စစ်ကိုင်းတိုင်း ကလေးမြို့နယ် နတ်ချောင်းရွာမှာ ဧပြီ ၂၅ ရက်မနက်ပိုင်းက စစ်ကောင်စီတပ်တွေက ဒေသခံတွေရဲ့နေအိမ်တွေကို မီးရှို့ ဖျက်ဆီးခဲ့ကြတယ်လို့ သိရပါတယ်။
ဒေသခံတဦးက “အခုတော့ ပြေးနေရတယ်။ ရွာနဲ့ မနီးမဝေး သူတို့နဲ့လွတ်မယ့်နေရာကို။ ရွာကို မီးရှို့နေတာ မြင်ရတယ်။ အိမ်ခြေဘယ်လောက်ရှို့ခံရလဲဆိုတာတော့ မမြင်ရတဲ့အတွက် သေချာ မပြောနိုင်ဘူး။ မီးခိုးတွေ မြင်ရပုံအရ များနိုင်တယ်” လို့ ပြောပါတယ်။
စစ်ကောင်စီတပ်တွေဟာ ကလေးမြိုနယ်တောင်ပိုင်းက ရွာတွေကို ထိုးစစ်ဆင်နေပြီး ပြည်သူရဲ့ နေအိမ်တွေကို မီးရှို့ဖျက်ဆီးကာ ဒေသခံတွေကိုလည်း ဖမ်းဆီးသတ်ဖြတ်နေတယ်လို့ ဆိုပါတယ်။
လတ်တလော ကလေး-ဂန့်ဂေါလမ်းမှာ စစ်ကောင်စီတပ်နဲ့ ကလေး PDF တွေကြား တိုက်ပွဲတွေဖြစ်ပွားနေတာကြောင့် ဒေသခံတွေ ခရီးမသွားဖို့ ကလေး PDF က သတိပေးထားပါတယ်။
နတ်ချောင်းရွာကို စစ်ကောင်စီတပ်က မီးရှို့ခံရတာဟာ အခုဆို ၄ ကြိမ်လောက်ရှိပြီး ပြီးခဲ့တဲ့နှစ်ဒီဇင်ဘာ ၂၂ ရက်နေ့က ပထမအကြိမ် လူနေအိမ် ၄၃ လုံး၊ အခုနှစ် ဇန်နဝါရီက ဒုတိယအကြိမ် လူနေအိမ် ၇၂ လုံးနဲ့ ဧပြီ ၁၁ ရက်နေ့က အိမ်လုံးရေ ၁၀၀ ကျော် စုစုပေါင်း အိမ်ခြေ ၂၀၀ ကျော် မီးရှို့ဖျက်ဆီးခဲ့တာလို့ ဒေသခံတွေက ပြောပါတယ်။
စစ်ကိုင်းတိုင်းဒေသကြီး၊ ကလေးမြို့နယ်၊ နတ်ချောင်းကျေးရွာမှာ ရန်ကင်းဘုန်းတော်ကြီးကျောင်းမှာ တပ်စွဲနေထိုင်တဲ့ စစ်ကောင်စီတပ်က ဇန်နဝါရီ ၆ ရက်နေ့ နေ့လယ် ၂ နာရီခွဲလောက်မှာ ပြည်သူနှစ်ဦးကို ပစ်ခတ်သတ်ဖြတ်ခဲ့တယ်လို့ ဒေသခံတွေက ပြောပါတယ်။
အခြေအနေ တည်ငြိမ်ပြီလို့ ထင်မှတ်ပြီး ကျေးရွာအတွင်းကို ပြန်လည်နေထိုင်ဖို့ ဝင်ရောက်လာတဲ့ ဒေသခံတွေထဲက နတ်ချောင်းကျေးရွာ၊ ရန်အောင်မြင်ရပ်ကွက်က အမျိုးသားနှစ်ဦးကို စစ်ကောင်စီက အကြောင်းမဲ့ပစ်ခတ်သတ်ဖြတ်ခဲ့တာလို့ ဆိုပါတယ်။
ဒေသခံတဦးက “အခြေအနေ တည်ငြိမ်လောက်ပြီထင်လို့ ပြန်လာတာပါ။ စစ်ဘေးရှောင်နေတဲ့နေရာကလည်း ဒုက္ခတွေ များလွန်းလို့ ငြိမ်လောက်ပြီထင်တာ အသက်မသေရုံပဲ ပြေးခဲ့ရတယ်။ တစ်ယောက်က အူအခွေလိုက်ထွက်ကျပြီးသေနေတယ်။ တစ်ယောက်ကတော့ နှိပ်စက်ထားပြီး ကြိုးဆွဲချ သတ်ထားတာကိုတွေ့တယ်။”
တချို့ရပ်ကွက်တွေမှာ လမ်းကြား လမ်းသွယ်တွေထဲအထိ စစ်ကောင်စီတပ်က ဝင်ရောက်ပစ်ခတ်တာကြောင့် သေဆုံးတာတွေလည်း ရှိတယ်လို့ မျက်မြင်တွေ့သူတွေက ပြောပါတယ်။
ကျေးရွာဒေသခံတွေဟာ စစ်ဘေးရှောင်နေရတာဟာ နှစ်ပတ်ကျော်ကြာမြင့်လာတဲ့အတွက် ကျေးရွာအတွင်းပြန်လည်နေထိုင်ဖို့ ဝင်ရောက်လာရာမှာ အခုလို သတ်ဖြတ်ခံခဲ့ရတာဖြစ်ပါတယ်။
နတ်ချောင်းကျေးရွာဘက်ကနေ ချင်းပြည်နယ်နယ်စပ်၊ ဝေဘူလမြို့ဘက်ကို ထိုးစစ်ဆင်နေတဲ့ စစ်ကောင်စီတပ်ဖွဲ့နဲ့ PDF Kalay၊ RKDF၊ ပကဖ(ကလေး)၊ CNDFနဲ့ ZOMI PDF ပူးပေါင်းအဖွဲ့တို့ ဇန်နဝါရီ ၆ ရက်နေ့ မနက်ပိုင်းကစတင်ပြီး တိုက်ပွဲအပြင်းအထန်ဖြစ်ပွားခဲ့ကြတယ်လို့ သိရပါတယ်။
