ပြီးခဲ့တဲ့ နှစ်ကုန်ပိုင်းကနေ ဒီလဆန်းပိုင်းအထိ ကေအန်ယူ ဒူးပလာယာခရိုင်ကို စစ်ကောင်စီက လေကြောင်းကနေ အကြိမ် ၁၆၀ ကျော် တိုက်ခိုက်ခဲ့ပြီး ပြည်သူတွေရဲ့ အိမ်တွေ၊ ကျောင်းတွေ၊ ဘာသာရေးအဆောက်အအုံ အများအပြား ပျက်စီးခဲ့တယ်လို့ ကရင်ငြိမ်းချမ်းရေး အထောက်အကူပြုကွန်ရက် (KPSN) က ထုတ်ပြန်ပါတယ်။

စစ်ကောင်စီရဲ့ လေကြောင်းတိုက်ခိုက်တာနဲ့ လက်နက်ကြီး ပစ်ခတ်တာတွေကြောင့် အရပ်သားပြည်သူ ၈ ယောက်သေဆုံး၊ ၆၃ ယောက် ဒဏ်ရာရခဲ့ပြီး လူပေါင်း ၈၇,၀၀၀ လောက် နေရပ်စွန့်ခွာ ထွက်ပြေးနေရတယ်လို့ KPSN က ပြုစုထုတ်ပြန်တဲ့ စာတမ်းမှာ ဖော်ပြထားပါတယ်။

ဒါကြောင့် နိုင်ငံတကာအနေနဲ့ စစ်အုပ်စုအပေါ် ပိုအားကောင်းတဲ့ စီးပွားရေး သံတမန်ရေး ဖိအားတွေပေးကြဖို့နဲ့ ဂျပန်နိုင်ငံအနေနဲ့ လက်ရှိလုပ်နေတဲ့ စီမံကိန်းတွေရပ်ဆိုင်းဖို့ကိုလည်း KPSN က တောင်းဆိုထားပါတယ်။

၂၀၁၂ ခုနှစ်မှာ ကရင်အမျိုးသားအစည်းအရုံး (ကေအန်ယူ) နဲ့ စစ်တပ်တို့ အပြန်အလှန်အပစ်ရပ်ခဲ့ကြပေမယ့် ၂၀၂၁ ခုနှစ် စစ်တပ်က အာဏာသိမ်းပြီးနောက် စစ်အုပ်စုဆန့်ကျင်ရေး တက်ကြွလှုပ်ရှားသူတွေ ခိုလှုံလာကြတဲ့ ကေအန်ယူတပ်မဟာ ၆ ဒူးပလာယာခရိုင်ထဲမှာ တင်းမာမှုတွေ စလာခဲ့တယ်လို့ ဆိုပါတယ်။

ပြီးခဲ့တဲ့ နှစ်ကုန်ပိုင်းမှာတော့ စစ်တပ်ဘက်က အင်အားတိုးချဲ့လာခဲ့သလို လေးကော့ကော်မြို့သစ်ကို ဝင်ရောက်ရှာဖွေပြီး နိုင်ငံရေးလှုပ်ရှားသူတွေကို ဖမ်းဆီးခဲ့တာကြောင့် တိုက်ခိုက်တာတွေ စတင်ခဲ့ပြီး စစ်တပ်ဘက်က လေကြောင်းကနေတိုက်ခိုက်လာခဲ့ပါတယ်။

ရန်ကုန်၊ မှော်ဘီလေတပ်က တိုက်လေယာဉ်တွေ၊ မော်လမြိုင်နဲ့ ဖားအံလေတပ်က တိုက်ခိုက်ရေးရဟတ်ယာဉ်တွေနဲ့ စစ်ကောင်စီဟာ ဒေါနတောင်တန်းနှစ်ဖက်ခြမ်းလုံးကို အကြိမ်ကြိမ်တိုက်ခိုက်ခဲ့ကြတယ်လို့ KPSN က ဆိုပါတယ်။

