ရှမ်း-ကယားနယ်စပ်၊ ဒီးမော့ဆိုမြို့နယ်၊ ဝီသဲကူး (မြောက်ရွာ)မှာ ဖေဖော်ဝါရီ ၂၀ ရက်နေ့က ဖြစ်ပွားခဲ့တဲ့ တိုက်ပွဲကြောင့် အကြမ်းဖက်စစ်ကောင်စီတပ်သား ၃၀ ဝန်းကျင် သေဆုံးခဲ့ပြီး အမြောက်အမြား ဒဏ်ရာရရှိကြောင်း ဒီးမော့ဆိုမြို့နယ် ပြည်သူ့ကာကွယ်ရေးတပ်က သတင်းထုတ်ပြန်ပါတယ်။
မနေ့မနက် ၁၁ နာရီမှစတင်က တိုက်ပွဲတွေ အပြင်းအထန် ဖြစ်ပွားခဲ့ပြီး ညနေ ၄ နာရီလောက်မှာတော့ စစ်ကောင်စီဘက်က တိုက်လေ လေယာဉ် ၂ စင်းနဲ့ လာရောက်ဗုံးကြဲ တိုက်ခိုက်ခဲ့ကြောင်းဖော်ပြပါတယ်။
ဒါ့အပြင် မနေ့ည သန်းခေါင်အချိန်မှာ စစ်ဖြစ်ပွားရာ မိုးဗြဲနဲ့ ဒီးမော့ဆိုဘက်ကို စစ်ကော်စီဘက်က လေယာဉ်တွေနဲ့ ထပ်မံလာရာက် ဗုံးကြဲမှုတွေ ရှိခဲ့တယ်လို့ဆိုပါတယ်။
အဆိုပါတိုက်ပွဲမှာ ပြည်သူ့ကာကွယ်ရေးတပ်-ဒီးမော့ဆို(DMO-Local PDF)၊ အလယ်ပိုင်းတိုင်း၊ လွိုင်ကော် PDF၊ KNDF နဲ့တခြား မဟာမိတ်တပ်ပေါင်းစုတွေ ပူးပေါင်းပြီး စစ်ကောင်စီကို ခုခံတိုက်ခိုက်ခဲ့တာလို့ ဆိုပါတယ်။
ရှမ်း-ကယားနယ်စပ် မိုးဗြဲမှာ ဖေဖော်ဝါရီ ၁၅ ရက်ကစပြီး စစ်ကောင်စီနဲ့ ကရင်နီပူးပေါင်းတပ်တွေအကြား တိုက်ပွဲတွေ ပြင်ပြင်းထန်ထန်ဖြစ်ပွားနေပြီး စစ်ကောင်စီဘက်က လက်နက်ကြီးငယ်တွေအပြင် ရဟတ်ယာဉ်၊ တိုက်လေယာဉ်တွေနဲ့ပါ ပစ်ခတ် တိုက်ခိုက်ခဲ့ပါတယ်။
ဒီလိုတိုက်ခိုက်မှုကြောင့် ဖေဖော်ဝါရီ ၁၇ ရက်နေ့က ကရင်နီပူးပေါင်းတပ်ဘက်က ၂၀ ကျော်သေဆုံးခဲ့ရပြီး အများအပြား ဒဏ်ရရှိခဲ့ပါတယ်။
ဒါ့အပြင် စစ်ကောင်စီတပ်တွေဟာ မိုးဗြဲမြို့နယ် ဝါရီဆူးပလိုင်ရွာ၊ ဝီတဲကူးရွာတွေကို ဝင်ရောက် မီးရှို့ဖျက်ဆီးခဲ့သလို လမ်းတလျှောက်လည်း မိုင်းထောင်တာ၊ လက်နက်ကြီးတွေနဲ့ ပစ်ခတ်နေတယ်လို့လည်း လွိုင်ကော် PDF က ထုတ်ပြန်ပါတယ်။
တိုက်ပွဲကြောင့် သောင်းနဲ့ ချီတဲ့ ဒေသခံတွေလည်း စစ်ဘေးလွှတ်ရာကို ထွက်ပြေးတိမ်းရှောင်နေရပြီး အရေးပေါ် ကူညီကယ်ဆယ်မှုတွေ လိုအပ်နေပါတယ်။ ဒီတိုက်ပွဲကြောင့် အရပ်သားပြည်သူ တဦး သေဆုံးကာ ၇ ဦး ဒဏ်ရာရရှိခဲ့ကြောင့် ကူညီကယ်ဆယ်ရေးအဖွဲ့တွေက ပြောပါတယ်။
