ထိုင်းနိုင်ငံမြောက်ပိုင်းမှာ မုန်တိုင်းငယ်တစ်ခု ဝင်ရောက်တိုက်ခတ်ခဲ့တာကြောင့် မတ် ၁၈ ရက်က ချင်းမိုင်မြို့နေ အိမ်ထောင်စု ၆၀၀ နီးပါးအပေါ် မုန်တိုင်းသင့်ခဲ့တယ်လို့ ဒီမြို့ရဲ့ ဘေးအန္တရာယ် ကာကွယ်ရေးနဲ့ လျော့ပါးရေးဆိုင်ရာဌာနက ဆိုပါတယ်။ 

ချင်းမိုင်မြို့ခံတစ်ဦးက လေတိုက်တာ အစပိုင်းမှာ မပြင်းထန်ပေမယ့် ၁၀ မိနစ်လောက်ကြာတော့ လေပြင်းတွေနဲ့အတူ မိုးအကြီးအကျယ် ရွာလာတော့တာပဲလို့ ပြောပြပါတယ်။ 

ဒီလိုမိုးရွာသွန်းမှု မိနစ် ၂၀ လောက် ကြာမြင့်ပြီးတဲ့နောက် သစ်ပင်တွေ ပြိုလဲပြီး အဆောက်အအုံ တွေ ထိခိုက်ပျက်စီးခဲ့တယ်လို့ ချင်းမိုင်မြို့ခံက ဖြည့်စွက်ပြောပါ တယ်။

ဒီဖြစ်ရပ်အပြီး ညပိုင်းလောက်အထိ လျှပ်စစ်မီးပြတ်တောက်ပြီး မီးပွိုင့်တွေပါ အလုပ် မလုပ်တော့တာကြောင့် ယာဉ်ကြော ပိတ်ဆို့ခဲ့ပါတယ်။ 

သက်ဆိုင်ရာဝန်ကြီးဌာနတွေအနေနဲ့ ဆိုးဝါးတဲ့ ရာသီဥတုဘေးဒဏ်သင့်ခဲ့ရာ ချင်းမိုင်မြို့က နေထိုင်သူတွေအတွက် အကူအညီပေးကြရမယ်လို့ ထိုင်းဝန်ကြီးချုပ်ပရာရွတ် ချန်အိုချာက မတ် ၁၉ ရက်မှာ အမိန့်ထုတ်ပြန်ခဲ့ပါတယ်။ 

ထိုင်းမြောက်ပိုင်း၊ မယ်ဟောင်ဆောင်ခရိုင်၊ ပန်မဖာ့မြို့ထဲမှာ ဒီဇင်ဘာ ၄ ရက် မနေ့ညနေပိုင်းက ပေါက်ကွဲမှုတခုဖြစ်ပွားပြီး ပျက်စီးဆုံးရှုံးမှုများကာ လူ ၂ ဦး ဒဏ်ရာရခဲ့ပါတယ်။

ပန်မဖာ့မြို့ Big C ကုန်တိုက်နဲ့ မျက်နှာချင်းဆိုင် ကုန်စုံဆိုင်ကြီးတခုထဲမှာ မနေ့ညနေ ၅ နာရီလောက်က ပေါက်ကွဲမှုဖြစ်ပြီး ဆိုင်ထဲကပစ္စည်းတွေအကုန် မီးလောင်ပျက်စီးခဲ့သလို အနီးနားရပ်ထားတဲ့ ကားနဲ့ ဆိုင်ကယ်တွေလည်း ပျက်စီးခဲ့ပါတယ်။

ဒါ့ပြင် အနီးက ဘဏ်တိုက်နဲ့ လူနေအိမ် မှန်ပြတင်း၊ မှန်တံခါးတွေ အက်ကွဲပြီး ဆိုင်ရှင် ၁ ဦးနဲ့ ဈေးဝယ်လာသူ ၁ ဦးတို့ ထိခိုက်ဒဏ်ရာရခဲ့ပါတယ်။ ဒဏ်ရာရသူတွေကို ကယ်ဆယ်ရေးအဖွဲ့က ပန်မဖာ့ဆေးရုံကြီးကို ပို့ဆောင်ခဲ့ပါတယ်။

တာဝန်ရှိသူတွေက ပေါက်ကွဲမှုဖြစ်ရတဲ့ အကြောင်းရင်းကို စစ်ဆေးရာမှာ ခြင်ဆေးခွေ ထွန်းညှိရာက စတင်ကြောင်း၊ ခြင်ဆေးခွေက မီးပွားလေးဟာ အနီးကစက္ကူပေါ်ကျပြီး အဲဒီနားမှာ ရောင်းဖို့ချထားတဲ့ မီးရှူးမီးပန်းတွေဆီ ကူးစက်လောင်ကျွမ်းတယ်လို့ ဆိုပါတယ်။ မီးရှူးမီးပန်းကနေတဆင့် ဆိုင်ထဲက ထမင်းဟင်းချက်တဲ့ ဂက်စ်အိုးဆီ ဆက်လက်ကူးစက်ကာ ပေါက်ကွဲမှုတွေ ဖြစ်ခဲ့တာလို့ ဆိုပါတယ်။

ဒီပေါက်ကွဲမှုနဲ့ပတ်သက်တဲ့ ဆုံးရှုံးမှုပမာဏ မသိရသေးပေမဲ့ ထိခိုက်ဒဏ်ရာရသူ ၂ ဦးကတော့ သက်သာလို့ ဆေးရုံကဆင်းလာပြီလို့ ဆိုပါတယ်။

ကိုးကား - ချနယ်လ် ၈ ထိုင်းတီဗွီသတင်း