ထိုင်းဝန်ကြီးချုပ်နေရာအတွက် ရေပန်းစားနေတဲ့ ထိုင်းအတိုက်အခံပါတီခေါင်းဆောင်ဟာ  ရွေးကောက် ပွဲဥပဒေဥပဒေနဲ့ မညီညွတ်တဲ့  မီဒီယာကုမ္ပဏီတခုမှာ အစုရှယ်ယာပါဝင်မှုနဲ့  ပြန်လည်စိစစ်ဖို့ တိုင်ကြားခံနေရပါတယ်။

ထိုင်းနိုင်ငံမှာ အထွေထွေရွေးကောက်ပွဲအတွက် သက်ဆိုင်ရာနိုင်ရေးပါတီအသီးသီးက မဲဆွယ်စည်းရုံးနေရာမှာ အတိုက်အခံပါတီ နှစ်ခုဖြစ်တဲ့ ကလောက်ကိုင်ပါတီ ( Move Forward Party ) နဲ့  ဖွေ့ထိုင်းပါတီ ( ရှပ်နီပါတီ) တို့က ရေပန်းအစားဆုံးဖြစ်နေပါတယ်။ 

အထူးသဖြင့် ဝန်ကြီးချုပ်နေရာအတွက် စစ်တမ်းတွေကောက်ယူချက်အရ MFP ပါတီခေါင်းဆောင် ထိမ်းဖိထား လိုမ့်ကျရွန်းရတ်က ရှပ်နီပါတီထက်ပိုပြီး လူကြိုက်များရေပန်းစားနေတာဖြစ်ပါတယ်။ 

ဒါပေမဲ့ သူဟာ ရွေးကောက်ပွဲဥပဒေနဲ့ ညှိစွန်းဖွယ် iTV မီဒီယာကုမ္ပဏီမှာ အစု ရှယ်ယာပါဝင်မှုရှိနေတာကို ပြန်လည်စစ်ဆေးဖို့ ဖရန်းပချားရတ်ပါတီ (လက်ရှိအာဏာရ စစ်တပ်ပါတီ ) လွှတ်တော်အမတ် နိုင်းကိန်းကလိုင် လိကစ်ဝပ်ထနက ရွေးကောက်ပွဲကော်မရှင်ကို တိုင်ကြားထားတယ်လို့ ထိုင်းသတင်းတွေမှာ ဖော်ပြပါတယ်။ 

iTV ကုမ္ပဏီဟာ အွန်လိုင်းသတင်းထုတ်လွှင့်တာကို နှစ်အတန်ကြာရပ်နားခဲ့ပေမဲ့ ကြော်ငြာလက်ခံနေတာကို တွေ့မိကြောင်း ၊ အဆိုပါကုမ္ပဏီထဲမှာ MFP ပါတီခေါင်းဆောင် ထိမ်းဖိထား လိုမ့်ကျရွန်းရတ်ဟာ အစုရှယ်ယာ ၄၂၀၀၀ ကျော်ပါဝင်နေတယ်၊ ရွေးကောက်ပွဲ ဥပဒေ ပုဒ်မ ၉၈/၃ အရ  မီဒီယာတွေမှာ အစုရှယ်ယာ ဝင်ထားသူတွေဟာ နိုင်ငံရေးပါတီထဲ ပါဝင်ခွင့်မရှိ၊ ကိုယ်စားလှယ်လောင်းအဖြစ် ဝင်ရောက်ရွေးချယ်ခွင့်မရှိလို့ သတ်မှတ်ထားတာကြောင့် ရွေး ကောက်ပွဲကော်မရှင်ကို ပြန်လည်စိစစ်ဖို့ တိုင်ကြားရတာလို့ နိုင်းကိန်းကလိုင်က သတင်းထောက် တွေကို ပြောပါတယ်။ 

