စစ်ကောင်စီက အဆင်မြင့် ဒရုန်းပစ်လက်နက်တွေအသုံးပြုပြီး ပစ်ချခဲ့တာကြောင့် ခင်ဦးမြို့နယ်မှာ PDF တွေရဲ့ ဒရုန်း ၁၁ စီး၊ ကာလတန်ဖိုး ငွေကျပ်သိန်း ၃၇၀ နီးပါး ပျက်စီးဆုံးရှုံးခဲ့တယ်လို့ ခင်ဦးဒေသခံ ဒရုန်းတပ်ဖွဲ့တွေက စက်တင်ဘာ ၂၉ ရက်မှာ သတင်းထုတ်ပြန်ပါတယ်။

ခင်ဦးမြို့နယ်မှာ ဒရုန်းတွေအသုံးပြုပြီး တိုက်ပွဲပေါင်း ၁၀၀ ကျော် ဆင်နွှဲနိုင်ခဲ့ပေမဲ့ ကုန်ကျစရိတ်ကြီးမြင့်တာ၊ စစ်ကောင်စီဘက်က အဆင့်မြင့် ဒရုန်းပစ်လက်နက်တွေ အသုံးပြုလာတာကြောင့် စစ်ဆင်ရေးတွေ ယာယီရပ်နားထားရပြီး ပိုကောင်းတဲ့ နည်းပညာတွေ အသုံးပြုပြီး တိုက်ပွဲပြန်ဝင်နိုင်ဖို့ ကြိုးစားနေတယ်လို့ ခင်ဦးမြို့နယ်အခြေစိုက် ဒရုန်းတပ်ဖွဲ့ NAA-DF က ပြောပါတယ်။

လေကြောင်းရန်ကာကွယ်နိုင်ဖို့ PROJECT DRAGONFLY စီမံချက်ကို စတင် အကောင်အထည်ဖော်နေပြီး စနစ်တကျ စီမံဆောင်ရွက်နေပြီလို့ အမျိုးသားညီညွတ်ရေးအစိုးရ (NUG) က ဩဂုတ် ၉ ရက်နေ့မှာ ကြေညာထားသလို ဒရုန်းတွေနဲ့ လေကြောင်းရန်ကာကွယ်ရေး လက်နက်တွေထုတ်လုပ်ဖို့ Project Sky Work ကိုလည်း စတင်နေပြီလို့ သတင်းတွေ ထွက်ပေါ်ခဲ့ပါတယ်။

NUG က ဩဂုတ်လထဲမှာ စစ်ကိုင်းဒေသခံ ဒရုန်းတပ်ဖွဲ့ခေါင်းဆောင်တချို့နဲ့ တွေ့ဆုံခဲ့ပြီး အကူအညီတွေပေးဖို့လည်း အတည်ပြုခဲ့တယ်လို့ မြန်မာ့တော်ဝင်နဂါးတပ်တော် (MRDA) ဒရုန်းတပ်ဖွဲ့ တာဝန်ရှိသူက ပြောပါတယ်။

စက်တင်ဘာလဆန်းပိုင်းကစပြီး စစ်ကောင်စီက ဒရုန်းပစ် အဆင့်မြင့်လက်နက်တွေကို ဝယ်ယူနေတယ်ဆိုတဲ့ သတင်းတွေထွက်ပေါ်ခဲ့ပြီး ဒရုန်းတိုက်ခိုက်မှုတွေကို ကာကွယ်ဖို့ အရေးကြီးတဲ့နေရာတွေမှာ Anti Drone Gun တွေ တပ်ဆင်နေပြီလို့ ဗိုလ်ချုပ်ဇော်မင်းထွန်းက စက်တင်ဘာ ၂၀ ရက် နေပြည်တော် သတင်းစာရှင်းလင်းပွဲမှာ ပြောဆိုထားပါတယ်။

NUG ဘက်က လက်နက်တွေဝယ်ပြီး PDF တွေကို ထောက်ပံ့နေသလို ကိုယ်ပိုင်ထုတ်လုပ်ဖို့ နည်းပညာတွေ ရထားပြီလို့ ဩဂုတ်လဆန်းပိုင်းမှာ သတင်းတွေ ထွက်ပေါ်ခဲ့ပြီးနောက်ပိုင်း စစ်ကောင်စီဘက်ကလည်း အခုလို ပြန်လည်တုံ့ပြန်လာတာ ဖြစ်ပါတယ်။

