ဒဂုံတက္ကသိုလ်ကျောင်းသား ၇ ဦးကို  သေဒဏ်ချမှတ်တာနဲ့ပတ်သက်ပြီး ဆန့်ကျင်ကန့်ကွက်တဲ့ လှုပ်ရှားမှုတခု ထိုင်းနိုင်ငံ၊ ဘန်ကောက်မြို့အနီး ဆာလာရမြို့ရှိ  မဟီဒေါတက္ကသိုလ်မှာ ဒီဇင်ဘာ ၇ ရက်က ပြုလုပ်သွားပါတယ်။

ဒီလှုပ်ရှားမှုမှာ မြန်မာနိုင်ငံကနေ ကျောင်းလာတက်ကြတဲ့ ကျောင်းသားတွေတင်မက ထိုင်း၊ ၊ဂျပန်၊ ဖိလစ်ပိုင်၊ အိန္ဒိယ၊ ဗီယက်နန်၊ အင်ဒိနီးရှားနဲ့ နီပေါနိုင်ငံတို့က ကျောင်းသူကျောင်းသား တွေအပါအဝင်  အယောက် ၅၀ ကျော် လောက် က မြန်မာကျောင်းသားတွေနဲ့ တွဲပြီး ကျောင်းဝင်းထဲမှာ အတူတကွ ဆိုင်းဘုတ်တွေကိုင်ကာ တောင်းဆို ဆန္ဒထုတ်ဖော်ခဲ့ကြတာပါ။

ဒီလှုပ်ရှားမှုမှာပါဝင်သူတဦးက “မြန်မာစစ်ကောင်စီရဲ့ ဆိုးဝါးရက်စက်မှုတွေနဲ့ ကျောင်းသားတွေကို အခုလိုသေဒဏ်ပေးနေ တယ်ဆိုတာကို နိုင်ငံတကာ ကျောင်းသားတွေသိစေဖို့၊ နိုင်ငံတကာကသိစေဖို့ အတွက်အခုလို နေ့လယ်ပိုင်း၊ ထမင်းစားချိန်မှာလုပ်ကြတာပါ၊ ထမင်းစားချိန်ဆိုတော့ ကျောင်းသားအများစုလည်း ပါလို့ရတယ်လေ”လို့ ပြောပါတယ်။

ဆန္ဒပြပွဲဦးဆောင်သူတယောက်က “ကျောင်းအာဏာပိုင်ကတော့ ပထမပိုင်းမှာ စုရပ်လုပ်ထားတဲ့နေရာကိုလာပြီး ခွင့်ပြုမိန့်တင်ဖို့လာပြောတာလောက်တော့ရှိတယ်။ ဒါပေမဲ့ ဘာမှ နှောင့်ယှက်ဟန့်တားတာတော့မရှိပါဘူး။ အားလုံးက ပိုစတာတွေကိုင်ပြီး ငြိမ်သက်စွာနဲ့ပဲ တောင်းဆို ကြပြီးး ကျနော်တို့အထဲက တယောက်ကတော့ မိန့်ခွန်းပြောသလိုမျိုးလောက်ပဲ လုပ်ခဲ့ပြီး၊ အေးချမ်းစွာနဲ့ဆန္ဒပြသခဲ့ကြတာပါ၊ နောက် စစ်ကောင်စီက ရပ်တံ့မသွားဘူးဆိုရင်လည်း ဒီထက်ပိုပြီးထိရောက်အောင် UN နဲ့ နိုင်ငံတကာအဖွဲ့အစည်းတွေထိကိုပါ စာရေးပြီး ပို့ဖို့တွေအထိ ဆက်လုပ်သွားဖို့ အခုညှိနှိုင်းနေတယ်”လို့ ပြောပါတယ်။

အင်းစိန်ထောင်မှာ အကျဉ်းကျခံနေရတဲ့ ဒဂုံတက္ကသိုလ်ကျောင်းသားတွေဖြစ်တဲ့ ကိုခန့်ဇင်ဝင်း၊ ကိုသူရမောင်မောင်၊ ကိုဇော်လင်းနိုင်၊ ကိုသီဟထက်ဇော်၊ ကိုဟိန်းထက်၊ ကိုသက်ပိုင်ဦးနဲ့ ကိုခန့်လင်းမောင်မောင် ပြီးခဲ့တဲ့ နိုဝင်ဘာလ ၃ဝ ရက်နေ့မှာ စစ်ကောင်စီက  သေဒဏ်ချမှတ်ခဲ့တာပါ။

