ထိုင်းနိုင်ငံ၊ ချွန်းပူးရီးခရိုင်၊ ဘန့်ဘိန်မြို့ နောင်ချန်းရပ်ကွက်ရှိ အလုပ်သမားတန်းလျားမှာ ထိုင်းအမျိုးသမီး ၁ ဦးကို မုဒိမ်းကျင့်ဖို့ကြိုးစားတဲ့ မြန်မာ ၁ ဦး ဖမ်းဆီးခံရတယ်လို့ ချနယ်လ် ၇ ထိုင်းတီဗွီသတင်းမှာ ဖော်ပြပါတယ်။ 

စန်းလွင် လို့ခေါ်တဲ့ မြန်မာလုပ်သား ၁ ဦးဟာ ပြီးခဲ့တဲ့ စက်တင်ဘာ ၂၅ ရက်နေ့ညက သူ့တည်းတဲ့ အခန်းနဲ့ မျက်နှာချင်းဆိုင်အခန်းထဲကို ဝင်သွားပြီး အိပ်ပျော်နေတဲ့ အမျိုးသမီးရဲ့ခန္ဓာကိုယ်ကို အုပ်မိုးကာ အဓမ္မကျင့်ဖို့ ကြိုုးစားစဉ် အမျိုးသမီး ရုတ်တရက်နိုးလာပြီး အော်ဟစ်အကူအညီ တောင်းသလို ခြေနဲ့လည်း ဆောင့်ကန်ပစ်လိုက်တယ်လို့ ဆိုပါတယ်။ 

အမျိုးသမီး အော်သံကြောင့် တခန်းတည်းအိပ်နေတဲ့ အသက် ၆၇ နှစ်ရွယ် မိခင်ဖြစ်သူလည်း နိုးလာပြီး စန်းလွင် လဲကျသွားတာနဲ့ တခါတည်းဖမ်းချုပ်ကာ လက်ကိုကြိုးနဲ့ချည်နှောင်ပြီး ရဲကို အကြောင်းကြားလိုက်တာလို့ မိခင်က ရဲတွေကို ပြောပါတယ်။ 

ဒီမတိုင်ခင် နေ့ခင်းက စန်းလွင်ဟာ အိမ်ရှေ့မှာရပ်ထားတဲ့ သူတို့ ဟိုင်းလပ်ကားပေါ်ကို ခပ်တည်တည်နဲ့ တက်ထိုင်ခဲ့ကြောင်း၊ မိခင်ဖြစ်သူကလည်း သူ့ကို သင်္ကာမကင်းဖြစ်ပြီး မကောင်းတာလုပ်မှာစိုးလို့ အလင်းရောင်ရအောင် သမက်ကိုခေါ်ပြီး မီးလုံးထပ်ဆင်ခဲ့ကြောင်း၊ ညရောက်တော့လည်း တံခါးကို သေချာပိတ်ပြီးမှ အိပ်ရာဝင်တာတောင် ရအောင်ဝင်ခဲ့သေးတယ်လို့  မိန်းကလေးမိခင်က ဆက်ပြောပါတယ်။ 

စန်းလွင်ကလည်း သူဟာ အလုပ်ရှာဖို့ အဲဒီမှာ လာတည်းခိုကြောင်း၊ အမျိုးသမီးကို မြင်တော့ စိတ်ဝင်စားပြီး ညအချိန်မှာ အခန်းတံခါးဖွင့်ပြီး အဓမ္မပြုကျင့်ဖို့ ဝင်သွားခဲ့တာလို့ ဝန်ခံပါတယ်။ 

အသက် ၇၆ နှစ်ရွယ် အဘွားကြီးက လွယ်လွယ်ကူကူနဲ့ ဖမ်းချုပ်နိုင်တာကတော့ သူဟာ အအိပ်အစားပျက်ပြီး ထမင်းမစားရတာ ၃ ရက်ရှိပြီမို့ ရုန်းကန်ရန်အားမရှိဘူးလို့ ဖြေဆိုပါတယ်။ သူဟာ ဘယ်ကလာလို့ ဘယ်ကိုသွားမလဲဆိုတာတော့ အတိအကျမဖြေဆိုဘဲ ကြောင်တောင်တောင်လို ဖြစ်နေတယ်လို့ ဆိုပါတယ်။ 

ဘန့်ဘိန်နယ်မြေရဲစခန်းကတော့ သူ့ကို သူတပါးနယ်မြေ ဝင်ရောက်ကျူးကျော်မှု၊ အချိန်မတော် သူများအခန်းထဲ ခိုးဝင်မှု၊ အမျိုးသမီးအား အဓမ္မပြုကျင့်ဖို့ ကြိုးစားမှု စတဲ့ပုဒ်မတွေနဲ့ အမှုဖွင့်ထားတယ်လို့ သတင်းမှာ ဖော်ပြသွားပါတယ်။

မြန်မာ-ထိုင်းနယ်စပ်၊ မြန်မာနိုင်ငံဘက်ခြမ်း မြဝတီမြို့က ကာစီနိုလောင်းကစားရုံတခုထဲမှာ ပြည့်တန်ဆာအဖြစ် အဓမ္မစေခိုင်းခံနေရတဲ့ ထိုင်းအမျိုးသမီး ၃၀၀ လောက်ရှိနေတယ်လို့ အဲဒီကနေ ထွက်ပြေးလွတ်မြောက်လာတဲ့ အသက် ၂၅ နှစ်အရွယ် ထိုင်းအမျိုးသမီးက ပြောပါတယ်။

