စစ်ကိုင်းတိုင်း၊ ဒီပဲယင်းမြို့နယ် ရဲစခန်းကို ဇူလိုင် ၆ ရက် မနက် ၁၁ နာရီခွဲလောက်က အဆင့်မြင့် အဝေးထိန်းစနစ်အသုံးပြုပြီး မိုင်းဖောက်ခွဲတိုက်ခိုက်ခဲ့တာကြောင့် စစ်ကောင်စီဘက်က ၅ ယောက်နဲ့အထက် အပြင်းအထန် ဒဏ်ရာရရှိခဲ့တယ်လို့ SNAKE EYES PDF အဖွဲ့က ပြောပါတယ်။ 

SNAKE EYES PDF အဖွဲ့ သတင်းပြန်ကြားရေးတာဝန်ခံက “ဖောက်ခွဲခဲ့ရတဲ့ အကြောင်းအရင်းကတော့ စကစတွေ အထိုင်ချထားတဲ့ ပစ်မှတ်တွေကို တိုက်ခိုက်တဲ့ သဘောပါပဲ။ သူတို့စခန်းအတွင်းကို မိုင်းသွင်းတာကတော့ လုံခြုံရေးအရ ပြောပြလို့မရတာ နားလည်ပေးပါခင်ဗျ။ စခန်းအတွင်းက စားဖိုဆောင်အနီးမှာ ကျနော်တို့ မိုင်းကို ခွဲခဲ့တာပါ။ အထိအခိုက်က ၅ ဦးနဲ့အထက် ဒဏ်ရာရပါတယ်ခင်ဗျာ” လို့ ပြောပါတယ်။

အဆိုပါရဲစခန်းဟာ အင်အား ၃၀ ဝန်းကျင်ရှိတဲ့ စခန်းတခုဖြစ်တယ်လို့ သိရပါတယ်။

ပြည်သူတွေ ထိခိုက်မှုမရှိအောင် ဘေးကင်းတဲ့ အခြေအနေတခုမှာ မိုင်းကို အထဲရောက်အောင်သွင်းပြီး ဖောက်ခွဲခဲ့တာလို့ သိရပါတယ်။

“မြို့ပြပြောက်ကျားလှုပ်ရှားမှုတွေမှာ ပြည်သူတွေကို ထိခိုက်မှာစိုးလို့ ရှောင်လိုက်ရတာတွေ၊ ဖျက်လိုက်ရတာတွေ ရှိတော့ ဖြစ်နိုင်ရင် စခတွေနဲ့ အနီးဆုံးနေရာတွေမှာ မနေစေချင်ပါဘူး ခင်ဗျာ” လို့ SNAKE EYES PDF အဖွဲ့ သတင်းပြန်ကြားရေးတာဝန်ခံက ပြောပါတယ်။

အဆိုပါ မြို့ပြစစ်ဆင်ရေးကို SNAKE EYES PDF၊ Non Profit Soldiers Ye.U နဲ့ Freedom Revolution Force (F.R.F) တို့ ပူးပေါင်းဆောင်ရွက်ခဲ့တာလို့ သိရပါတယ်။

စစ်ကိုင်းတိုင်း ဒီပဲယင်း ရဲစခန်းအတွင်း ကင်းပုန်းဝပ်‌နေတဲ့ စစ်ကောင်စီတပ်ဖွဲ့ကို မေ ၁ ရက်နေ့ မွန်းတည့် ၁၂ နာရီလောက်မှာ PDF ပူးပေါင်းအဖွဲ့က ရှော့တိုက်ဒုံး ၁၅ လုံးနဲ့ ပစ်ခတ်တိုက်ခိုက်ခဲ့ပြီး ရဲ ၃ ဦးသေဆုံးသွားတယ်လို့ ဗိုလ်ကောင်းကင် (Kaung kin-PDF) က ပြောပါတယ်။

ဧပြီ ၂၉ ရက်နေ့က စစ်ကြောင်းထိုးလာတဲ့ စကစ တပ်သားတွေဟာ ကျေးရွာ ၂ ရွာကို မီးရှို့ဖျက်ဆီးခဲ့ပြီး ဒေသခံပြည်သူ ၄ ဦးကို သတ်ဖြတ်ခဲ့တဲ့အတွက် လက်တုံ့ပြန်တာလို့ ဆိုပါတယ်။

“စကစတွေက ရဲနွယ်ရွာကိုဝင်ပြီး မီးရှို့သွားတယ်။ ၂ ရွာပေါင်း အိမ်ခြေ ၁၉ လုံးကျော် မီး‌လောင်ကျွမ်းသွားတယ်။ ရွာသား ၄ ဦးကိုလည်း သတ်သွားတယ်။ အဲ့လိုသတ်သွားတာကို မေဒေးနေ့ အလုပ်သမားနေ့မှာ တုံ့ပြန်တဲ့အနေနဲ့ ကျနော်တို့က အဲ (-) တွေဝပ်တဲ့ ကင်းပုန်းတွေကို ရှော့တိုက်ဒုံး ၁၅ လုံးနဲ့ ဝင်ပြီး ပစ်လိုက်တာ။ ရဲ (-) ၃ ကောင် သေတယ်လို့ မြို့ခံတွေက သတင်းပို့တယ်။” 

အဆိုပါပစ်ခတ်တိုက်ခိုက်မှုကို ဒီပဲယင်းမြို့နယ် နယ်မြေခံကာကွယ်‌ရေးတပ်ဖွဲ့ ကောင်းကင် ၊ Zero Fighter၊ ဗိုလ်ဇေယျ ၊ စွယ်တော်-ရင်း(၁၂)နှင့် တခြား Local PDF အဖွဲ့တွေ ပူးပေါင်းပြုလုပ်ခဲ့တာလို့ သိရပါတယ်။