ဒီကိစ္စနဲ့ ပတ်သက်ပြီး  ကာယကံရှင် ဖိထားကတော့ -iTV မှာ သူကိုယ်တိုင်အစုရှယ်ယာပါဝင်တာ မဟုတ်ဘဲ ကွယ်လွန်သူဖခင်ရဲ့ ကျန်ရစ်ခဲ့တဲ့အမွေဆက်ခံမှုဖြစ်ပြီး သူဟာ အမွေစီမံခန့်ခွဲ ခွင့်ရှိသူ သာဖြစ်တယ်၊  ဒီအကြောင်းကို လွန်ခဲ့တဲ့ ၄ နှစ် သူလွှတ်တော်အမတ်အဖြစ်အရွေးခံတုန်းက လာဘ်စားမှုတိုက်ဖျက်ရေးနဲ့ ကာကွယ်ရေးကော်မတီကိုလည်း အသိပေးထားပြီးဖြစ်တယ်။ ဒါကို ပြန်လည်ချေပဖို့ ပါတီဥပဒေရေးရာဘက်က ပြင်ဆင်ထားပြီးဖြစ်တယ် ၊ သူ့အနေနဲ့ ဘာမှစိုးရိမ်ကြောင့်ကြမှုမရှိ၊ သမာဓိလည်းမပျက်ဘူး၊ လောလောဆယ် သူတို့ပါတီဟာ  လူထုအား ပေးထောက်ခံမှုအားကောင်းနေတာကြောင့် အနှောင့်အယှက်ပြုခံရတာ ထုံးစံပဲ၊ ရွေးကောက်ပွဲဝင်ဖို့  ကျန်ရှိနေတဲ့ အချိန်လေးမှာ မဲဆွယ်စည်းရုံးမှု အကောင်းဆုံးလုပ်သွားမယ်၊  ပါတီဝင်တွေ ပါတီထောက်ခံသူတွေအနေနဲ့ မစိုးရိမ်ဖို့၊ စိတ်အနှောင့်အယှက်မဖြစ်ဖို့၊ အစွမ်းကုန်ကြိုးစားဖို့ သူရဲ့ လူမှုကွန်ရက်ကနေ ရေးသားထားသလို သတင်းထောက်တွေကိုလည်း ဖြေကြားထားပါတယ်။ 

လောလောဆယ် MFP ပါတီအတွက် မဲဆွယ်စည်းရုံးရေးမှာ ပါဝင်ကူညီနေသူ FFP ပါတီ အမျိုးသမီး လွှတ်တော်အမတ်ဟောင်း ချော့ကလည်း ဖိထားဟာ ဥပဒေနဲ့ညီညွတ်လို့ ၄ နှစ်တိုင်လွှတ်တော်အမတ်ဖြစ်ခဲ့ပြီးပြီ၊ အခုမှလာပြီး အပြစ်ကိုတူးဆွနေတာဟာ ညစ်ပတ်တဲ့ နိုင်ငံရေးကစားမှု ဖြစ်တယ်၊ MFP ပါတီဟာ လူကိုမမူတည်ဘဲ ပြည်သူကိုမူတည်တဲ့ပါတီဖြစ်တယ်၊ ဒါကြောင့် ပြည်သူတွေအနေနဲ့ ပြည်သူ့အာဏာ ရရှိရေးအတွက် ကြောက်ရွံ့မှုကို ဘေးဖယ်ထားပြီး ရဲရဲဝံ့ဝံ့ ဆန္ဒမဲပေးကြဖို့ မနေ့က မဲဆွယ်စည်းရုံးရေး ဟောပြောပွဲမှာ ပြောကြားသွားပါတယ်။ 

MFP ပါတီဟာ အရင်က  Future Future ပါတီဖြစ်ခဲ့ပြီး ပါတီခေါင်းဆောင် ထနားထွဏ်းဟာ ဝန်ကြီးချုပ်အဖြစ် ရေပန်းစားခဲ့သလို လွှတ်တော်အမတ်လည်းဖြစ်ခဲ့ပါတယ်၊ ဒါပေမဲ့ သူဟာ We Love Media ဆိုတဲ့ ဂျာနယ်မှာ အစုရှယ်ယာပါဝင်ပြီး ရှယ်ယာအမည်လွှဲပြောင်းတာကို နောက်ကျမှပြန်လုပ်လို့ ရွေးကောက်ပွဲဥပဒေနဲ့ မညီညွတ်ဘူးဆိုကာ စစ်ကောင်စီလက်အောက်ခံ ရွေးကောက်ပွဲကော်မရှင်က သူတို့ပါတီကို ဖျက်သိမ်းလိုက်ပြီး ပါတီခေါင်းဆောင်နဲ့ ထိပ်တန်းပါတီဝင်တချို့တွေ လွှတ်တော်ထဲက ထွက်ရကာ ၁၀ နှစ်တာ နိုင်ငံရေးပါတီ လုပ်ကိုင်ခွင့် ပိတ်ပင်ခံခဲ့ရပါတယ်။ 

