မြန်မာစစ်တပ်အတွက် လက်နက်နဲ့ လေယာဉ်အစိတ်အပိုင်းတွေ အထောက်အပံ့ပေးရာမှာ တာဝန်ရှိတဲ့ ကုမ္ပဏီတွေကို ယူကေအစိုးရက ထပ်တိုးပိတ်ဆို့အရေးယူမှု အသစ်တွေ ချမှတ်လိုက်တဲ့အပေါ် အမေရိကန်နိုင်ငံခြားရေးဝန်ကြီး အန်တိုနီဘလင်ကန်က ချီးကျူးကြောင်း ထုတ်ပြန်လိုက်ပါတယ်။
ယူကရိန်းအပေါ် ရုရှားရဲ့ ကျူးကျော်ရန်စမှုကို ထောက်ခံအားပေးတဲ့ လူပုဂ္ဂိုလ်အဖွဲ့အစည်းတွေနဲ့အတူ မြန်မာပြည်သူတွေအပေါ် မြန်မာစစ်အာဏာရှင် အဖွဲ့အစည်းက ကြမ်းကြုတ်ရက်စက်တဲ့ အကြမ်းဖက်မှုတွေ ပြုလုပ်နိုင်စေဖို့ အထောက်အပံ့ပြုနေတဲ့ ကုမ္ပဏီတွေကို ဒဏ်ခတ်ပိတ်ဆို့ အရေးယူမှုအကြောင်း ယူနိုက်တက်ကင်းဒမ်းရဲ့ ယနေ့ထုတ်ပြန်ချက်ကို ချီးကျူးတယ်လို့ ဝန်ကြီး ဘလင်ကန်က ပြောပါတယ်။
မြန်မာစစ်တပ်က အရပ်သားပြည်သူတွေကို ပစ်မှတ်ထားပြီး လေကြောင်းတိုက်ခိုက်တာ အပါအဝင် ကျယ်ပြန့်တဲ့ ရက်စက်ကြမ်းကြုတ်မှုတွေကို စနစ်တကျ ကျူးလွန်နေကြောင်း အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ Amnesty International က သိပ်မကြာခင်က ထုတ်ပြန်တဲ့ အစီရင်ခံစာအပြီးမှာ အဆိုပါ ဒဏ်ခတ်အရေးယူမှုကို ယူကေအစိုးရက ထုတ်ပြန်လိုက်တာပါ။
စစ်အာဏာရှင်ကို ကန့်သတ်တာနဲ့ ရုရှားသမ္မတ ပူတင်ရဲ့ စစ်ယန္တရားဆီ စီးဆင်းသွားနိုင်တဲ့ ဝင်ငွေကို ပစ်မှတ်ထားကာ မြန်မာနဲ့ ရုရှားနိုင်ငံရှိ လက်နက်ကုမ္ပဏီကြီးတွေရဲ့ ပိုင်ဆိုင်မှုတွေကိုလည်း တင်းတင်းကျပ်ကျပ် ထိန်းချုပ်သွားမယ်လို့ ဆိုပါတယ်။
ဒဏ်ခတ်ပိတ်ဆို့အရေးယူခံရတဲ့ မြန်မာကုမ္ပဏီတွေကတော့ Synpex Shwe Company Ltd၊ Myanmar New Era Trading Company Ltd နဲ့ Sky Aviator Company Ltd တို့ဖြစ်ပြီး အဆိုပါကုမ္ပဏီ ၃ ခုလုံးဟာ အာဏာသိမ်းပြီးချိန်ကစတင်ကာ အကြမ်းဖက်စစ်ကောင်စီတပ်ကို လေယာဉ်အစိတ်အပိုင်းတွေ ထောက်ပံ့တာတွေနဲ့ ပြုပြင်ထိန်းသိမ်းရေး လုပ်ငန်းတွေမှာ ပါဝင်ပတ်သက်ခဲ့တယ်လို့ ဖော်ပြထားပါတယ်။
ဒါ့အပြင် ယူကေအစိုးရက မြန်မာစစ်တပ်အတွက် လက်နက်နဲ့ လေယာဥ်အစိတ်အပိုင်းတွေ ထောက်ပံ့ရာမှာ ပါဝင်ပတ်သက်နေတဲ့ ရုရှားကုမ္ပဏီ ၃ ခုကိုလည်း အရေးယူ ပိတ်ဆို့တာတွေအပြင် ပူတင်ရဲ့ မဟာမိတ်တွေကို ပစ်မှတ်ထားကာ ပိုမိုကျယ်ပြန့်တဲ့ ဒဏ်ခတ်အရေးယူမှုတွေလည်း ပါဝင်တယ်လို့ ဆိုပါတယ်။
