စစ်ကိုင်းတိုင်း၊ ကသာခရိုင်၊ အင်းတော်မြို့မှ CDM ဆရာမအပါအဝင် အမျိုးသမီး ၃ ဦးကို ဧပြီ ၃ ရက်က အင်းတော် စစ်ခုံရုံးက ရာဇသတ်ကြီး ပုဒ်မ-၅၀ (ည)၊၅၂-(က) အမှုတွေနဲ့ စွပ်စွဲ အမှုဖွင့်အရေးယူကာ ထောင်ဒဏ် တသက်တကျွန်း ချမှတ်လိုက်တယ်လို့ နီးစပ်တဲ့ဒေသခံတွေထံက သိရပါတယ်။
အသက် ၄၀ ကျော်အရွယ် CDM ဆရာမ ဒေါ်သိန်းလှ၊ အရောင်းအဝယ်လုပ်ငန်းလုပ်တဲ့ဈေးသည် ဒေါ်ခင်ပြည့်ပြည့်ထွန်းနဲ့ ဒေါ်အေးအေးတို့ကို အင်းတော်စစ်ခုံရုံးကနေ ထောင်ဒဏ် တသက်တကျွန်း အမိန့်ချလိုက်တာလို့ Indaw Revolution-IR အဖွဲ့သတင်းနဲ့ ပြန်ကြားရေးတာဝန်ရှိသူက ပြောပါတယ်။
အဆိုပါ အမျိုးသမီး ၃ ဦးကို မတ်လ ၅ ရက်နေ့က PDF တွေကို ထောက်ပံ့တယ်လို့ စွပ်စွဲကာ စစ်တပ်က နေအိမ်ထဲဝင်ရောက်ဖမ်းဆီးခဲ့တာဖြစ်ပြီး ကသာထောင်မှာ အကျဉ်းချထားပါတယ်။
အင်းတော်ဒေသမှာ စစ်ခုံရုံးက ထောင်ဒဏ်တသက်တကျွန်းအမိန့်ချမှတ်ခံရသူ ဖေဖော်ဝါရီ ၂၇ ရက်က အမျိုးသား ၁ ဦး၊ ဧပြီ ၁ ရက်နေ့က အမျိုးသား ၁ ဦးနဲ့ ဧပြီ ၃ ရက်က အမျိုးသမီး ၃ ဦး အားလုံးပေါင်း ၅ ဦးထိရှိလာပြီဖြစ်တယ်လို့ IR အဖွဲ့ထုတ်ပြန်ချက်အရသိရပါတယ်။
စစ်ကိုင်းတိုင်း၊ ကသာခရိုင်၊ အင်းတော်မြို့ စစ်ခုံရုံးကနေ ဖေဖော်ဝါရီ ၂၇ ရက်နေ့မှာ ဒေသခံလူငယ်တယောက်ကို PDF လို့ စွပ်စွဲပြီး ထောင်ဒဏ်တသက်တကျွန်း အမိန့်ချလိုက်တယ်လို့ ဒေသခံတွေထံက သိရပါတယ်။
အသက် ၂၆ နှစ်အရွယ် ကိုမင်းမင်းဦး (ခ) ကိုလမင်းကို ပြီးခဲ့တဲ့ ဖေဖော်ဝါရီ ၈ ရက်နေ့က အင်းတော်စစ်ဆေးရေးဂိတ်မှာ ဖမ်းဆီးပြီး PDF လို့ စွပ်စွဲကာ ပုဒ်မ-၅၀(ည) နဲ့ စစ်ကောင်စီက အမှုဖွင့် အရေးယူထားတာပါ။
ဖေဖော်ဝါရီ ၂၇ ရက်နေ့မှာတော့ အင်းတော်မြို့ စစ်ခုံရုံးကနေ ထောင်ဒဏ်တသက်တကျွန်း ချမှတ်လိုက်တာလို့ အင်းတော်ဒေသခံ အမျိုးသားတဦးက ဒီဗွီဘီကို ပြောပါတယ်။
PDF လို့ စွပ်စွဲဖမ်းဆီးခံရသူ ကိုမင်းမင်းဦးဟာ အင်းတော်မြို့နယ် နဘားကျေးရွာအုပ်စု ကမ်းနီရွာသားဖြစ်ပြီး တောထဲမှာ မီးသွေးဖုတ်တဲ့အလုပ် လုပ်ကိုင်ကာ မိဘကို ရှာဖွေလုပ်ကိုင် ကျွေးနေသူ ဖြစ်ပါတယ်။
အင်းတော်မြို့နယ်မှာ စစ်အုပ်ချုပ်ရေး (Martial Law) ကြေညာပြီးနောက် စစ်ခုံရုံးကနေ ပုဒ်မ-၅၀ (ည) နဲ့ ထောင်ဒဏ်တသက်တကျွန်း အမိန့်ချခဲ့တာဖြစ်ပါတယ်။
