစ်ခတ်မှုဖြစ်ပွားပြီး စိတ်ကြွဆေးပြား ၄ သိန်း ဖမ်းဆီးရမိခဲ့တယ်လို့ မယ်ဆိုင်ပရက်စ် ဒေသတွင်းသတင်းက မတ် ၃၀ ရက်မှာ ဖော်ပြပါတယ်။

ပြီးခဲ့တဲ့ မတ် ၂၆ ရက် မွန်းလွဲပိုင်းက ထိုင်းခြေမြန်တပ်ရင်း တပ်ဖွဲ့ဝင်တွေဟာ မဲ့အိုင်းမြို့နယ် မဲ့အိုင်းအုပ်စု ဘန်မအင့်ကျေးရွာအနီး တောစပ်မှာ လုံခြုံရေးတာဝန်ထမ်းဆောင်စဉ် မသင်္ကာဘွယ်လူတစု အထုပ်တွေကျောပိုးပြီး မြန်မာနယ်စပ်တောင်ကုန်းဘက်ကနေ ဆင်းလာတာ တွေ့ရှိတယ်လို့ ဆိုပါတယ်။

ထိုင်းစစ်တပ်က စစ်ဆေးဖို့ ရပ်မိန့်ပေးလိုက်ရာမှာ တဖက်က လူစုခွဲပြီး သေနတ်နဲ့ စပစ်ခဲ့ကြောင်း၊ ဒါကြောင့် ထိုင်းစစ်တပ်က ပြန်လည်ပစ်ခတ်ပြီး မိနစ်အနည်းငယ် အပြန်အလှန် ပစ်ခတ်ခဲ့တယ်လို့ ဆိုပါတယ်။

သေနတ်သံတွေငြိမ်သွားတော့ ထိုင်းစစ်တပ်က အဆိုပါနေရာကို ပစ်ခတ်လမ်းရှင်းပြီး တဖြည်းဖြည်းဝင်သွားကြောင်း၊ အခင်းဖြစ်တဲ့နေရာမှာ လူမရှိတော့ဘဲ မြွေရေခွံအိတ် ၄ လုံးနဲ့ အသုံးအဆောင်ပစ္စည်း တချို့သာ တွေ့တယ်လို့ သတင်းမှာ ဖော်ပြပါတယ်။

အိတ် ၄ လုံးထဲမှာ စိတ်ကြွဆေး ၁ သိန်းစီပါရှိပြီး စုစုပေါင်း ၄ သိန်းရှိကြောင်း၊ ၂ သိန်းမှာ 999 တံဆိပ်နဲ့ နောက်ထပ် ၂ သိန်းမှာ Y1 တံဆိပ်တို့ဖြစ်ကြောင်း၊ ဒါ့အပြင် အနွေးထည်အင်္ကျီ ၃ ထည်၊ ကက်ပ်ဦးထုပ် ၁ လုံး၊ ကျောပိုးအိတ် ၁ လုံးနဲ့ မူးယစ်ဆေးသုံးကိရိယာတချို့ တွေ့ရှိခဲ့ပါတယ်။

အဆိုပါပစ္စည်းတွေကို မဲ့အိုင်းမြို့နယ်ရဲစခန်းကို ပို့ဆောင်လိုက်ပြီး ထွက်ပြေးလွတ်မြောက်သူနဲ့ ပါဝင်ပတ်သက်သူတွေကို နယ်စပ်ကျေးရွာအနီးနားတဝိုက်မှာ ဆက်လက်ရှာဖွေနေတယ်လို့ ဆိုပါတယ်။

မဲ့အိုင်းမြို့နယ်ဟာ မြန်မာနိုင်ငံ ရှမ်းပြည်နယ် မိုင်းဆတ်ခရိုင်နဲ့ ကပ်လျက်တည်ရှိပြီး အဆိုပါနယ်မြေထဲမှာ UWSA ဝ တပ်ဖွဲ့၊ လားဟူတပ်ဖွဲ့တွေ သွားလာလှုပ်ရှားနေပါတယ်။