အာဖဂန်နစ္စတန်နိုင်ငံအပေါ် ဒဏ်ခတ်ပိတ်ဆို့မှုတွေနဲ့ အလှူရှင်တွေက အလှူရပ်တန့်လိုက်တာတွေဟာ အခြေခံဝန်ဆောင်မှုတွေကို ဖြတ်တောက်လိုက်သလို ဖြစ်နေမှာ စိုးရိမ်တယ်လို့ ကြက်ခြေနီအသင်းအရာရှိတယောက်က နိုဝင်ဘာ ၂၂ ရက်မှာ ပြောပါတယ်။
အလှူရှင်တွေအနေနဲ့ ကြီးမားတဲ့ လူသားချင်းစာနာမှု အကျပ်အတည်းကို ဟန့်တားဖို့ ဆန်းသစ်တဲ့ နည်းလမ်းတွေကို ရှာသင့်တယ်လို့လည်း သူက ဆော်ဩလိုက်ပါတယ်။
ကျန်းမာရေးဝန်ဆောင်မှုတွေ ပြိုလဲတာကို ဟန့်တားဖို့၊ လစ်ဟာချက်တွေကို ဖြည့်ဆည်းရာမှာ ကူညီဖို့ နိုင်ငံတကာ ကြက်ခြေနီအသင်း ICRC ရဲ့ လုပ်ငန်းဒါရိုက်တာ ဒိုမစ်နစ်ခ် စတေးလ်ဟာ့တ် က ဆေးဘက်ဆိုင်ရာ ပံ့ပိုးမှု အင်္ဂါရပ် ၁၈ ရပ်ကို ဆေးဘက်ဆိုင်ရာ ပစ္စည်းတွေ ဖြန့်ဖြူးပေးခဲ့ပြီး လစာတွေ စပေးခဲ့ပြီးပြီလို့ ပြောပါတယ်။
“ဆောင်းရာသီဝင်လာပြီ၊ အာဏာရှိနေသူတွေကို ပံ့ပိုးသလို မဖြစ်အောင် ရှောင်ဖို့ ချမှတ်ထားတဲ့ မူဝါဒတွေဟာ ခုတော့ သန်းချီတဲ့ ပြည်သူတွေ ရှင်သန်ဖို့ အင်မတန် အခြေခံကျတဲ့ လိုအပ်ချက်တွေ မရှိအောင် လုပ်သလို ဖြစ်နေပြီ”လို့ သူက သတင်းထောက်တွေကို မြို့တော် ကဘူးလ်က သတင်းစာ ရှင်းလင်းပွဲအတွင်း ပြောပါတယ်။
သူဟာ ဆေးရုံတွေဆီ ၆ ရက်ကြာ သွားရောက် ကြည့်ရှုအပြီး ခုလို ပြောလိုက်တာပါ။
ကန်ဒဟာပြည်နယ်က ကလေးလူနာဆောင်ကို သွားရာမှာ ခုတင်တလုံးမှာ ကလေး ၃ ယောက် ကြပ်ညပ်နေပြီး ဆိုးဆိုးရွားရွား အာဟာရချို့တဲ့သူတွေ၊ နမိုးနီးယားအဆုတ်ရောင်ရောဂါနဲ့ ရေဓာတ်ခန်းခြောက် သူတွေဟာ ဩဂုတ်နဲ့ စက်တင်ဘာလတွေမှာ ၂ ဆ တိုးလာနေတယ်လို့ သူက ပြောပါတယ်။
ဆေးရုံလုပ်သားတွေဟာလည်း ဆေးရုံကို လာဖို့ ခရီးစရိတ်မတတ်နိုင်လို့ ၂ နာရီကြာ လမ်းလျှောက် လာရပြီး လစာမရတာ လချီနေပြီလို့ သူက ဆက်ပြောပါတယ်။
လမ်းပေါ်က လူတွေ၊ လူနာတွေ ဆေးရုံဝန်ထမ်းတွေ အပါအဝင် ကျနော်တို့ စကားပြောတဲ့ လူတယောက်ချင်းတိုင်းဟာ လာမယ့်လတွေမှာ ဘယ်လို စားသောက်နေထိုင်ရမလဲဆိုတာ အသည်းအသန် စိုးရိမ်နေကြတယ်လို့လည်း သူက ပြောပါတယ်။