ဒါကြောင့် ကျန်တဲ့ပါတီဝင်တွေက MFP ပါတီအမည်နဲ့ ပြန်လည်မှတ်ပုံတင်ပြီး လက်ရှိရေပန်းစားနေတဲ့ ထိမ်း ဖိထားကို ပါတီခေါင်းဆောင် တင်မြှောက်ခဲ့ပါတယ်။ 

သူဟာလည်း ထနားထွဏ်းလိုပဲ အပြစ်ပေးခံရမှာကို ပါတီဝင်နဲ့ ထောက်ခံသူတွေက စိုးရိမ်ကြောင့်ကြနေတာလည်း ဖြစ်ပါတယ်။ 

ဝန်ကြီးချုပ်အဖြစ် ရေပန်းစားနေသူ ရှပ်နီ ( ဖွေ့ထိုင်း ) ပါတီခေါင်းဆောင် ဖဲထောင်းထန်း ခေါ် အုန်အင်ဟာလည်း သူ့ အစုရှယ်ယာသန်းပေါင်း ၁၂၀၆ ထောင်ပါဝင်ထားတဲ့ SC Asset အိမ်ခြံမြေဖွံ့ဖြိုးရေးကုမ္ပဏီဟာ မီဒီယာလုပ်ငန်းနဲ့ ပတ်သက်မှုရှိကြောင်း ပြန်လည်စိစစ်ဖို့ ဆီဆုဝမ်း ကျန်းယားဆိုသူက ရွေးကောက်ပွဲကော်မရှင်ကို တိုင်ကြားစာပို့ထားတာ ခံနေရပါတယ်။

Photo-Move Forward Party

ထိုင်းနိုင်ငံမှာ လာမယ့် မေ ၁၄ ရက်မှာ တနိုင်ငံလုံးဆိုင်ရာ ပါတီစုံဒီမိုကရေစီ ရွေးကောက်ပွဲ ကျင်းပမှာဖြစ်ပြီး အဲဒီနေ့မှာ အကြောင်းအမျိုးမျိုးကြောင့် ဆန္ဒမဲသွားမပေးနိုင်သူတွေအတွက် ကြိုတင်မဲပေးခြင်းကို ပြီးခဲ့တဲ့ တနင်္ဂနွေ မေ ၇ ရက်က ကျင်းပခဲ့ပါတယ်။

အဲဒီနေ့က ကြိုတင်မဲပေးရာမှာ အဆင်မပြေမှုနဲ့ အမှားအယွင်းတွေ များစွာရှိခဲ့ပြီး လူမှုကွန်ရက်မှာ  “ရွေးကောက်ပွဲကော်မရှင် ဘာအတွက်ဖွဲ့ထားသလဲ” ဆိုတဲ့မေးခွန်းနဲ့ Hashtag # တွဲ ဖော်ပြတာတွေလည်း ပျံ့နှံနေပါတယ်။

