အမေရိကန်ပြည်ထောင်စု၊ ဝါရှင်တန်ပြည်နယ်က အယ်နာကောတပ်စ်မြို့အနီး စကားဂစ်ထ် ကောင်တီမှာ မတ်လ ၁၆ ရက် ညသန်းခေါင်လောက်က ကုန်တင်ရထားတစင်း လမ်းချော်သွားပြီးနောက် ဒီဇယ်ဆီဂါလံ ၅,၀၀၀ လောက် ယိုဖိတ်သွားခဲ့ကြောင်း ပြည်နယ် ဂေဟဗေဒဌာနက ထုတ်ပြန်ပါတယ်။

ဒီဇယ်ဆီယိုဖိတ်မှုကို အရေးပေါ်အဖွဲ့သားတွေက တုံ့ပြန်လုပ်ဆောင်နေကြပါတယ်။ ယိုဖိတ်မှုဟာ ရေကြောနဲ့ထိစပ်နေတဲ့ မြေပြန့်ပေါ်မှာ ဖိတ်ကျသွားတာဖြစ်ပြီး ဒီဇယ်ဆီ အများစုဟာ ရေ သို့မဟုတ် တောရိုင်းတိရစ္ဆာန်တွေအပေါ် ဘာထိခိုက်မှုမှ မရှိဘဲ မြေပြင်ပေါ်ကိုသာ ဖိတ်ကျသွားတာဖြစ်ကြောင်း လည်းထုတ်ပြန်ချက်မှာ ဖော်ပြထားပါတယ်။

အခုရထားလမ်းချော်မှုမှာ ဘာလင်တန်မြောက်ပိုင်း ဆန်တာ‌ဖေး BNSF ရထားလိုင်းက ရထားတစင်းနဲ့ ကားတစင်းတို့ ပတ်သက်နေပြီး ရထားရော ကားရော ရထားလမ်းကြောင်းကနေ ချော်ထွက်သွားတာပါ။ 

အခင်းဖြစ်ပွားရတဲ့ အကြောင်းရင်းကို စုံစမ်းနေဆဲဖြစ်ပြီး ထိခိုက်ဒဏ်ရာရသူ မရှိပါဘူး။ ပြီးခဲ့တဲ့နာရီပိုင်းလောက်ကလည်း အရီဇိုးနားပြည်နယ်အနောက်ပိုင်းမှာ တခြား BNSF ရထားတစီး လမ်းချော်မှု ဖြစ်ပွားခဲ့ပါသေးတယ်။

ပြီးခဲ့တဲ့ တလခွဲလောက်ကလည်း အိုဟိုင်းယိုးပြည်နယ်က အရှေ့ပါလက်စတိုင်းရွာမှာ နော်ဖို့ခ် တောင်ပိုင်း ကုန်တင်ရထားတစီး လမ်းချော်ခဲ့လို့ အဆိပ်ရှိတဲ့ ဗီနိုင်းလ် ကလိုရိုက်ဒ်နဲ့ တခြားအန္တရာယ်ရှိ ဓာတုပစ္စည်းတွေ သယ်ဆောင်လာတဲ့ကားတွေ မှောက်ကုန်ပြီး မီးလောင်ခဲ့ပါတယ်။

ရန်ကုန်မြို့က  ပြည်တွင်းစက်သုံးဆီအရောင်းဆိုင်အများစုဟာ အထူးစျေးနူန်းနဲ့ဒီဇယ်ဆီရောင်းချ ပေးနေတာကို မတ်လ ၁၉ ရက် ဒီနေ့ကစပြီးရ ပ်နားလိုက်ကြတယ်လို့ သိရပါတယ်။

ဒီနှစ်ဆန်းမှာ ဗဟိုဘဏ်က စက်သုံးဆီလုပ်ငန်းရှင်တွေကို အမေရိကန်ဒေါ်လာ ထုတ်ရောင်းပေးခဲ့ပြီ အဲဒီဒေါ်လာနဲ့ ဝယ်ယူတင်သွင်းတဲ့ ဒီဇယ်ဆီကို အပြင်ပေါက်စျေးထက်လျှော့ချရောင်းချစေခဲ့တာပါ။

ဗဟိုဘဏ်က ထုတ်ရောင်းပေးခဲ့တဲ့ အမေရိကန်ဒေါ်လာ ငါးသန်းနဲ့ဝယ်ယူထားတဲ့ ဒီဇယ်ဆီဟာ ကုန်သလောက်ရှိနေပြီး ဒေါ်လာထုတ်ရောင်းမပေးတာကြောင့် အထူးစျေးနဲ့ ဒီဇယ်ဆီရောင်းချပေးနေတာကို ရပ်ဆိုင်းလိုက်ကြတာလို့ စက်သုံးဆီလုပ်ငန်းရှင်တစ်ဦး ကပြောပါတယ်။

"ထပ်ရောင်းစရာမရှိတော့လို့ ရပ်လိုက်ကြတာ။ နောက်နေ့တွေ အပြင်ပေါက်စျေးနဲ့ပဲ ဝယ်ကြရတော့မယ်"လို့ လုပ်ငန်းရှင်က ပြောပါတယ်။

အထူးစျေးနဲ့ရောင်းချပေးတဲ့ဒီဇယ်ဆီဟာ ပုံမှန်ရောင်းချနေတဲ့စျေးထက် တစ်လီတာကို ကျပ် ၂၀၀ လျော့နည်းတာကြောင့် အဝေးပြေးခရီးသည်တင်ယာဥ်တွေ၊ ကုန်စည်ပို့ဆောင်ရေးယာဥ်တွေက အထူးစျေးနဲ့ရောင်းတဲ့ဆီဆိုင်တွေကို ရှာဖွေဆီဖြည့် ဝယ်ယူခဲ့ကြပါတယ်။

မြန်မာပြည်တဝန်း စက်သုံးဆီအရောင်းဆိုင်ပေါင်း  ၁၄၀၀ လောက်ရှိပြီး ဆိုင်၂၀၀ လောက်ကပဲ ဒီဇယ်ဆီကို အထူးစျေးနဲ့ရောင်းချပေးခဲ့တာပါ။

ပြည်တွင်းစက်သုံးဆီစျေးဟာ မတ်လဒုတိယအပတ်မှာ တစ်လီတာကို ကျပ် ၂၅၀၀ နီးပါးအ ထိရောက်ရှိခဲ့ပြီး အခုရက်ပိုင်းမှာ တစ်လီတာကျပ်၂၀၀၀ အောက်ပြန်ရောက်လာပါတယ်။