ဒဂုံတက္ကသိုလ်က ကျောင်းသား ၇ ဦးကို သေဒဏ်ချမယ်လို့ သတင်းတွေထွက်ပေါ်ခဲ့ပြီးနောက် ဒီဇင်ဘာ ၇ ရက်နေ့ ညနေပိုင်းမှာ စစ်ကောင်စီက လုံခြုံရေးတိုးမြှင့်ထားတယ်လို့ ပညာရေးအသိုင်းအဝိုင်းက သိရပါတယ်။
နေ့လယ်ပိုင်းက ဒဂုံတက္ကသိုလ်ကျောင်းဝင်းအတွင်းကို စစ်ကောင်စီတပ်ဖွဲ့ဝင်တွေ ရောက်လာပြီး ကျောင်းသားကျောင်းသူတွေကို အိမ်ပြန်ခိုင်းကာ ကျောင်းနဲ့အနီးတဝိုက်မှာ စောင့်ကြပ်နေတယ်လို့ ကျောင်းသားတဦးက ပြောပါတယ်။
"ကျောင်းသားတွေရော ကျောင်းသူတွေရော အကုန်ပြန်ခိုင်းတာ၊ တံခါးတွေအကုန်လိုက်ပိတ်တာ။ မနက်ဖြန်တောင် ကျောင်းပိတ်မလားတောင် မသိဘူး၊ အခြေအနေမကောင်းဘူး။"
အင်းစိန်အကျဥ်းထောင်မှာ ဒီဇင်ဘာ ၇ ရက်က ဒဂုံတက္ကသိုလ်မှ ကျောင်းသား ၇ ဦးကို သေဒဏ်ပေးတာမရှိဘူးလို့ အကျဥ်းဦးစီးဌာနနဲ့နီးစပ်သူတဦးက ဒီဗွီဘီကို ပြောပါတယ်။
"ဒီနေ့ ထောင်ထဲမှာ ကျနော်သိသလောက် သေဒဏ်ပေးတာမရှိဘူး၊ သေချာအောင်လိုက်မေးကြည့်သေးတယ်၊ သေဒဏ်ပေးတဲ့သူမရှိဘူး။"
အင်းစိန်အကျဥ်းထောင်ရှိ အထူးတရားရုံကနေ နိုဝင်ဘာ ၃၀ ရက်က ပုဒ်မ ၃၀၂ နဲ့ ဒဂုံတက္ကသိုလ်က ကျောင်းသားတွေဖြစ်တဲ့ မောင်ခန့်ဇင်ဝင်း၊ မောင်သူရမောင်မောင်၊ မောင်ဇော်လင်းနိုင်၊ မောင်သီဟထက်ဇော်၊ မောင်ဟိန်းထက်၊ မောင်သက်ပိုင်ဦး၊ မောင်ခန့်လင်းမောင်မောင် တို့ကိုသေဒဏ်ပေးခဲ့တာ ဖြစ်ပါတယ်။
ကျောင်းသား ၇ ဦးကို ဒီနှစ် ဧပြီ ၁၈ ရက်က ကမ္ဘာ့ရတနာဘဏ် (တောင်ဒဂုံဘဏ်ခွဲ) မန်နေဂျာ ဒုတိယဗိုလ်မှူးကြီးဟောင်း စောမိုးဝင်း ကို သတ်ဖြတ်ရာမှာ ပါဝင်တယ်ဆိုပြီး စွပ်စွဲချက်နဲ့ စစ်ကောင်စီတပ်က ဖမ်းဆီးခဲ့တာဖြစ်ပါတယ်။
PHOTO- DAGON UNIVERSITY INFO
ဒဂုံတက္ကသိုလ် စိတ်ပညာအထူးပြုကျောင်းသား ကိုထူးဝေလင်းကို အကြမ်းဖက်စစ်ကောင်စီက စက်တင်ဘာ ၁၆ ရက် ဒီကနေ့မှာ ထောင်ဒဏ် ၁၃ နှစ်ချမှတ်လိုက်တယ်လို့ သိရပါတယ်။
ကိုထူးဝေလင်းဟာ စစ်အာဏာရှင်စနစ် ဆန့်ကျင်မှုကြောင့် ၂၀၂၁ ခုနှစ် ဇွန် ၅ ရက်ကတည်းက ဖမ်းဆီးခံထားရပြီး ၁ နှစ်ကျော်တရားရင်ဆိုင်ခဲ့ရတာဖြစ်တယ်လို့ ကျောင်းသားအခွင့်အရေးအတွက် ရပ်တည်ဆောင်ရွက်နေတဲ့ ဒဂုံတက္ကသိုလ်ကျောင်းသားကျောင်းသူများအသင်း Future The DAGON က ထုတ်ပြန်ပါတယ်။
အကြမ်းဖက်စစ်ကောင်စီဟာ တိုင်းပြည်အာဏာကို မတရားသိမ်းယူပြီးချိန်ကတည်းက နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်တို့ အပါအဝင် စစ်အာဏာရှင်စနစ်ကို ဆန့်ကျင်တော်လှန်သူတွေအားလုံးကို မတရားပုဒ်မတပ် ဖမ်းဆီးအရေးယူ ထောင်ချတာတွေ၊ ညှဉ်းပန်းနှိပ်စက်တာ၊ နိုင်ငံတဝန်း မင်းမဲ့စရိုက်ဆန်ဆန် ရွာလုံးကျွတ် မီးရှို့ဖျက်ဆီးတာ၊ ပစ်ခတ်နှိမ်နင်းတာတွေကို ဆက်တိုက် လုပ်ဆောင်လာနေခဲ့တာပါ။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်အရ မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၂၇၆ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၅၄၀ ယောက်ထိရှိပြီလို့ ဆိုပါတယ်။
ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ စက်တင်ဘာ ၁၅ ရက်အထိ အေအေပီပီက ကောက်ယူမှတ်တမ်း ပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။
နွေဦးတော်လှန်ရေးကာလအတွင်း ဒီနေ့အထိ ၁၂,၄၀၆ ယောက် လက်ရှိ ချုပ်နှောင်ခံထားရဆဲ ဖြစ်ပြီး အဲဒီထဲက ၁,၄၇၂ ယောက်ကတော့ ထောင်ဒဏ် ချမှတ်ခံထားရပါတယ်။
တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေတွက်ကတော့ ၈၄ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ် ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၂၆ ယောက် ရှိလာခဲ့ပြီ ဖြစ်ပါတယ်။
လတ်တလောအချိန်ထိ အာမခံနဲ့ လွတ်မြောက်သူ ၂၂ ယောက်ရှိပြီး ပြန်လည်လွတ်မြောက်လာသူ ဦးရေကတော့ ၃,၁၁၂ ယောက် ရှိခဲ့တယ်လို့ ဆိုပါတယ်။