သူတို့ ပြုစုထားတဲ့ စာရင်းအရ ၂၀၂၂ ခုနှစ် ဇွန်လ ၂၉ ရက်နေ့မှာ ဥကရစ်ထကို ဂျက်တိုက်လေယာဉ် ၈ စီးနဲ့ ၄၉ ကြိမ်အထိ အများဆုံး တိုက်ခိုက်ခဲ့ပြီး မေလ ၁၈ ရက်နေ့က သေဘော့ဘိုးကို ဂျက်တိုက်လေယာဉ် ၄ စီး၊ တိုက်ခိုက်ရေး ရဟတ်ယာဉ် ၂ စီးနဲ့ ၃၈ ကြိမ် တိုက်ခိုက်ခဲ့တယ်လို့ သိရပါတယ်။

ပြီးတော့ ဇူလိုင် ၁ ရက်နေ့က သေဘော့ဘိုးနဲ့ ဥကရစ်ထကို ဂျက်တိုက်လေယာဉ် ၃ စီးနဲ့ ၃၁ ကြိမ်၊ ဇွန် ၃၀ ရက်နေ့က သေဘော့ဘိုးကို ဂျက်တိုက်လေယာဉ် ၈ စီးနဲ့ ၂၂ ကြိမ်တိုက်ခိုက်ခဲ့တယ်လို့ ဆိုပါတယ်။

ပြီးခဲ့တဲ့နှစ် ဒီဇင်ဘာ ၂၃ ရက်ကနေ အခု ဇူလိုင် ၃ ရက်နေ့အထိ အတွင်းမှာ ၂၈ ရက် လေကြောင်းကနေ တိုက်ခိုက်ခဲ့ပြီး စုစုပေါင်း ၁၆၅ ကြိမ်ရှိပါတယ်။

ဒီတိုက်ခိုက်မှုတွေမှာ ခြေလျင်တပ်ရင်း၊ အမြောက်တပ်ရင်းနဲ့ စစ်ကောင်စီ တပ်မတွေ၊ နယ်ခြားစောင့်တပ်တွေလည်း ပါဝင်ပြီး လက်နက်ကြီးတွေနဲ့ လူနေကျေးရွာတွေကို ပစ်ခတ်တာကြောင့် အခု ဇွန်လကုန်ပိုင်းအထိ ကော့ကရိတ်၊ ကြာအင်းဆိပ်ကြီး၊ ဝင်းရေးနဲ့ ကျုံဒိုးမြို့နယ်တို့က ကျေးရွာပေါင်း ၁၀၀ ကျော်မှာ လူပေါင်း ၈၇၀၀၀ လောက်ဟာ ဘေးလွတ်ရာ တိမ်းရှောင်ထွက်ပြေးနေကြရတယ်လို့လည်း ဆိုပါတယ်။

စစ်ရှောင်တွေဟာ မြန်မာနိုင်ငံနဲ့ ထိုင်းနိုင်ငံထဲမှာ ဒုက္ခရောက်နေကြရပြီး ဒီလိုအခြေအနေတွေမှာ တိုင်းရင်းသား လူမှုဝန်ဆောင်မှုဌာနတွေနဲ့ လူထုအခြေပြုအဖွဲ့တွေကတဆင့် စစ်ရှောင်တွေကို နယ်စပ်ဖြတ်ကျော်ကူညီတာတွေတိုးမြှင့်ပေးဖို့ KPSN က နိုင်ငံတကာကို တောင်းဆိုပါတယ်။

ပြီးတော့ စစ်အုပ်စုကို ဖွံ့ဖြိုးရေးအကူအညီသစ်တွေရပ်ဆိုင်းထားဖို့၊ အာရှအဝေးပြေးလမ်းမကြီးတလျှောက် တံတားဆောက်လုပ်ရေးလုပ်ငန်းတွေအတွက် လက်ရှိထောက်ပံ့နေတာတွေအပါဝင်ရပ်ဆိုင်းထားဖို့ JICA ကို တောင်းဆိုပါတယ်။

စစ်အုပ်စုကိုလည်း လက်နက်နဲ့ လေယာဉ်ဆီ၊ စီးပွားရေးပိတ်ဆို့ကြဖို့၊ နိုင်ငံတကာရာဇဝတ်ခုံရုံးဆီကို လွှဲပြောင်းပေးဖို့လည်း KPSN က ထုတ်ပြန်တောင်းဆိုလိုက်ပါတယ်။