အခုလို ကျောင်းသားတွေကို သေဒဏ်ပေးတဲ့ကိစ္စနဲ့ ပတ်သက်ပြီး NUG အစိုးရ အပါအဝင် အဖွဲ့အစည်း အသီးသီးနဲ့ ပြည်တွင်းပြည်ပမှာ ဆန့်ကျင်ကန့်ကွက်နေကြသလို  လူမှုကွန်ရက်တွေ ပေါ်မှာလည်း သေဒဏ်ဆန့်ကျင်တဲ့ လှုပ်ရှားမှုတွေ ပြုလုပ်နေကြပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ထုတ်ပြန်တဲ့ စာရင်းတွေအရ သေဒဏ်ချမှတ်ခံရသူ စုစုပေါင်း ၁၃၀ ကျော် ရှိနေပြီး၊ လတ်တလော စစ်ကောင်စီက  ၈၈မျိုးဆက်ကျောင်းသားခေါင်းဆောင်ဦးဂျင်မီ၊ လွှတ်တော်ကိုယ်စားလှယ် ဦးဖြိုးဇေယျာသော်၊ ကိုလှမျိုးအောင်နဲ့ ကိုအောင်သူရဇော်တို့ကို ကြိုးပေးကွပ်မျက်ခဲ့ပါတယ်။

ဒဂုံတက္ကသိုလ်ကျောင်းသား ၇ ဦးအပါအဝင် ယုံကြည်ချက်ကြောင့် သေဒဏ်ချမှတ်ခံထားရတဲ့ ကျောင်းသားပြည်သူတွေနဲ့  အတူ တသားတည်းရပ်တည်ကြောင်း ပြသတဲ့အနေနဲ့ ဒီဇင်ဘာ ၇ ရက်မှာ အင်းလေးအမျိုးသမီးသမဂ္ဂအဖွဲ့ (IWU) က ဆန္ဒပြခဲ့ကြပါတယ်။

အာဏာသိမ်းစစ်ကောင်စီဟာ ပြီးခဲ့တဲ့ နိုဝင်ဘာ ၃၀ ရက်က ဒဂုံတက္ကသိုလ်ကျောင်းသား ၇ ဦးဖြစ်တဲ့ ကိုခန့်ဇင်ဝင်း၊ ကိုသူရမောင်မောင်၊ ကိုဇော်လင်းနိုင်၊ ကိုသီဟထက်ဇော်၊ ကိုဟိန်းထက်၊ ကိုသက်ပိုင်ဦး နဲ့ ကိုခန့်လင်းမောင်မောင် တို့ကို သေဒဏ်ချမှတ်ခဲ့တာပါ။

ဒဂုံတက္ကသိုလ်ကျောင်းသား ၇ ဦးအပါအဝင် ဒီမိုကရေစီအရေးအတွက်လှုပ်ရှားရင်း သေဒဏ်ချမှတ်ခံရတဲ့ ကျောင်းသားပြည်သူတွေနဲ့အတူ တသားတည်း ရပ်တည်ရင်း စစ်ကောင်စီရဲ့ အဓမ္မသေဒဏ်ချမှတ်နေမှု၊ စီရင်နေမှုတွေကို ပြင်းပြင်းထန်ထန် ရှုတ်ချတယ်လို့ အင်းလေးအမျိုးသမီးသမဂ္ဂအဖွဲ့ (IWU) က ပြောပါတယ်။