အခြေအနေအရ အမည်မဖော်လိုတဲ့ အဆိုပါ အမျိုးသမီးက သူကြုံတွေ့ခဲ့ရတဲ့ အခြေအနေတွေနဲ့ ပတ်သက်ပြီးတော့ ထိုင်းတော်ဝင်ရဲတပ်ဖွဲ့ကို ဧပြီ ၂၈ ရက်မှာ တိုင်ကြားခဲ့ချိန် ခုလိုပြောလိုက်တာပါ။

အခုနှစ်အစောပိုင်းတုန်းက အင်တာနက်နာမည်ကျော်တယောက်က အွန်လိုင်းကနေ တိုက်ရိုက်ထုတ်လွှင့်တဲ့ အစီအစဉ်တခု ပြုလုပ်ခဲ့ပြီး အိမ်နီးချင်းနိုင်ငံ နယ်စပ်ဒေသမှာ ပြည်သူ့ဆက်ဆံရေးနဲ့ ဖျော်ဖြေရေးဆိုင်ရာ အလုပ်အကိုင်တွေအတွက် လျှောက်ထားနိုင်ဖို့ အမျိုးသမီးတွေကို ဖိတ်ခေါ်ခဲ့ကြောင်းနဲ့ အဆိုပါအလုပ်တွေဟာ လိင်ပိုင်းဆိုင်ရာ ဝန်ဆောင်မှုတွေနဲ့ မပတ်သက်ကြောင်းလည်း သူက အခိုင်အမာပြောဆိုခဲ့တယ်လို့ ဆိုပါတယ်။

အမျိုးသမီးအနေနဲ့ အဲဒီအလုပ်ကို လက်ခံခဲ့ပြီး မြဝတီမြို့က ကာစီနိုရုံကို ရောက်ရှိသွားချိန်မှာတော့ ပြည့်တန်ဆာအဖြစ် မလုပ်ဘူးဆိုရင် ဘတ်ငွေ ၂၅၀၀၀ ပြန်ပေးရမယ်လို့ အဲဒီက ဝန်ထမ်းက ပြောခဲ့တယ်လို့ဆိုပြီး အဲဒီအခြေအနေမှာ ထိုင်းအမျိုးသမီး ၃၀၀ လောက် ကာစီနိုရုံထဲမှာ ပိတ်မိနေကြောင်း အမျိုးသမီးက ပြောပါတယ်။

ပြီးခဲ့တဲ့ ဧပြီ ၂၇ ရက်ညမှာတော့ ထိုင်း-မြန်မာနယ်စပ် မြန်မာနိုင်ငံ၊ မြဝတီဘက်ခြမ်းမှာ ပြည့်တန်ဆာအဖြစ် လူကုန်ကူးခံရပြီး ပိတ်လှောင်ခံနေရတဲ့ ထိုင်းမိန်းကလေး ၂ ယောက်ဟာ သောင်ရင်းမြစ်ကိုလက်ပစ်ကူးပြီး ထိုင်းနိုင်ငံ မဲဆောက်ဘက်ကို ပြန်ရောက်လာတယ်လို့ ထိုင်းသတင်းတွေမှာ ဖော်ပြပါတယ်။

အဆိုပါမိန်းကလေးတွေဟာ ထိုင်းနယ်စပ်နဲ့ မီတာ ၄၀၀ အကွာရှိ နေအိမ်တလုံးမှာ အလှောင်ခံနေရတာဖြစ်ပြီး ပြည့်တန်ဆာအဖြစ် အတင်းစေခိုင်းခံရတာကြောင့် ထိုင်းလွှတ်တော်အမတ်ရဲ့ လက်ထောက် နိုင်းဧကဖုပ်ရိုင့်ပရဆစ်ကို လူမှုကွန်ရက်ကနေတဆင့် တိုင်ကြားခဲ့တယ်လို့ဆိုပါတယ်။

နိုင်းဧကဖုပ်လည်း မဲဆောက်ကိုလာရောက်ပြီး ထိုင်းနယ်ခြားစောင့်တပ်ကို အကြောင်းကြားထားရာမှာ မြန်မာစစ်တပ်ကင်းစောင့်အဖွဲ့ ဂျူတီချိန် အလဲအလှယ်လုပ်စဉ် မိန်းကလေး ၂ ယောက်က ထွက်ပြေးလာခဲ့ကြောင်း၊ သောင်ရင်းမြစ်နားရောက်တော့ အနောက်က ဓာတ်မီးတွေနဲ့ ထိုးပြီးလိုက်လာလို့ မြစ်ထဲ ခုန်ချကူးခတ်ခဲ့ကာ ထိုင်းစစ်သားတွေကို လှမ်းအော်ပြီးအကူအညီတောင်းခဲ့ကာ လွတ်မြောက်လာခဲ့တာလို့ သိရပါတယ်။

ဒီကနေ့မနက်မှာတော့ နိုင်းဧကဖုပ်က သူတို့ ၂ ယောက်လုံးကို ဘန်ကောက်ကို ပြန်ခေါ်လာခဲ့ပြီး ကာစီနို လောင်းကစားရုံမှာ ကျန်ရှိနေသေးတဲ့ အမျိုးသမီးတွေကို ကယ်တင်နိုင်ဖို့ ဆက်လက်ပြီးတော့လုပ်ဆောင်သွားမယ်လို့ ဆိုပါတယ်။