ရုရှားမြို့တော် မော်စကိုရဲ့ လမ်းတွေပေါ်မှာ မေ ၄ ရက်က စစ်ကားတွေမောင်းရင်း ဒုတိယကမ္ဘာစစ်အတွင်း နာဇီဂျာမန်တွေအပေါ် ဆိုဗီယက်ပြည်ထောင်စုက နိုင်ခဲ့တဲ့ အထိမ်းအမှတ် စစ်ရေးပြပွဲအတွက် အစမ်းလေ့ကျင့်နေပါတယ်။
ကားတွေဖြတ်သွားချိန်မှာ လူအုပ်ကြီးက အရံအတားတွေ နောက်ကနေ ရပ်ကြည့်နေတာပါ။
မေ ၉ ရက်မှာ ကျင်းပမယ့် ဒီနှစ် စစ်ရေးပြပွဲဟာ ယူကရိန်းကို ရုရှားက အထူးစစ်ဆင်ရေး ဆင်နွှဲနေချိန်နဲ့ တိုက်ဆိုင်နေတာပါ။
ရုရှားအစိုးရက ယူကရိန်းအရှေ့ပိုင်းကို မေ ၄ ရက်က ထိုးစစ်ဆင်နေချိန်မှာ ရုရှားရဲ့ နီးကပ်တဲ့ မဟာမိတ် ဘဲလာရုစ်ကလည်း အကြီးစား စစ်ရေးလေ့ကျင့်မယ်လို့ ကြေညာခဲ့ပါတယ်။
မော်စကိုမြို့တော် ရင်ပြင်နီမှာ ကျင်းပမယ့် စစ်ရေးပြပွဲကို ကြီးကြပ်ရင်း သမ္မတ ဗလာဒီမာ ပူတင်က မိန့်ခွန်းပြောဖို့ ရှိပါတယ်။
ရုရှားသမ္မတ ပူတင်က ချီတက်ပွဲနေ့မှာ နိုင်ငံလုံးဆိုင်ရာ စည်းရုံးလှုံ့ဆော်ရေး အမိန့်ချပြီး ယူကရိန်းကို တရားဝင် စစ်ကြေညာမယ်ဆိုတဲ့ ထင်ကြေးတွေကို ကရင်မလင်နန်းတော်က မေ ၄ ရက်က ပယ်ချခဲ့ပါတယ်။
အောင်ပွဲနေ့ အထိမ်းအမှတ် စစ်ရေးပြပွဲအတွက် ရုရှားတင့်ကားတွေ ဧပြီ ၂၈ ရက်က မော်စကိုမြို့လယ်မှာ အစမ်းလေ့ကျင့်နေပါတယ်။
မေ ၉ ရက်၊ နာဇီ ဂျာမနီတွေ လက်နက်ချပြီး ဒုတိယကမ္ဘာစစ် ပြီးဆုံးခြင်း အထိမ်းအမှတ်၊ စစ်ပွဲအောင်နိုင်ခြင်း အထိမ်းအမှတ် စစ်ရေးပြ အခမ်းအနားကို မော်စကိုမှာ နှစ်စဉ် ကျင်းပလေ့ရှိသလို ဒီနှစ်လည်း ကျင်းပဖို့ ပြင်ဆင်နေတာပါ။
ဒီနှစ်အခမ်းအနားကတော့ ရုရှားက ယူကရိန်းမှာ ကျူးကျော်စစ်တိုက်နေတဲ့ အချိန်နဲ့ တိုက်ဆိုင်ပါတယ်။
ရုရှားဟာ ဖေဖော်ဝါရီ ၂၄ ရက်က ယူကရိန်းနိုင်ငံကို ကျူးကျော်တိုက်ခိုက်ဖို့ ထောင်နဲ့ချီတဲ့ တင့်ကားတွေကို စေလွှတ်ခဲ့ပါတယ်။ အခုအချိန်အထိ ယူကရိန်းတပ်တွေက ရုရှားရဲ့ ကျူးကျော်မှုကို ကြံ့ကြံ့ခံ ခုခံနေပြီး အနောက်နိုင်ငံတွေကလည်း ရုရှားနိုင်ငံအပေါ် ဒဏ်ခတ်ပိတ်ဆို့မှုတွေ ချမှတ်ထားပါတယ်။
ရုရှားတပ်တွေဟာ ယူကရိန်းမြို့တော် ကိယက်ဗ်နဲ့ မြောက်ပိုင်းကို သိမ်းယူဖို့ တိုက်ခိုက်တာ မအောင်မြင်တဲ့နောက်မှာ အခုအခါမှာတော့ အရှေ့ဘက် စစ်မျက်နှာကို သဲကြီးမဲကြီး ထိုးစစ်ဆင်နေပြန်ပါတယ်။
အရှေ့ပိုင်းကဒေသ ၂ ခုကို ရုရှားတွေ ထိုးစစ်ဆင်နေတာဟာ ဒီစစ်ပွဲရဲ့ အဆုံးအဖြတ် ဖြစ်လိမ့်မယ်လို့ အနောက်နိုင်ငံတွေက ခန့်မှန်းထားကြပါတယ်။
ရုရှားတပ်တွေဟာ အခုအခါမှာ ရုရှားလိုလားတဲ့ ခွဲထွက်ရေးသမားတွေ တစိတ်တပိုင်း ထိန်းချုပ်ထားတဲ့ ယူကရိန်း အရှေ့ဘက် စစ်မျက်နှာနဲ့ မတ်လကတည်းက ရုရှားတပ်တွေ ထိန်းချုပ်ထားတဲ့ တောင်ပိုင်းဒေသတချို့ကို ခြေကုပ်ယူထားတယ်လို့ ရိုက်တာသတင်းက ဆိုပါတယ်။