သေဒဏ်ချမှတ်တာ၊ စီရင်တာတွေဟာ လူ့အခွင့်ရေးစံနှုန်းအရ ဘယ်လိုမှ မကိုက်ညီသလို လူငယ်လူရွယ်ကျောင်းသားတွေကို စစ်အုပ်စုက အဓမ္မသေဒဏ်ချမှတ်နေတာဟာ သူတို့ကိုဆန့်ကျင်တဲ့ ဒီမိုကရေစီအရေးလှုပ်ရှားသူတွေကို အလုံးစုံပျက်သုဉ်းတဲ့အထိ လက်စားချေမယ်ဆိုတဲ့ စစ်အုပ်စုရဲ့ ယုတ်မာရိုင်းစိုင်းတဲ့ ဖက်ဆစ်သရုပ်ဖြစ်တယ်လို့လည်း ဆိုပါတယ်။

ကျောင်းသားပြည်သူတွေအနေနဲ့လည်း စစ်အုပ်စုရဲ့လုပ်ရပ်ကို ခြွင်းချက်မရှိဆန့်ကျင်ပြီး သေဒဏ်ချမှတ်ခံထားရတဲ့ ကျောင်းသားပြည်သူတွေနဲ့ တသားတည်းရပ်တည်ပေးကြဖို့ IWU က တိုက်တွန်းထားပါတယ်။

မြန်မာနိုင်ငံမှာ သေဒဏ်ချမှတ်ခံထားရသူ ၁၃၀  ကျော်ရှိတဲ့ထဲက ၈၈မျိုးဆက် ကျောင်းသားခေါင်းဆောင် ဦးဂျင်မီနဲ့ လွှတ်တော်အမတ်ဟောင်း ဦးဖြိုးဇေယျာသော်တို့အပါအဝင် ဒီမိုကရေစီရေး လှုပ်ရှားသူ ၄ ဦးကို စစ်ကောင်စီက  စီရင်ကွပ်မျက်ခဲ့ပြီး ဖြစ်ပါတယ်။

ဒဂုံတက္ကသိုလ်ကျောင်းသား ၇ ယောက်ကို စစ်ကောင်စီက သေဒဏ်ချမှတ်ထားတဲ့အပေါ် ချင်းမိုင်တက္ကသိုလ် ကျောင်းသားကျောင်းသူများ အဖွဲ့အစည်းက ကုလသမဂ္ဂ အကြီးအကဲ၊ ၊ ထိုင်းဝန်ကြီးချုပ်၊ အမေရိကန် သံအမတ်နဲ့  နိုင်ငံတကာအဖွဲ့အစည်းတွေထံ အိတ်ဖွင့်ပေးစာ ပေးပို့လိုက်ပါတယ်။

မနေ့ကရက်စွဲနဲ့ ပေးပို့လိုက်တဲ့စာမှာ မြန်မာစစ်တပ်ရဲ့ အာဏာအလွဲသုံးစားလုပ်ပြီး နိုင်ငံသားတွေအပေါ် ရက်ရက်စက်စက်သတ်နေတာကို ကျောင်းသားတွေ၊ လူသားတွေအနေနဲ့ စိတ်မချမ်းမြေ့နိုင်ဘူးလို့ ဖော်ပြထားပါတယ်။

အဲ့ဒီအိတ်ဖွင့်ပေးစာကို ကုလသမဂ္ဂအတွင်းရေးမှူးချုပ်  ဂူတာရပ်စ် ၊ ထိုင်းနိုင်ငံဆိုင်ရာ အမေရိကန်သံအမတ်၊ ထိုင်းနိုင်ငံဆိုင်ရာ မြန်မာသံအမတ်၊ ထိုင်းဝန်ကြီးချုပ် ပရာရွတ်၊ အာဆီယံအတွင်းရေးမှူးချုပ်၊ အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ကြီးရဲ့ အထွေထွအတွင်းရေးမှူးချုပ်၊ မဟီဒေါတက္ကသိုလ် လူ့အခွင့်အရေးနဲ့ ငြိမ်းချမ်းရေး လေ့လာမှုဌာန  ဒါရိုက်တာတို့ဆီကို လိပ်မူထားပါတယ်။

သေဒဏ်ပေးတာကို တချို့အခြေအနေတွေမှာ ဆောင်ရွက်နိုင်ပေမယ့် အခုအချိန်မှာ လူသားတွေရဲ့ အသက်ဟာ အရေးပါပြီး နိုင်ငံရေးသဘောထား ကွဲလွဲတာတွေကြောင့် မစတေးသင့်ဘူးလို့ ဆိုပါတယ်။

