မကွေးတိုင်း၊ ထီးလင်းမြို့နယ်အခြေစိုက်၊ PDFထီးလင်းတပ်ဖွဲ့က အခြေခံစစ်ပညာသင်တန်း အပတ်စဉ် ၅ သင်တန်းဆင်းပွဲကို ဩဂုတ် ၇ ရက်နေ့က ကျင်းပခဲ့တယ်လို့ ထီးလင်း PDF ရဲ့ တာဝန်ခံက ပြောပါတယ်။
အဆိုပါသင်တန်းမှာ တပ်သား ၂၁ ယောက် သင်ကြားပို့ချနိုင်ခဲ့ပြီး သင်တန်းဆင်းပွဲအခမ်းအနားကို သက်ဆိုင်ရာ အုပ်ချုပ်ရေးပိုင်း တာဝန်ရှိသူတွေနဲ့ ထီးလင်းပြည်သူ့ကာကွယ်ရေးတပ်ဖွဲ့ရဲ့ တပ်ရင်းမှူးတွေ၊ တပ်ခွဲမှူးတွေ တက်ရောက်ခဲ့ကြတယ်လို့ ဆိုပါတယ်။
သင်တန်းဆင်းပွဲ အခမ်းအနားမှာ (ပ.က.ဖ)၊ (ပ.အ.ဖ) တာဝန်ရှိတွေက သင်တန်းဆင်း ရဲဘော်တွေအတွက် ဂုဏ်ယူဝမ်းမြောက်ကြောင်း အမှာစကားပြောကြားပြီး ထီးလင်း PDF တပ်ရင်းမှူးတွေက ရဲဘော်ကျင့်ဝတ် စည်းကမ်းတွေ လိုက်နာကျင့်သုံးဖို့၊ စည်းလုံးညီညွတ်မှုရှိဖို့နဲ့ တာဝန်ထမ်းဆောင်ချိန်မှာ အမိန့်နာခံတတ်မှုရှိစေဖို့ ပြောကြားခဲ့တယ်လို့ သိရပါတယ်။
အခြေအနေ အခက်အခဲတွေကြောင့် သင်တန်းဆင်းပွဲအား မိဘတွေကို ဖိတ်ခွင့်မပြုဘဲ တာဝန်ရှိသူအနည်းငယ်နဲ့ တောတွင်းတနေရာမှာ ကျင်းပခဲ့ရတဲ့အပေါ် အပတ်စဥ် ၅ သင်တန်းသားတွေ နားလည်ပေးကြဖို့လည်း ထီးလင်း PDF က မေတ္တာရပ်ခံထားပါတယ်။
လတ်တလောမှာတော့ ထီးလင်းမြို့နယ်အတွင်းမှာ စစ်ကောင်စီတပ်ဖွဲ့နဲ့ ဒေသခံ PDF တပ်တွေအကြား တိုက်ပွဲတွေ မကြာခဏဖြစ်ပွားနေပါတယ်။
ဆက်သွယ်ရေးကုမ္ပဏီတွေဟာ သတိပေးချက်ကိုလိုက်နာမှုမရှိတဲ့အပြင် ပြည်သူ့မျက်နှာ မကြည့်ဘဲ စစ်ကောင်စီအလိုကျ ပြည်သူတွေကို အင်တာနက်နဲ့ ဖုန်းလိုင်းတွေဖြတ်တောက်ထားတဲ့အတွက် မကွေးတိုင်း၊ ထီးလင်းမြို့နယ်မှာ ဇွန် ၁၈ ရက်က MPT တာဝါတိုင်တတိုင်ကို ဖြိုချဖျက်ဆီးလိုက်တယ်လို့ ထီးလင်း PDF က ပြောပါတယ်။
ထီးလင်းပြည်သူ့ကာကွယ်ရေးတပ်ဖွဲ့ဝင်တဦးက "ကျနော်တို့ ထီးလင်းနယ်မှာ အင်တာနက်လိုင်း ဖြတ်ခံရတာ ၈ လကျော်ပြီ။ ဒေသခံတွေ အခက်အခဲတွေဖြစ်ကြတယ်။ ငွေလွှဲဝန်ဆောင်မှုတွေရော သတင်းအချက်အလက်တွေမသိကြရတာ။ ဒါကြောင့်မို့ ဆက်သွယ်ရေးကုမ္ပဏီတွေအနေနဲ့ အင်တာနက်လိုင်းတွေ ပြန်လည်ဖွင့်ပေးဖို့ သတိပေးခဲ့တယ်။ သူတို့ကလိုက်နာခြင်းမရှိဘူး။ စစ်ကောင်စီတပ်တွေ စစ်ကြောင်းရှိတဲ့ အခါဆိုရင် ဖုန်းလိုင်းတွေဖြတ်တယ်။"လို့ ပြောပါတယ်
တောင်းဆိုချက်ကို မလိုက်နာတဲ့ ထီးလင်းမြို့နယ်တွင်းရှိ ကျန်ရှိနေသေးတဲ့ ဆက်သွယ်ရေး တာဝါတိုင်းတွေအားလုံးကို တစ်စစီဖြိုချကာ တော်လှန်ရေးအတွက်အသုံးချသွားမယ်လို့ PDF ထီးလင်းက ပြောပါတယ်။
ထီးလင်းမြို့နယ်မှာ စစ်တပ်အာဏာသိမ်းပြီးကတည်းက အင်တာနက်ကိုအချိန် အကန့်အသတ်နဲ့ပဲ ရရှိကာ စက်တင်ဘာလဆန်းကစလို့ အင်တာနက်လုံးဝ ဖြတ်တောက်ခြင်းခံခဲ့ရပါတယ်။
ထီးလင်းမြို့နယ် ဧရိယာ ၅၀ ရာခိုင်နှုန်းလောက်သာ ပုံမှန်ဖုန်းလိုင်းရရှိပြီး စစ်ကြောင်းတွေထိုးတဲ့အချိန်တိုင်း ဖုန်းလိုင်းတွေ ဖြတ်တောက်ခံရပြီး ပြည်သူအများသတင်းမရရှိဘဲ အခက်အခဲကြုံနေကြရပါတယ်။
ဆက်သွယ်ရေးကုမ္ပဏီတွေအနေနဲ့ ပြည်သူ့မျက်နှာ မကြည့်ဘဲ စစ်ကောင်စီအလိုကျ အင်တာနက်နဲ့ ဖုန်းလိုင်းဖြတ်တောက်နေတာတွေကို ချက်ချင်းရပ်တန့်ပြီး ထီးလင်းတမြို့နယ်လုံးမှာ အင်တာနက်ပြန်ဖွင့်ပေးဖို့ PDFထီးလင်းက မေလ ၁၂ ရက်မှာ သတိပေး တောင်းဆိုခဲ့ပါတယ်။