ဒေသခံပြည်သူ့ကာကွယ်ရေးတပ်ပေါင်းစုနဲ့ အကြမ်းဖက်စစ်ကောင်စီတပ်တွေကြား တိုက်ပွဲပြင်းထန်နေတဲ့ ကယားပြည်နယ်၊ လွိုင်ကော်မြို့၊ မိုင်းလုံးရပ် ကွက်အပါအဝင် အနီးအနားကျေးရွာတွေက ပြည်သူတွေ ဒီးမော့ဆိုမြို့နယ်ဘက်ကို သောင်းနဲ့ချီပြီး စစ်ဘေးတိမ်းရှောင်နေရပါတယ်။
စစ်ဘေးရှောင်တွေကို ကူညီနေသူတစ်ဦးက “မိုင်းလုံးဘက်ကနေ ကျနော်တို့ ဒီးမော့ဆိုဘက်က နန်းမယ်ခုံနဲ့ အိုကေရွာဘက်ကို တိမ်းရှောင်လာတာ လူဦးရေ ၁၉၀၀ လောက်ရှိတယ်။ ဒီးမော့ဆိုက အခြားရွာဘက်တွေကို တိမ်းရှောင်လာတာနဲ့ပေါင်းရင် သောင်းဂဏာန်းလောက်ရှိတယ်" လို့ ပြောပါတယ်။
လွိုင်ကော်မြို့နယ်ဘက်က စစ်ဘေးရှောင်တွေဟာ ဒီးမော့ဆိုမြို့နယ်ဘက်ကို ဇန်နဝါရီလ ၇ ရက်နေ့ကနေစတင်ပြီး စစ်ဘေးရှောင်လာကြတာပါ။ ပြည်သူလူထုတွေကို စစ်ကောင်စီတပ်က ပစ်မှတ်ထား တိုက်ခိုက်နေတာကြောင့် တိမ်း ရှောင်လာကြတာလည်းဖြစ်ပါတယ်။
“အကြမ်းဖက်တပ်က အရပ်သားတွေကို လက်ကြီးနဲ့ပစ်တယ်။ ပွိုင့်ဖိုက် စက်သေနတ်ကြီးနဲ့ ပစ်တယ်။ လေယာဉ်တွေနဲ့လည်း ဗုံးလာကြဲတယ်။ အရပ်သားပြည်သူတွေ ထိခိုက်ဒဏ်ရာရ သေဆုံးတာတွေရှိလို့ မနေရဲတော့ဘဲ တိမ်းရှောင်လာတာပါ” လို့ စစ်ဘေးရှောင်တဦးက ပြောပါတယ်။
လွိုင်ကော်မြို့၊ မိုင်းလုံးရပ်ကွက်တိုက်ပွဲအတွင်း စစ်ကောင်စီတပ်က ပစ်ခတ်လို့ အပြစ်မဲ့အရပ်သားပြည်သူ သေဆုံးတာ ၆ ယောက်ရှိနေပြီဖြစ်ပါတယ်။
နှစ်ဖက်တိုက်ပွဲအတွင်း အကြမ်းဖက်စစ်ကောင်စီတပ်ဘက်က အရာရှိစစ်သည် အများအပြား ထိခိုက်သေဆုံးတာရှိခဲ့ပြီး လက်နက်ခဲယမ်းအများစုကို ဒေသခံပြည်သူ့ကာကွယ်ရေးတပ်ဘက်က သိမ်းဆည်းရမိခဲ့ပါတယ်။
မိုင်းလုံးတိုက်ပွဲမှာ လွိုင်ကော် (PDF) က ၁ ဦး၊ KNDF က ၁ ဦး ဒီမိုကရေစီရေးအတွက် ကျဆုံးခဲ့ပါတယ်။
လက်ရှိ နှစ်ဖက်စစ်ရေးပြင်ဆင်မှုတွေ ရှိနေပြီး ပစ်ခတ်တိုက်ခိုက်မှုလည်း ဆက်လက်ဖြစ်ပွားနေပါတယ်။