ကရင်နီ (ကယား)ပြည်နယ်၊ ထားလဲနဲ့ နန်းဖဲကျေးရွာအကြား ဇွန် ၂ ရက်က ဖြစ်ပွားတဲ့ တိုက်ပွဲမှာ စစ်ကောင်စီကားတပ်ရဲ့ ကား ၂ စီးကို ဖျက်ဆီးခဲ့ပြီး ဒရုန်းပစ်ချတဲ့လက်နက် အပါအဝင် လက်နက်ခဲယမ်းတချို့ သိမ်းဆည်းရမိတယ်လို့ ကရင်နီပူးပေါင်းတပ်ဘက်က သတင်းထုတ်ပြန်ပါတယ်။

ဖရူဆိုနဲ့ ဖားဆောင်းမြို့နယ်ကို ရိက္ခာသွားပို့ပြီး ပြန်လာတဲ့ စစ်ကောင်စီယာဉ်တန်းကို ခြုံခိုတိုက်ခိုက်ခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်သေဆုံးခဲ့သလို အခုလို လက်နက်ခဲယမ်းတွေ သိမ်းဆည်းရမိတာ ဖြစ်ပါတယ်။

မေလအတွင်း ကရင်နီပြည်မှာ စစ်ကောင်စီတပ်က ဖရူဆိုမြို့နယ်၊ ဘောလခဲမြို့နယ်၊ လွိုင်ကော်မြို့နယ်နဲ့ ဖယ်ခုံမြို့နယ်တို့မှာ ထိုးစစ်အရှိန်မြှင့်သလို စစ်ကောင်စီတပ်ဟာ ရှမ်း-ကယားနယ်စပ် မိုးဗြဲနဲ့ လွိုင်ကော်နယ်စပ်တို့အပြင် ဖယ်ခုံအရှေ့ဘက်ကမ်းတို့မှာ နယ်မြေစိုးမိုးရေးအတွက် အပြင်းအထန် ထိုးစစ်ဆင်နေတယ်လို့ KNDF က သတင်းထုတ်ပြန်ပါတယ်။

စစ်ကောင်စီဘက်က မေ ၁၅ ရက်ကစပြီး ဖယ်ခုံမြို့နယ် အရှေ့ဘက်ကမ်းကျေးရွာတွေဖြစ်တဲ့ ဆောင်နန်းခဲ၊ နန်းပုံလုံ၊ လွယ်ပေါကျေးရွာဘက်မှ စစ်ကြောင်းတကြောင်းနဲ့ မိုးဗြဲအခြေစိုက် ခမရ ၄၂၂ တပ်ရင်းဘက်မှ ဆီးမီးလော့ကျေးရွာဘက် စစ်ကြောင်းတကြောင်း စုစုပေါင်း စစ်ကြောင်းနှစ်ကြောင်းနဲ့ အပြင်းအထန် ထိုးစစ်ဆင်ခဲ့တဲ့အတွက် တိုက်ပွဲတွေ ဖြစ်ပွားခဲ့ပါတယ်။

မေ ၁၆ ရက်မှာတော့ ဆောင်နန်းခဲကျေးရွာအတွင်း ရွာလုံးကျွတ် နေအိမ်တွေကို မီးရှို့ဖျက်ဆီးခဲ့ပြီး လွယ်ပေါနဲ့ နန့်ပုံလုံကျေးရွာမှာလည်း နေအိမ်တွေကို မီးရှို့ဖျက်ဆီးခဲ့တယ်လို့ သတင်းထုတ်ပြန်ပါတယ်။

ဒါ့အပြင် ဖယ်ခုံ-ပင်လောင်းနယ်စပ်ဖြစ်တဲ့ ပင်ပုံ၊ လွယ်ဟွယ်၊ တောင်မဲသင်းကျေးရွာနဲ့ အနီးတဝိုက်မှာ စစ်ကောင်စီတပ်နဲ့ PNO ပူးပေါင်းပြီး အင်အားဖြည့်တင်းနေပါတယ်။

ပင်လောင်းမြို့နယ် သသာန်ကူး၊ လွန်းကဲနဲ့ ကထန်းရွာသစ်ကျေးရွာတွေမှာ  စစ်ကောင်စီတပ်နဲ့ PNO တပ်တွေ လှုပ်ရှားနေပြီး ကျေးရွာတွေအတွင်း နေအိမ်တွေကို ဖောက်ထွင်းဖျက်ဆီးတာ၊ ကက်သလစ်မယ်တော်ဂူကို ဖျက်ဆီးခဲ့ကြောင်းလည်း KNDF က သတင်းထုတ်ပြန်ပါတယ်။