အမေရိကန်ကြားဖြတ်ရွေးကောက်ပွဲအပြီး ရီပတ်ဘလစ်ကန်ပါတီဝင်တွေ လွှတ်တော်အတွင်း လူများစုနေရာကို ပွတ်ကာသီကာ အနိုင်ရပြီးတဲ့နောက် တစ်ရက်အကြာမှာ လွှတ်တော်ရဲ့ ဒီမိုကရက်တစ်ခေါင်းဆောင်တာဝန်ကနေ နုတ်ထွက်မယ်လို့ အောက်လွှတ်တော်ဥက္ကဋ္ဌ နန်စီပေလိုစီက နိုဝင်ဘာ ၁၇ ရက်မှာ ပြောပါတယ်။

ကာလီဖိုးနီးယားပြည်နယ်က လစ်ဘရယ်ဝါဒီ အသက် ၈၂  နှစ်အရွယ်ရှိပြီဖြစ်တဲ့ ပေလိုစီဟာ ၃၅ နှစ်ကြာလုပ်ဆောင်ခဲ့သည့်အတိုင်း အောက်လွှတ်တော်မှာ ဆန်ဖရန်စစ္စကို ကိုယ်စားပြုပြီး ဆက်ရှိနေမယ်လို့ ပြောခဲ့ပါတယ်။

ရီပတ်ဘလီကန်တွေဟာ ပြီးခဲ့တဲ့ သီတင်းပတ်က လွှတ်တော်ရွေးကောက်ပွဲတွေအပြီးမှာ အောက်လွှတ်တော်ကို ထိန်းချုပ်နိုင်မယ်လို့ ခန့်မှန်းထားပြီး၊ ဒီမိုကရက်တစ် သမ္မတ ဂျိုးဘိုင်ဒင်ရဲ့ ဥပဒေပြုရေး အစီအစဉ်ကို ဟန့်တားနိုင်စေမယ့် လွှတ်တော်တွင်း အမတ်နေရာ အများစုကို ပွတ်ကာသီကာ ရရှိနိုင်ပါတယ်။

ဒီမိုကရက်ပါတီဝင်တွေကတော့ အထက်လွှတ်တော်ကို ဆက်လက်ထိန်းချုပ်ထား ပါတယ်။ အောက်လွှတ်တော်ထဲက ဒီမိုကရက်တွေဟာ သူတို့ရဲ့ ခေါင်းဆောင်တွေကို နိုဝင်ဘာ ၃၀ ရက်မှာ မဲပေးရွေးချယ်ဖို့ စီစဉ်ထား ပါတယ်။

နယူးယောက်က ကိုယ်စားလှယ်ဟက်ကင်းစ် ဂျက်ဖရီစ်ဟာ အောက်လွှတ်တော်မှာ ထိပ်တန်း ဒီမိုကရက်တစ်အဖြစ် အစားထိုးဖို့ ကြိုးပမ်းနိုင်ပါတယ်။ ဂျက်ဖရီဟာ အောက်လွှတ်တော်မှာ အဓိက ပါတီကြီးတွေထဲက တပါတီကို ဦးဆောင်မယ့် ပထမဆုံး လူမည်းအမတ် ဖြစ်လာမှာပါ။ 

အီဂျစ်နိုင်ငံမှာ နိုဝင်ဘာ ၁၁ရက်က ကျင်းပတဲ့ ကုလသမဂ္ဂရာသီဥတုဆိုင်ရာ ထိပ်သီးအစည်းအဝေးမှာ အမေရိကန် ဒီမိုကရက်တစ် လွှတ်တော်အမတ်တွေဟာ ဖွံ့ဖြိုးဆဲနိုင်ငံတွေအတွက် ရာသီဥတုဆိုင်ရာ တရားမျှတမှုအတွက် သူတို့ရဲ့ကတိကဝတ်တွေကို အလေးပေး ပြောကြားခဲ့ပါတယ်။ 

ဒီ COP27 အစည်းအဝေးဟာ ကလေးတွေအတွက် ကမ္ဘာမြေကို ကယ်တင်ဖို့ အလေးအနက် ထားတယ်ဆိုတာကို သံသယအားလုံး ရှင်းစေဖို့အတွက် ဖြတ်ကျော်ရမယ့် အဆင့်နေရာတခုဖြစ်ဖို့ မျှော်လင့်ကြောင်း အမေရိကန် အောက်လွှတ်တော် ဥက္ကဋ္ဌ နန်စီပေလိုစီက ပြောပါတယ်။

ရာသီဥတုအကျပ်အတည်းကို ကိုင်တွယ်ဖြေရှင်းရာမှာ သဘာဝပတ်ဝန်းကျင်ပိုင်း တရားမျှတမှု၊ စီးပွားရေးပိုင်း တရားမျှတမှုနဲ့ လူမှုရေးပိုင်း တရားမျှတမှု ပြဿနာတွေကို ကြုံတွေ့နေရတာဖြစ် ကြောင်း နန်စီပေလိုစီက ပြောပါတယ်။ 

အမေရိကန်ပြည်ထောင်စုဟာ ရာသီဥတု အပြောင်းအလဲရဲ့ သက်ရောက်မှုတွေကို တိုက်ဖျက်ရာမှာ နိုင်ငံတွေကို အထူးသဖြင့် အာဖရိကရှိ နိုင်ငံတွေကို ကူညီဖို့အတွက် ဘယ်အရင်းအမြစ်ကိုမဆို အသုံးချသွားမှာဖြစ်ကြောင်းလည်း  နန်စီပေလိုစီက မီဒီယာတွေကို မိန့်ခွန်းပြောရာမှာ  ပြောပါတယ်။ 

ပြီးခဲ့တဲ့နှစ်က အမေရိကန်သမ္မတ ဂျိုးဘိုင်ဒန်ဟာ ဖွံ့ဖြိုးဆဲနိုင်ငံတွေမှာ ရာသီဥတု ပြောင်းလဲမှု ဒဏ်ကို လိုက်လျောညီထွေ ဖြစ်အောင် ကူညီပေးဖို့အတွက် ရန်ပုံငွေ နှစ်ဆ တိုးပေးမယ်လို့ ကတိပြုခဲ့ပါတယ်။ 

သမ္မတဘိုင်ဒန် ဟာ ငွေကြေးဖောင်းပွမှု လျှော့ချရေး အက်ဥပဒေကို ဥပဒေအဖြစ် လက်မှတ်ရေးထိုးနိုင်ခဲ့ပြီး၊ ဆိုလာ-နေစွမ်းအင်သုံးနဲ့ လေစွမ်းအင်သုံး ကားတွေနဲ့ လျှပ်စစ်ကားတွေအတွက် ဒေါ်လာဘီလီယံနဲ့ချီတဲ့ ထောက်ပံ့ကြေးတွေ ပါ၀င်တဲ့ ဥပဒေကြမ်းကို လက်မှတ်ရေးထိုးနိုင်ခဲ့ကြောင်း ပေလိုစီက ထောက်ပြခဲ့ပါတယ်။