အမေရိကန်နဲ့ တောင်ကိုရီးယားတို့ဆီက ခြိမ်းခြောက်မှုတွေကို တန်ပြန်ဖို့ ထောက်လှမ်းရေးဂြိုဟ်တုကို ဦးစားပေးလုပ်ဆောင်ဖို့ စီစဉ်ထားတဲ့အတိုင်း ပထမဆုံး သူလျှိုဂြိုဟ်တုကို လွှတ်တင်ဖို့ မြောက်ကိုရီးယားခေါင်းဆောင် ကင်မ်ဂျုံအန်းက တာဝန်ရှိသူတွေကို အမိန့်ပေးခဲ့တယ်လို့ နိုင်ငံပိုင်မီဒီယာက ဧပြီ ၁၉ ရက်မှာ ဖော်ပြပါတယ်။
ဧပြီ ၁၈ ရက်က ပြုံယမ်းမြို့တော် အမျိုးသားလေကြောင်းဆိုင်ရာ ဖွံ့ဖြိုးတိုးတက်ရေးနဲ့ စီမံခန့်ခွဲရေးဌာနဆီ သွားရောက်လည်ပတ်ချိန်မှာ ကင်မ်ဂျုံအန်းက ဂြိုဟ်တုကို စီစဉ်ထားတဲ့အတိုင်း ဖြန့်ကျက်ဖို့ တိုက်တွန်းခဲ့တာပါ။
နိုင်ငံရဲ့ ထောက်လှမ်းရေးစွမ်းရည်ကို မြှင့်တင်ဖို့ မတူညီတဲ့ ပတ်လမ်းတွေမှာ ကင်းထောက်ဂြိုဟ်တု အများအပြားကို လွှတ်တင်ဖို့ အမိန့်ပေးခဲ့တယ်လို့ နိုင်ငံပိုင်သတင်းဌာန KCNA က ပြောပါတယ်။
မြောက်ကိုရီးယားအစိုးရပိုင် ရုပ်မြင်သံကြား KRT ကတော့ သမီးနဲ့အတူရှိနေတဲ့ ကင်မ်ဂျုံအန်းက ဂြိုဟ်တုဖြစ်ပုံရတဲ့ မှုန်ဝါးဝါးအရာတခုရှေ့မှာ တာဝန်ရှိသူတွေနဲ့ စကားပြောဆိုနေတဲ့ ဓာတ်ပုံတွေကို ထုတ်ပြန်ခဲ့ပါတယ်။
မြောက်ကိုရီးယားဟာ ဒီဇင်ဘာလတုန်းက သူလျှိုဂြိုဟ်တုအတွက် အရေးကြီးတဲ့ နောက်ဆုံးအဆင့်ကို စမ်းသပ်ခဲ့တယ်လို့ ပြောပါတယ်။ ဧပြီလမှာ လွှတ်တင်ဖို့ ပြင်ဆင်တာတွေ အပြီးသတ်မယ်လို့လည်း ပြောပါတယ်။
ဂြိုဟ်တုထုတ်လုပ်မှု ပြီးစီးသွားပြီလို့ KCNA က ပြောပေမဲ့ လွှတ်တင်မယ့်ရက်ကို အတိအကျ မဖော်ပြခဲ့ပါဘူး။
မြောက်ကိုရီးယားနိုင်ငံဟာ ထောက်လှမ်းရေးဂြိုဟ်တု တည်ဆောက်ရာမှာ အရေးကြီးတဲ့ နောက်ဆုံးအဆင့် စမ်းသပ်မှုကို ဒီဇင်ဘာ ၁၈ ရက်က စမ်းသပ်ခဲ့တယ်လို့ နိုင်ငံပိုင်မီဒီယာ KCNA က ကြေညာပါတယ်။
မြောက်ကိုရီးယားအစိုးရရဲ့ အမျိုးသားအာကာသဖွံ့ဖြိုးတိုးတက်ရေး စီမံကွပ်ကဲမှု (NADA) က နိုင်ငံအနောက်မြောက်ပိုင်းမှာရှိတဲ့ ဆိုဟယ် ဂြိုဟ်တုလွှတ်တင်ရေးစခန်းမှာ စမ်းသပ်ခဲ့တာဖြစ်ပြီး ၂၀၂၃ ခုနှစ် ဧပြီလမှာ အပြီးသတ်ဖို့ ကြိုးပမ်းနေတယ်လို့ဆိုပါတယ်။
ဂြိုဟ်တုပုံရိပ်ဖော်မှု၊ ဒေတာထုတ်လွှင့်မှုနဲ့ မြေပြင်ထိန်းချုပ်မှု စနစ်တွေရဲ့ စွမ်းဆောင်ရည်ကို ပြန်သုံးသပ်ဖို့ စမ်းသပ်တာလို့ KCNA က ပြောပါတယ်။
အဖြူအမည်း ပုံရိပ်ပြတ်သားမှုနည်းတဲ့ တောင်ကိုရီးယားမြို့တော် ဆိုးလ်နဲ့ အနားက ဆိပ်ကမ်းမြို့ အင်ချုံတို့ရဲ့ ပုံရိပ်တွေကို တနင်္ဂနွေနေ့က လွှတ်တင်ချိန်မှာ ရိုက်ကူးခဲ့တယ်လို့လည်း KCNA က သတင်းထုတ်ပြန်ခဲ့ပါတယ်။
မြောက်ကိုရီးယားအစိုးရဟာ ဒုံးပျံလွှတ်တင်ချိန်မှာ ဂြိုဟ်တုစနစ်တွေကို စမ်းသပ်ခဲ့ပြီး ခေါင်းဆောင် ကင်မ်ဂျုံအန်းက သူ့ရဲ့ ထောက်လှမ်းရေးဂြိုဟ်တုကို ရအောင်ကြိုးစားတာဟာ အမေရိကန်နဲ့ မဟာမိတ်တွေရဲ့ စစ်ရေးလုပ်ဆောင်မှုတွေနဲ့ ပတ်သက်ပြီး အချိန်နဲ့တပြေးညီ သတင်းအချက်အလက်တွေ ပေးဖို့ ရည်ရွယ်ထားတယ်လို့ ပြောခဲ့ပါတယ်။
