လီဗာပူးအသင်းမှာ ကစားသမားတွေ ဒဏ်ရာပြဿနာရှိနေပေမယ့် လူသစ်ထပ်ခေါ်ဖို့ မလိုအပ်ဘူး လို့ နည်းပြ ယာဂန်ကလော့ပ်က ပြောပါတယ်။
ဖူဟမ်နဲ့ ၂ ဂိုးစီသရေကျခဲ့တဲ့ပွဲစဉ်မှာ ကွင်းလယ်လူ သီယာဂိုက တံကောက်ကြောဒဏ်ရာရခဲ့ပြီး ကွင်းလယ်ကစားသမား လေးယောက်အထိ ဒဏ်ရာပြဿနာရှိနေတာဖြစ်ပါတယ်။
ကူတစ်ဂျုံး၊ နာဘီကီတာ၊ ချိန်ဘာလိန်၊ ဂျိုတာတို့လို ကစားသမားတွေ ဒဏ်ရာပြဿနာရှိနေပေမဲ့ မကြာခင်မှာ ပြန်ကစားနိုင်မှာဖြစ်ပြီး ကစားသမားသစ်ခေါ်ဖို့မလိုအပ်ကြောင်း နည်းပြကလော့ပ်က မှတ်ချက်ပေးသွားတာပါ။
နာဘီကီတာက ဖျားနာရုံပဲဖြစ်လို့ ပြဿနာမရှိသလို ကူတစ်ဂျုံးစ်ရဲ့ဒဏ်ရာကလည်း ပြင်းထန်မှုမရှိကြောင်း၊ ချိန်ဘာလိန်နဲ့ သီယာဂိုတို့ ဒဏ်ရာရှိနေတာက မကောင်းပေမဲ့ ကွင်းလယ်ကစားသမားတွေ လုံလောက်မှုရှိကြောင်း နည်းပြကလော့ပ်က ပြောပါတယ်။
နောက်ပြီး ဖူဟမ်နဲ့ သရေကျခဲ့တဲ့အပေါ် ကွင်းမျက်နှာပြင် ခြောက်သွေ့နေတာကို နည်းပြကလော့ပ်က အပြစ်တင်သွားခဲ့ပါတယ်။
အင်္ဂလန်နည်းပြဆောက်ဂိတ်ဟာ ကနဦးရွေးချယ်ထားတဲ့ ကစားသမား ၄ ဦး ဒဏ်ရာပြဿနာရှိ တာကြောင့် နောက်ထပ် ၄ ဦးကို ထပ်မံခေါ်ယူခဲ့ပါတယ်။
ကနဦးရွေးချယ်ခဲ့တဲ့ အင်္ဂလန်အသင်း လူစာရင်းထဲမှာ ဂိုးသမား အာရွန်ရမ်ဒေးစ်၊ နောက်ခံလူတွေဖြစ်ကြတဲ့ အာနိုးလ်၊ ရီဆီဂျိမ်းစ်နဲ့ တိုက်စစ်မှူး တမ်မီအေဗရာဟမ်တို့ဟာ ဒဏ်ရာပြဿနာတွေကြောင့် လူစာရင်းကနေ အသီးသီးနုတ်ထွက်ခဲ့ကြတာပါ။
သူတို့ရဲ့နေရာမှာ ခရစ္စတယ်ပဲလေ့နောက်ခံလူ မစ်ချဲလ် နဲ့ ဆောက်သမ်တန်က ကိုင်လ်ဝေါ်ကာပီတာ တို့ကို ပထမဆုံးအကြိမ် ရွေးချယ်ခဲ့ပြီး ဝက်စ်ဘရွန်းဂိုးသမား ဂျွန်စတုန်းစ်နဲ့ ဗီလာတိုက်စစ်မှူး ဝက်ကင်စ်တို့ကို ပြန်လည်ရွေးချယ်ခဲ့တာဖြစ်ပါတယ်။
ဆောက်သမ်တန်နောက်ခံလူ ဝေါ်ကာပီတာက ၂၀၁၇ ဖီဖာယူ ၂ဝ ကမ္ဘာ့ဖလားမှာ အင်္ဂလန်အသင်းနဲ့ ချန်ပီယံဆု ဖလားရယူနိုင်ခဲ့သူဖြစ်ပြီး ယူ ၂၁ အသင်းအဆင့်အထိ ကစားခဲ့ဖူးသူပါ။
ပဲလေ့နောက်ခံလူ မစ်ချဲလ်ကတော့ သက်တမ်းအလိုက် လူငယ်အသင်းတွေမှာလည်း ရွေးချယ်ခံရဖူးခြင်းမရှိခဲ့ပေမယ့် အသင်းကြီးမှာ ပထမဆုံးအကြိမ်ရွေးချယ်ခံခဲ့ရတာပါ။
အင်္ဂလန်အသင်းဟာ ဒီတစ်ပတ်နိုင်ငံတကာပွဲစဉ်တွေမှာ ဆွစ်ဇာလန်၊ အိုင်ဗရီကို့စ်အသင်းတွေနဲ့ ခြေစမ်းပွဲ ၂ ပွဲယှဉ်ပြိုင်ကစားသွားမှာဖြစ်ပါတယ်။