ပြီးတော့ စစ်ကောင်စီ လက်အောက်မှာ ရှိတဲ့ တရားရုံးတွေကနေ တက္ကသိုလ်ကျောင်းသား ၇ ယောက်အပေါ် သေဒဏ်ချမှတ်တာနဲ့ နိုင်ငံရေးတက်ကြွလှုပ်ရှားမှုတွေကြောင့် သေဒဏ်ချမှတ်ခံထားရတဲ့ တခြားသူတွေကိုလည်း သေဒဏ်ပေးတာကနေ ကင်းဝေးစေဖို့ နိုင်ငံတကာအဖွဲ့အစည်းတွေ စုပေါင်းဖိအားပေးဖို့ ၊ နိုင်ငံရေးအကျဥ်းသားတွေအားလုံးကို လွှတ်ပေးဖို့ သူတို့က တောင်းဆိုထားပါတယ်။

ဒါ့အပြင် တရားစီရင်ရေး ကိစ္စတွေ ပွင့်လင်းမြင်သာမှုရှိစေဖို့ ခုံရုံးတွေဟာ အကျဉ်းထောင်တွေမှာ၊ စစ်တန်းလျားမှာ မလုပ်ဖို့ကိုလည်း တောင်းဆိုပါတယ်။

မြန်မာစစ်ကောင်စီကို စစ်ရေးဆိုင်ရာ၊ စီးပွားရေးဆိုင်ရာ ရပ်တန့်ဖို့၊ နိုင်ငံတကာအဖွဲ့အစည်းတွေအ နေနဲ့ လူသားချင်းဆိုင်ရာ စာနာထောက်ထားမှု အကူအညီတွေ ပေးပို့ရာမှာ စစ်ကောင်စီဆီက တဆင့်မဟုတ်ဘဲ မြန်မာပြည်သူတွေဆီ တိုက်ရိုက်ရောက်စေဖို့ သေချာစေအောင်လည်း သူတို့က တောင်းဆိုပါတယ်။

သေဒဏ်ချမှတ်တာဟာ လူ့အခွင့်အရေးကို ချိုးဖောက်တာဖြစ်လို့ နိုင်ငံတွေမှာ သေဒဏ်ချမှတ်တာ အမြစ်ပြတ်စေဖို့ကိုလည်း တောင်းဆိုပါတယ်။

ဒဂုံတက္ကသိုလ်ကျောင်းသား ၇ ဦး သေဒဏ်ချခံရမှုအပေါ် ထိုင်းနိုင်ငံရောက် မြန်မာအဖွဲ့အစည်းတွေနဲ့ ချင်းမိုင်တက္ကသိုလ်ကျောင်းသားတွေ ပူးပေါင်းဆန့်ကျင်ဆန္ဒပြပွဲနဲ့ သရုပ်ပြပွဲတခုကို ထိုင်းနိုင်ငံ၊ ချင်းမိုင်မြို့က ဘုရင်သုံးပါးရုပ်တုရှေ့မှာလည်း  ဒီဇင်ဘာ ၆ ရက် ည‌နေက ပြုလုပ်ခဲ့ပါတယ်။

ယုံကြည်ချက်ကြောင့် သေဒဏ်ကျခံရတဲ့ မြန်မာကျောင်းသာားတွေနဲ့ အတူရပ်တည်ကြောင်း နီပေါကျောင်းသားသမဂ္ဂရဲ့ ကျောင်းသားတွေကလည်း ထုတ်ဖော် ဆန္ဒပြခဲ့ကြတယ်လို့ သိရပါတယ်။

သေဒဏ်ချခံထားရတဲ့ ဒဂုံတက္ကသိုလ်ကျောင်းသား ၇ ဦး အပါအဝင် မြန်မာ လူငယ် ၁၂ ဦးကို အင်းစိန်ထောင်တွင်းမှာ ဒီဇင်ဘာ ၇ ရက် ဒီကနေ့ ကွပ်မျက်မယ်လို့ သတင်းထွက်ပေါ်နေတာ ဖြစ်ပါတယ်။