အဆိုပါကွဲလွဲမှားယွင်းမှုတွေမှာ ဆန္ဒမဲပေးရမယ့် စာအိတ်ပေါ်မှာ မဲဆန္ဒနယ်မြေ မှားယွင်းရေးသားတာ၊ မဲဆန္ဒနယ်မြေ ရေးမထားတာ၊ ကြိုတင်မဲပေးဖို့ အွန်လိုင်းကနေ မှတ်ပုံတင်ထားပေမဲ့ မဲရုံရှေ့မှာ မိမိအမည်ပါမလာတာ၊ နယ်မြေထဲမှာ ကြိုတင်မဲပေးထားသူ အရေအတွက်ထက် မဲလာပေးသူက ပိုများနေတာ၊ မဲပေးရမယ့် အကွက်ထဲမှာ မိမိပေးလိုတဲ့ ပါတီ ဒါမှမဟုတ် ကိုယ်စားလှယ်လောင်းအမည် ပါမလာတာ၊ ကိုယ်စားလှယ်လောင်းရဲ့ ဓာတ်ပုံအစား တခြားသူရဲ့ဓာတ်ပုံ ထည့်ထားတာ၊ မိမိနယ်မြေထဲ မဲရုံရှိပါလျက် တခြားနယ်မြေမှာ အုပ်စုလိုက် မဲသွားပေးတာ၊ သက်ကြီးရွယ်အိုတွေ တအုပ်ကြီးရောက်လာပြီး ကြိုတင်မဲထည့်သွားတာ စတဲ့ မသင်္ကာစရာတွေပါ တွေ့ရှိခဲ့တယ်လို့ ထိုင်းသတင်းတွေမှာ ဖော်ပြပါတယ်။

ထိုင်းလွှတ်တော်အမတ်ဟောင်း နိုင်းချူဝစ် ကမွန်ဝိဆစ် (တရုတ်မာဖီးယားဂိုဏ်းနှင့် ထိုင်းအရာရှိများ လာဘ်စားမှု ဖော်ထုတ်နေသူ) ကလည်း အမ်နတ်ကျရွန်းခရိုင်ထဲမှာ မဲဆန္ဒနယ်မြေ ၁ ထဲကနေ နယ်မြေ ၂ ထဲမှာ ကြိုတင်မဲသွားထည့်သူ ၄,၇၃၅ ဦး၊ နယ်မြေ ၂ ကနေ နယ်မြေ ၁ ထဲ မဲသွားထည့်သူ ၂,၅၅၄ ဦး စုစုပေါင်း ၇,၀၀၀ ကျော်ရှိတယ်၊ မဲသွားပေးသူတွေထဲမှာ သက်ကြီးရွယ်အိုတွေဟာ ကားနဲ့ တအုပ်ကြီးရောက်လာတယ်၊ ကြိုတင်မဲထည့်သူတွေဟာ ပုံမှန်အားဖြင့် မဲသွားထည့်ရမယ့်နေ့မှာ မအားလပ်လို့၊ တခြားဒေသမှာ အလုပ်လုပ်နေရလို့ အိမ်မပြန်နိုင်တဲ့ ကျောင်းသားတွေ လူလတ်ပိုင်းတွေ များတယ်၊ ဘာကြောင့် လူအိုတွေက တပြိုင်တည်း မအားလပ်ကြတာလဲ၊ ဘာကြောင့် မိမိနယ်မြေနဲ့ ၁၀ ကီလိုမီတာကျော်သာဝေးတဲ့ နယ်မြေမှာ ကြိုတင်မဲ သွားထည့်ကြသလဲ၊ ဒါဟာ သဘာဝမကျတဲ့ဖြစ်စဉ်ပဲလို့ သတင်းစာရှင်းပြီး ပြောပါတယ်။

ဒါ့အပြင် မဲရုံတခုမှာ‌ တအုပ်ကြီးရောက်လာပြီး ကြိုတင်မဲလာပေးတဲ့ ရွာသားတွေကို မေးထားတဲ့ ဗွီဒီယိုအထောက်အထားပါ ဖွင့်ပြခဲ့ပါတယ်။ အဆိုပါဗွီဒီယိုမှာ ရွာသား ၁ ဦးက သူတို့ကို ရွာသူကြီးက လာခိုင်းကြောင်း၊ ၁၀ ယောက်ကို ၁ စု မဲလာထည့်ရပြီး အိမ်ပြန်ရောက်ရင် တယောက် ဘတ် ၅၀၀ စီပေးမယ်လို့ ပြောတယ်လို့ ဆိုပါတယ်။

ကြိုတင်မဲပေးပွဲမှာ အခုလို မသမာမှုတွေရော၊ အမှားအယွင်းတွေ ရှိနေတဲ့အပေါ်မှာ ရွေးကောက်ပွဲကော်မရှင်က ဒီရွေးကောက်ပွဲကို မအောင်မြင်စေချင်လို့ လုပ်နေတာလားလို့ မေးခွန်းထုတ်လိုက်ပါတယ်။

