မန်စီးတီးတိုက်စစ်မှူး ဟာလန်းဟာ တရာသီအတွင်းမှာ ဂိုးပေါင်း ၄ဝ ကျော်အထိ သွင်းယူနိုင်ကြောင်း အသင်းနောက်ခံလူဟောင်း ဒမ်နီမေးလ်က ခန့်မှန်းသုံးသပ်သွားပါတယ်။

အသက် ၂၂ နှစ်ရှိ နော်ဝေတိုက်စစ်မှူးဟာ ဂျာမန်ကလပ် ဒေါ့မွန်ကနေ ပေါင် ၅၁ သန်းနဲ့ ပြောင်းရွှေ့လာသူဖြစ်ပြီး မန်စီးတီးမှာ ခြေစွမ်းပြနိုင်လိမ့်မယ်လို့ ခန့်မှန်းသုံးသပ်ကြပါတယ်။

အင်္ဂလန်နဲ့ မန်စီးတီးနောက်ခံလူဟောင်း ဒမ်နီမေးလ်ကတော့ ဟာလန်းဟာ မန်စီးတီးနဲ့ ပွဲဦးထွက်ရာသီမှာပဲ ဂိုး ၄၀ ကျော်အထိ သွင်းယူနိုင်ကြောင်း သုံးသပ်ခဲ့တာပါ။

“ဟာလန်းဟာ မန်စီးတီးမှာလည်း လက်ဖျားခါလောက်အောင် ခြေစွမ်းပြဖို့ရှိတယ်။ ပွဲတိုင်းသာ ကစားခွင့်ရမယ်ဆိုရင် ပြိုင်ပွဲစုံမှာ ဂိုး ၄၀ ကျော်အထိ သွင်းယူနိုင်လိမ့်မယ်။ ပရီးမီးယားလိဂ်မှာ ဂိုး ၃၀ သွင်းခဲ့ရင်လည်း အံ့အားသင့်စရာတော့ မဟုတ်ပါဘူး” လို့ နောက်ခံလူဟောင်း ဒမ်နီမေးလ်က ပြောပါတယ်။

ဟာလန်းဟာ မနှစ်က ဒေါ့မွန်အသင်းမှာ ဒဏ်ရာပြဿနာကြောင့် ၁၆ ပွဲအထိ လွဲချော်ခဲ့ပေမဲ့ ကစားခွင့်ရတဲ့ ပွဲ ၃၀ မှာ ၂၉ ဂိုးအထိ သွင်းယူနိုင်ခဲ့ပါတယ်။

မန်ယူနောက်ခံလူသစ် ဗာရန်းအနေနဲ့ ပရီးမီးယားလိဂ်နဲ့ အံဝင်ဖို့ အချိန်တခု ယူရနိုင်တယ်လို့ အင်္ဂလန်နောက်ခံလူဟောင်း ဒမ်နီမေးလ်က သုံးသပ်ပါတယ်။

ပြင်သစ်လက်ရွေးစင် ဗာရန်းဟာ ယူနိုက်တက်အသင်းကို ပေါင် ၄၂ သန်းနဲ့ ပြောင်းရွှေ့လာခဲ့တာပါ။ 

လာလီဂါနဲ့ ပရီးမီးယားလိဂ် ကစားပုံက ကွာခြားမှုရှိသလို ဒဏ်ရာပြဿနာရှိတဲ့ ဗာရန်းအနေနဲ့ အချိန်တခု ယူရနိုင်တယ်လို့ မန်စီးတီးနဲ့ လိဒ်ကစားသမားဟောင်း ဒမ်နီမေးလ်က ပြောပါတယ်။  

“မန်ချက်စတာ ရာသီဥတုနဲ့ အသားကျဖို့ အချိန်အနည်း ငယ်ယူရနိုင်ပါတယ်။ အရေးကြီးဆုံးဖြစ်တဲ့ ပရီးမီးယားလိဂ်နဲ့ အံဝင်ဖို့ကလည်း အချိန်လိုပါလိမ့်မယ်။ သူက ဆုဖလားအားလုံး ရယူထားပေမဲ့ ပြီးခဲ့တဲ့နှစ်တွေ အတွင်းဒဏ်ရာပြဿနာရှိခဲ့လို့ ပွဲစဉ်တိုင်းကစားနိုင်မယ် မထင်ပါဘူး။ သူ့အသင်းက လာလီဂါမှာ ဘောလုံးပိုင်ဆိုင်မှု ၇၀-၇၅ ရာခိုင်နူန်းလောက်နဲ့ ကစားခဲ့တာဖြစ်လို့ ဖိအား များများစားစား မတွေ့ခဲ့ဖူးပါဘူး။ ပရီးမီးယားလိဂ်မှာတော့ အဲဒီလို မဟုတ်ပါဘူး။ လျင်မြန်မှုရှိရမယ့်အပြင် ကြံ့ခိုင်မှုပါ ကောင်းမွန်နေဖို့လိုပါတယ်” လို့ ဒမ်နီမေးလ်က သုံးသပ်ခဲ့တာ ဖြစ်ပါတယ်။

ဒီလိုအခြေအနေတွေကြောင့် ဗာရန်းအနေနဲ့ ဗန်ဒိုက်နဲ့ ရူဘင်ဒိုင်ယက်ဇ်တို့လို ထိပ်တန်းနောက်ခံလူတဦး ဖြစ်လာဖို့ သံသယရှိနေဆဲဖြစ်တယ်လို့ ဒမ်နီမေးလ်က သုံးသပ်ပါတယ်။