ကရင်ပြည်နယ် ကြာအင်းဆိပ်ကြီးမြို့နယ်၊ ကေအန်ယူ ဒူးပလာယာခရိုင် ကြိတ်နဲ့ ပိုင်ကဒုံကျေးရွာ အကြားမှာ စက်တင်ဘာ ၁ ရက် မနက် ၇ နာရီအချိန်က ကရင်အမျိုးလွတ်မြောက်ရေးတပ်မတော် (KNLA) နဲ့ စစ်ကောင်စီတပ်တို့အကြား တိုက်ပွဲဖြစ်ပွားခဲ့ပါတယ်။ 

အာဏာသိမ်းအကြမ်းဖက်စစ်အုပ်စုဟာ မနေ့ညပိုင်းက ကြိတ်ကျေးရွာကနေ ပိုင်ကလာဒုံကျေးရွာဘက်ကို နယ်မြေကျော်လွန်ရောက်ရှိလာပြီးနောက် ကြိတ်နဲ့ ပိုင်ကလာဒုံကြားက မိုက်ကလိန်ချောင်းနေရာမှာ ဒီကနေ့မနက် ၇ နာရီလောက်က  နယ်မြေခံ KNLA တပ်နဲ့ တိုက်ပွဲဖြစ်ပွားခဲ့တာပါ။

၁ နာရီနီးပါး ဖြစ်ပွားခဲ့ပြီး စစ်ကောင်စီတပ်ဘက်က ၃ ဦး ဒဏ်ရာရရှိကြောင်း သိရပြီး  အဆိုပါအနီးနားတဝိုက်မှာ ပစ်ခတ်မှုတွေကြောင့် ဒေသခံရွာသားတွေ ထွက်ပြေးတိမ်းရှောင်နေကြရတယ်လို့ ဒေသခံတဦးက ပြောပါတယ်။ 

“အဓိကကတော့ သူတို့က သိမ်းထားတဲ့စခန်းကို ပြန်ပြီးတော့  စခန်းပြန်လာထိုင်မယ်ပေါ့နော်။ အဓိကကတော့ သူတို့စခန်း ပြန်တောင်းတာပေါ့။ အဲလိုမျိုးပဲ။ ဒီဘက် အန်ယူဂျီတို့၊ CDM  တို့၊ PDF တို့ ဝင်စစ်တာ ဒါကတော့ အကြောင်းပြချက်တခုပေါ့၊ အခုလောလောဆယ် ဖြစ်နေတာကတော့ စခန်းပြန်လာတောင်းတာပေါ့နော်။”

ကြိတ်ကျေးရွာစခန်းကို စစ်ကောင်စီတပ်ဖွဲ့၀င်တွေက သြဂုတ် ၂၁ ရက်နေ့က စွန့်ခွာထွက်ခွာသွားခဲ့ပြီး နယ်မြေခံ KNLA တပ်ဖွဲ့တွေက အဲဒီစခန်းကို သွားရောက်မီးရှို့ဖျက်ဆီးခဲ့ပါတယ်။

အာဏာသိမ်းစစ်ကောင်စီတပ်တွေဟာ  ကေအန်ယူ ဒူးပလာယာခရိုင်ထဲကို စစ်ရေးအင်အား တိုးချဲ့မှုတွေ၊ စစ်ရေးလှုပ်ရှားမှုတွေ ပိုမိုလုပ်ဆောင်လာတာကြောင့် KNLA တပ်နဲ့ တိုက်ပွဲတွေ ဖြစ်ပွားခဲ့ပြီး ဒေသခံပြည်သူလူထုတွေလည်း တိမ်းရှောင်ထွက်ပြေးနေရပါတယ်။ 

ကြိတ် နဲ့ ပိုင်ကဒုံကျေးရွာအကြား တိုက်ပွဲဖြစ်ပွားမှုအခြေအနေနဲ့ ပတ်သက်ပြီး စစ်ကောင်စီဘက်ကတော့ သတင်းမထုတ်ပြန်သေးပါဘူး။