မဲစစ်တမ်းတွေမှာ ရေပန်းစားနေတဲ့ ရှပ်နီပါတီနဲ့ ကလောက်ကိုင်ပါတီကလည်း သတင်းစာရှင်းလင်းပြီး ရွေးကောက်ပွဲကော်မရှင်အနေနဲ့ ဒီမှားယွင်းမှုတွေအပေါ်မှာ တာဝန်ယူမှု တာဝန်ခံမှုရှိဖို့ တောင်းဆိုလိုက်ပါတယ်။

ဒီကိစ္စနဲ့ပတ်သက်ပြီး ရွေးကောက်ပွဲကော်မရှင်ရုံး အထွေထွေအတွင်းရေးမှူး နိုင်းဆဝဲင် ဘွန်းမီးက ၂၀၂၃ အထွေထွေရွေးကောက်ပွဲ အောင်မြင်စွာပြီးဆုံးဖို့ ကော်မရှင်အနေနဲ့ လုပ်ငန်းစဉ်အဆင့်ဆင့်ကို အသေအချာ စီမံဆောင်ရွက်ထားပြီးဖြစ်ကြောင်း၊ အခုလိုဖြစ်သွားရတာတွေဟာ နယ်မြေထဲက အောက်ခြေဝန်ထမ်းတချို့ရဲ့ မှားယွင်းမှု အသေးအဖွဲတွေသာ ဖြစ်တယ်၊ လိုအပ်သလို စစ်ဆေးအရေးယူသွားမယ်၊ ဘယ်လိုပဲဖြစ်ဖြစ် မဲဆန္ဒရှင်တွေရဲ့ တန်ဖိုးရှိတဲ့ မဲ ၁ ပြား အလဟဿမ ဆုံးရှုံးစေရဘူး၊ အခုလို လွဲချော်မှားယွင်းမှုတွေ ထောက်ပြတဲ့အပေါ်မှာလည်း ကျေးဇူးတင်တယ်၊ ဒါဟာ ရွေးကောက်ပွဲကော်မရှင်ရဲ့ ဆောင်ရွက်ချက်တွေ ပွင့်လင်းမြင်သာပြီး ပြည်သူတွေ စစ်ဆေးလို့ရတယ် ဆိုတဲ့ ပြယုဂ်တွေပဲဖြစ်တယ်၊ လာမယ့် မေလ ၁၄ ရက်နေ့ ရွေးကောက်ပွဲမှာ အခုလို အသေးအဖွဲ အမှားအယွင်းတွေ မရှိစေရဘူးလို့ မေ ၈ ရက် သတင်းစာရှင်းပွဲမှာ ပြောပါတယ်။

မေလ ၇ ရက် ကြိုတင်ရွေးကောက်ပွဲမှာ ဆန္ဒမဲထည့်ဖို့ မှတ်ပုံတင်ထားသူ ၂,၂၂၂,၃၈၀ ဦးရှိပြီး ၂,၀၃၀,၆၂၈ ဦး လာရောက်မဲပေးတဲ့အတွက် ၉၁ ဒသမ ၃၇ ရာခိုင်နှုန်းရှိတယ်လို့  ရွေးကောက်ပွဲကော်မရှင် အတွင်းရေးမှူးက ပြောပါတယ်။

ရွေးကောက်ပွဲမတိုင်ခင် သတင်းဌာနနဲ့ လွတ်လပ်တဲ့အဖွဲ့အစည်းတချို့က ပြည်သူ့ထောက်ခံအားပေးမှုရတဲ့ ပါတီတွေကို စစ်တမ်းကောက်ယူရာမှာ စစ်အာဏာရှင်အစိုးရကို ဆန့်ကျင်တဲ့ ကလောက်ကိုင်ပါတီနဲ့ ရှပ်နီပါတီက လူကြိုက်များ ရေပန်းစားနေတာကြောင့် သူတို့အာဏာမရအောင် မသမာမှုတွေသုံးမှာ ဒါမှမဟုတ် အကြောင်းအမျိုးမျိုးရှာ အာဏာပြန်သိမ်းမှာကိုလည်း စိုးရိမ်နေကြပါတယ်။