နယ်သာလန်နိုင်ငံမှာ လယ်သမားတွေဟာ ဓာတ်မြေသြဇာ လျှော့သုံးဖို့၊ မွေးမြူရေးကို လျော့ချဖို့ အစိုးရအစီအစဉ်ကို လက်မခံနိုင်ကြတဲ့အတွက် ဇူလိုင် ၄ ရက်မှာ ဆန္ဒပြကြပါတယ်။

လယ်သမားတွေဟာ ဘယ်လ်ဂျီယံနဲ့ နယ်စပ်ဖြစ်တဲ့ နိုင်ငံတောင်ပိုင်းက အဓိက လမ်းမကြီး A67 လမ်းပိုင်းမှာ ပိတ်ဆို့ ဆန္ဒပြကြတာ ဖြစ်ပါတယ်။ 

ဇူလိုင် ၄ ရက်သပိတ်ဟာ တနိုင်ငံလုံး ချိတ်ဆက် ဆန္ဒပြတာဖြစ်လို့ တခြားနေရာမှာလည်း လယ်သမားတွေဟာ စူပါမားကက်တွေ၊ လက်ကားဆိုင်ကြီးတွေကို ပိတ်ဆို့ ဆန္ဒပြခဲ့ကြပါတယ်။

ဒတ်ချ်လယ်သမားတွေ စိုက်ပျိုးရေးလုပ်ငန်းမှာသုံးတဲ့ အန္တရာယ်ရှိတဲ့ နိုက်ထရိုဂျင် ဓာတ်ပေါင်းကို ၂၀၃၀ ကျရင် အတိုင်းအတာတခုအထိ လျှော့ချဖို့ အစိုးရက စီစဉ်နေတာပါ။ 

ဒီအစီအစဉ်ထဲမှာ ဓာတ်မြေသြဇာထဲမှာ အမိုးနီးယားဓာတ်ကို လျော့ချဖို့၊ မွေးမြူရေးလုပ်ငန်းတွေ ကိုလည်း ၃၀ ရာခိုင်နှုန်းလျော့ချဖို့ ရည်မှန်းချက်တွေ ပါဝင်ပါတယ်။ 

နယ်သာလန်နိုင်ငံဟာ နွား၊ ဝက်နဲ့ တခြား တိရစ္ဆာန်တွေ မွေးမြူရေး အကြီးအကျယ်လုပ်ကိုင်တဲ့ နိုင်ငံ ဖြစ်ပါတယ်။  

ရုရှားရဲ့ ကောက်ပဲသီးနှံစစ်ပွဲကြောင့် ဖြစ်လာတဲ့ ကမ္ဘာ့စားနပ်ရိက္ခာ အကျပ်အတည်းဟာ ညတွင်းချင်း ပြီးသွားမှာ မဟုတ်ဘူးလို့ ဂျာမနီ နိုင်ငံခြားရေးဝန်ကြီး အာနာလေယာ ဘယ်ယာဘော့ခ်က ကုလသမဂ္ဂ အစည်းအဝေးအတွင်း နိုင်ငံခြားရေးဝန်ကြီး အယောက် ၃၀ လောက်ကို မေ ၁၈ ရက်မှာ ပြောလိုက်ပါတယ်။

"အငတ်ဘေးဆိုက်စေမယ့် အချက်အလက် အားလုံးကို ကျမတို့ အာရုံစိုက်ထားရမယ်၊ရာသီဥတု အကျပ်အတည်းကိုလည်း ကျမတို့ ကိုင်တွယ်ဖြေရှင်းရမယ်" လို့ ဂျာမနီနိုင်ငံရဲ့ ဂရင်းပါတီဝင် ဝန်ကြီးက ပြောပါတယ်။

"မိုးခေါင်တာ၊ ရေကြီးတာနဲ့ မိုးအလွန်အမင်း ရွာတာတွေကြောင့် လယ်သမားတွေ ထိခိုက်တာနည်းအောင် ကျမတို့ ကူညီရမယ်" လို့လည်း သူက ဆက်ပြောပါတယ်။

ဒီနှစ် စားနပ်ရိက္ခာ လုံခြုံရေးနဲ့ ပတ်သက်ပြီး ဂျာမန်အစိုးရဟာ ယူရိုငွေ လေးဘီလီယံ စီစဉ်ထားခဲ့တယ်၊ ဒါဟာ ပေါင်မုန့်ဈေးနှုန်း ထိုးတက်နေတဲ့ အာဖရိကနဲ့ အရှေ့အလယ်ပိုင်းကနေ ပေးတဲ့ ဥပမာပဲလို့လည်း သူက ပြောပါတယ်။

ကောက်ပဲသီးနှံနဲ့ ဓာတ်မြေဩဇာ ပြည်ပတင်ပို့မှုအပေါ် ဒဏ်ခတ်မှာ မဟုတ်ဘူးလို့ ပြောတဲ့ ရုရှားရဲ့ သတင်းမှားကို မယုံဖို့ကိုလည်း သူက တခြား နိုင်ငံခြားရေးဝန်ကြီးတွေကို ဆော်ဩပါတယ်။

ဘယ်ယာဘော့ခ်က စကားမပြောခင် ကုလသမဂ္ဂ အတွင်းရေးမှူးချုပ် အန်တိုနီယို ဂူတားရက်စ်က မိန့်ခွန်းပြောရာမှာ ယူကရိန်းရဲ့ ကောက်ပဲသီးနှံတွေနဲ့ ရုရှား ဓာတ်မြေဩဇာတွေ ပြည်ပတင်ပို့မှု ပြန်စနိုင်ဖို့ ရုရှား၊ ယူကရိန်း၊ တူရကီ၊ အမေရိကန်နဲ့ ဥရောပသမဂ္ဂတို့နဲ့ အကြိတ်အနယ် ဆက်သွယ် ဆွေးနွေးနေတယ်လို့ ပြောခဲ့ပါတယ်။