နည်းပြ ရက်ဖ်ရန်းနစ်ခ်ဟာ မန်ယူအသင်းမှာ လုံလောက်တဲ့အချိန် မရခဲ့ကြောင်း သြစတြီးယား အသင်းခေါင်းဆောင် ဒေးဗစ်အလာဘာက ပြောပါတယ်။
နည်းပြ ရန်းနစ်ခ်ဟာ မူလက သြစတြီးယားလက်ရွေးစင်နည်းပြ ရာထူးနဲ့ မန်ယူအသင်း အကြံပေးရာထူး ၂ ခုကို တပြိုင်နက်တည်း တာဝန်ယူဖို့ စီစဉ်ခဲ့ပေမဲ့ ယူနိုက်တက်အကြံပေးရာထူးကနေ နုတ်ထွက်ဖို့ ဆုံးဖြတ်ခဲ့တာပါ။
လက်ရှိအချိန်မှာ မိခင်နိုင်ငံ သြစတြီးယားလက်ရွေးစင်အသင်းကို ကိုင်တွယ်နေတဲ့ ရန်းနစ်ခ်ဟာ ပွဲဦးထွက်ပွဲစဉ်မှာပဲ ခရိုအေးရှားအသင်းကို ၃ ဂိုး ဂိုးမရှိနဲ့ အနိုင်ရခဲ့ပြီး ဒုတိယမြောက်ပွဲစဉ်မှာ ဒိန်းမတ်ကို ရှုံးနိမ့်ခဲ့ပါတယ်။
သြစတြီးယားနောက်ခံလူ ဒေးဗစ်အလာဘာကတော့ နည်းပြ ရန်းနစ်ခ်ဟာ ပွဲကြိုပြင်ဆင်ရာမှာ အလွန်ကောင်းမွန်ပြီး ပွဲကစားချိန်မှာလည်း ပြိုင်ဘက်အသင်းကို အသက်ရှူခွင့်တောင်မပေးဘဲ ကစားစေသူဖြစ်လို့ အသင်းအတွက် ကောင်းမွန်ကြောင်း ချီးကျူးခဲ့ပါတယ်။
သူဟာ မန်ယူနိုက်တက်မှာတော့ လုံလောက်တဲ့အချိန် မရခဲ့တာကြောင့် အကောင်းဆုံးပုံစံ မရခဲ့တာဖြစ်ပြီး ဘောလုံးအကြောင်းကို နောကျေအောင်သိသူဖြစ်တယ်လို့ အသင်းခေါင်းဆောင် အလာဘာက ပြောပါတယ်။
ရန်းနစ်ခ်ဟာ မန်ယူအသင်းကို ပြီးခဲ့တဲ့ ၂၀၂၁ ခုနှစ် နိုဝင်ဘာလက စတင်တာဝန်ယူခဲ့ပြီး ရာသီအကုန်မှာ အသင်းနဲ့ လမ်းခွဲခဲ့တာ ဖြစ်ပါတယ်။
အသင်းဟောင်းတွေမှာ မြေတောင်မြှောက်ပေးခဲ့တဲ့ ကစားသမား ၆ ဦး လီဗာပူးအသင်းမှာ ကစားနေတဲ့အပေါ် မန်ယူနည်းပြ ရန်းနစ်ခ်က ဂုဏ်ယူကျေနပ်နေပါတယ်။
ဂျာမန်နည်းပြကြီး ရက်ဖ်ရင်းနစ်ဟာ ဟော့ဖန်ဟိမ်း၊ ရှော်ကေး၊ လိုက်ဇစ်နဲ့ ဆဲလ်ဘက်အသင်းတွေမှာ နည်းပြနဲ့ အားကစားဒါရိုက်တာ တာဝန်တွေ ထမ်းဆောင်ခဲ့ပါတယ်။
အဲဒီကလပ်တွေက သူမြေတောင်မြှောက်ပေးပြီး ပွဲထွက်ကစားခွင့်ပေးခဲ့တဲ့ ကစားသမား၆ ဦးဟာ လက်ရှိအချိန်မှာတော့ လီဗာပူးအသင်းမှာ ကစားနေပါတယ်။
နည်းပြ ရန်းနစ်ခ်ဟာ တိုက်စစ်မှူး ဖေမီနိုကို ဟော့ဖန်ဟိမ်းအသင်းမှာ ပွဲကစားခွင့်ပေးခဲ့သလို နောက်ခံလူ မာတစ်ကို ရှော်ကေးအသင်းမှာ ပွဲထွက်ခွင့်ပေးခဲ့ပါတယ်။ အလားတူ တိုက်စစ်မှူးမာနေး၊ နောက်ခံလူ ကိုနိတ်၊ ကွင်းလယ်လူတွေဖြစ်ကြတဲ့ နာဘီကီတာနဲ့ မီနာမီနိုတို့ ကိုလည်း ဆဲလ်ဘက်အသင်းမှာ ပွဲထွက်ခွင့်တွေပေးခဲ့ပြီး အရောင်တင်ပေးခဲ့တာပါ။
လီဗာပူးအသင်းလို့ ကမ္ဘာ့အကောင်းဆုံးအသင်းတသင်းမှာ သူ့ရဲ့ ကစားသမားဟောင်း ၆ ဦး ရှိနေတာဟာ တိုက်ဆိုင်မှု သက်သက်မဟုတ်ဘဲ နည်းပြကလော့ပ်နဲ့ ဘောလုံးဒနဿချင်း တူညီမှုကြောင့်ဖြစ်တယ်လို့ နည်းပြ ရန်းနစ်ခ်က ပြောပါတယ်။
မန်ယူအသင်းဟာ ဧပြီ ၂ဝ ရက် မနက် ၁ နာရီခွဲ လီဗာပူးနဲ့ အမ်ဖီးလ်ကွင်းမှာသွားရောက် ကစားရမှာဖြစ်ပါတယ်။
