အမေရိကန်နိုင်ငံ၊ နယူးဂျာစီပြည်နယ် ဘာလင်တန်မြို့ရှိ ဘုရားကျောင်းကြီးတခု မတ်လ ၂၀ ရက်က မီးလောင်ကျွမ်းခဲ့ရာမှာ သူ့ခေါင်မိုးပါ ပြိုကျခဲ့ပြီး မီးသတ်သမားနဲ့ အရေးပေါ်ဝန်ထမ်း ၁၀၀ ကျော် မီးလောင်ကျွမ်းမှုကို ငြိမ်းသတ်ခဲ့ရကြောင်း ဒေသတွင်း မီဒီယာတွေက ဖော်ပြပါတယ်။
ဖီလာဒဲလ်ဖီးယားပြည်နယ်ရဲ့ အရှေ့မြောက်ဘက် နယူးဂျာစီရှိ ဖလောရင့်စ်မြို့ရဲ့ Fountain of Life စင်တာမှာ အရှေ့ဘက်စံတော်ချိန် ညနေ ၆ နာရီလောက်က မီးလောင်ကျွမ်းခဲ့ကြောင်း ဒေသခံ ABC-6 က ထုတ်ပြန်ပါတယ်။
စင်တာရဲ့ အကြီးတန်းသင်းအုပ်ဆရာ ရပ်ဆဲလ် ဟော့ဒ်ဂျင်စ်က တွဲဆက်နေတဲ့ ကျောင်းဆောင်တခုကို ကယ်နိုင်ဖို့ မီးသတ်သမားတွေနဲ့ အရေးပေါ်ဝန်ထမ်းတွေ ကြိုးစားနေကြကြောင်း ပြောပါတယ်။
ဘာကြောင့် မီးစတင်လောင်ကျွမ်းရကြောင်းနဲ့ ဒဏ်ရာရသူရှိမရှိ အတိအကျ မသိရသေးပါဘူး။ ၁၉၇၄ ခုနှစ်က ဖွင့်လှစ်ခဲ့တဲ့ ဘုရားကျောင်းဝင်းထဲမှာ စာသင်ကျောင်း၊ ဝတ်ပြုရာနေရာနဲ့ မိသားစုဘဝစင်တာ တို့လည်း ရှိပါတယ်။
နယူးဂျာစီပြည်နယ်၊ ဂျက်ဆင်မြို့နယ်ရှိ Six Flags Great Adventure အပန်းဖြေဥယျာဉ်မှာ သြဂုတ် ၂၅ ရက် ညပိုင်းက ရိုလာကိုစတာ စီးနင်းမှုမှာ ချွတ်ယွင်းမှုဖြစ်ပြီးနောက် လူအများအပြား ဒဏ်ရာရခဲ့ပြီး ငါးယောက်ကို ဆေးရုံတင်ထားရတယ်လို့ မီဒီယာတွေက ဖော်ပြပါတယ်။
El Toro ရိုလာကိုစတာဟာ စီးနင်းမှုပြီးချိန် လူတွေဆင်းသက်နေကြတုန်း အရှေ့ဘက်ကို တုန်ခါသွားခဲ့တာကြောင့် စီးနင်းသူအများအပြား ခါးနာ ကျောနာ ဒဏ်ရာရခဲ့တာလို့ မျက်မြင်သက်သေတွေက ပြောတယ်လို့ ဆိုပါတယ်။
ဝန်ထမ်းတွေဟာ ရိုလာကိုစတာ စီးနင်းရာလမ်းကြောင်းတွေကို စစ်ဆေးကြည့်ရှုနေကြပေမဲ့ ဘယ်နေရာမှာ ချွတ်ယွင်းသွားတယ်ဆိုတာ မသိရသေးပါဘူး။ လောလောဆယ် ရိုလာကိုစတာစီးခွင့် ပိတ်ထားပါတယ်။
