ရုရှားနိုင်ငံ ကော့စ်ထရိုမာ မြို့ရှိ နိုက်ကလပ်တစ်ခုမှာ ညလုံးပေါက်မီးလောင်မှုအတွင်း အနည်းဆုံး လူ ၁၃ ဦး သေဆုံးခဲ့ကြောင်း နိုဝင်ဘာ ၅ ရက်မှာ တာဝန်ရှိသူတွေက ပြောကြားခဲ့ပါတယ်။
မော်စကိုမြို့ရဲ့ အရှေ့မြောက်ဘက် ကီလိုမီတာ ၃၀၀ အကွာက ဗော်လ်ဂါမြစ်ကမ်းနားရှိ ကော့စ်ထရိုမာမြို့က ဘက်စုံသုံး အပန်းဖြေနေရာဖြစ်တဲ့ ပိုလီဂွန် မှာ မီးလောင်မှု ဖြစ်ပွားခဲ့တာပါ။
မနက် ၃ နာရီ ၅ မိနစ်အချိန်မှာ ဒုတိယ မီးသတ်အမိန့်စာ ရောက်ရှိလာပြီးနောက် မီးလောင်မှုကို လယ်ဗယ် ၃ ကို တိုးပြီး ငြှိမ်းသတ်ခဲ့ကြောင်း ကော့စ်ထရိုမာ ဒေသရှိ အရေးပေါ် အခြေအနေဆိုင်ရာ ဝန်ကြီးဌာန-အီမာကွန် ဌာနအကြီးအကဲ ဒီမစ်ထရီ ကော်နိဗ် က ပြောပါတယ်။
ဧရိယာ ၃၅၀၀ စတုရန်းမီတာမှာ မီးပျံ့နှံ့သွားလို့ မီးငြှိမ်းသတ်ရာမှာ ပိုရှုပ်ထွေးသွားပြီး ခေါင်မိုးပြိုကျမယ့်အန္တရာယ်လဲ ရှိခဲ့တယ်လို့ ဆိုပါတယ်။
မနက် ၇ နာရီ ၂၉ မိနစ်မှာ မီးငြိမ်းသွားခဲ့ပြီး ဒဏ်ရာရသူ ၅ ဦးရှိကြောင်း ဒေသဆိုင်ရာ အုပ်ချုပ်ရေးမှူးက ပြောပါတယ်။
တရားရေး စုံစမ်းစစ်ဆေးရေး ကော်မတီရဲ့ ထုတ်ပြန်ချက်မှာ မီးလောင်မှုကြောင့် လူ ၁၃ ဦး သေဆုံးခဲ့ပြီး သေဆုံးသူနဲ့ ဒဏ်ရာရသူ အရေအတွက်ကို ရှင်းရှင်းလင်းလင်း ဆောင်ရွက်နေတယ် လို့ ဖော်ပြထားပါတယ်။
အမျိုးသား တစ်ဦးဟာ အချက်ပြမီးသေနတ်နဲ့ အဆောက်အဦထဲကို ပစ်ခတ်ခဲ့ပြီးနောက်မှာ မီးလောင်မှု ဖြစ်ပွားခဲ့ခြင်းဖြစ်ကြောင်း TASS သတင်းဌာနက စုံစမ်းစစ်ဆေးသူတွေရဲ့ ပြောကြားချက်အတိုင်း ကိုးကားဖော်ပြသွားပါတယ်။
မန္တလေးမြို့မှာ စစ်ကောင်စီအလိုကျ ပါတီပွဲတွေကျင်းပနေတဲ့ နိုက်ကလပ်တွေကို တန်ဆောင်မုန်းလပြည့်နေ့အထိ ပိတ်ထားပေးဖို့ Anonymous Force MDY ပြောက်ကျားအဖွဲ့နဲ့ မဟာမိတ် အဖွဲ့တွေက နိုဝင်ဘာ ၁ ရက်မှာစာထုတ် သတိပေးထားတယ်။
စစ်ကောင်စီအလိုကျ တိုင်းပြည်အေးချမ်းနေတဲ့ပုံစံ ဖန်တီးကာ ပါတီပွဲတွေ ကျင်းပနေတဲ့ မန္တလေးရှိ Zeus၊ Pioneer၊ Bar in Bar စတဲ့ နိုက်ကလပ်တွေကို နောက်ဆုံးအကြိမ် သတိပေးတာလို့ ထုတ်ပြန်ချက်မှာ ဖော်ပြထားပါတယ်။
မန္တလေးမြို့ပြပြောက်ကျားတပ်ဖွဲ့မှ ဗိုလ်ထက်အောင်က “မသိရင် လွတ်လပ်ရေး ရနေသလိုပါပဲ။ အဓိကသွားကြတာတော့ တရုတ်ကပြားတွေ အပါအဝင် အပျော်အပါးမက်တဲ့ လူငယ်တွေ၊ လူကြီးတွေပါ။ တော်လှန်ရေး လုပ်နေလူတွေ အကုန်အားငယ်ရတာပေါ့။ မသိရင် ကျနော်တို့ကပဲ အစွန်းရောက်ပြီး တိုက်ခိုက်နေသလို ခံစားရတယ်။ မြို့ကြီးတွေမှာ အခြေအနေဆိုးပေမဲ့ အပျော်မက်တဲ့ လူတစုကြောင့် စကစရဲ့ ဝါဒဖြန့်စရာ ပုံရိပ်တခုဖြစ်မှာကို တော်လှန်ရေးရဲဘော်အများစုက စိုးရိမ်နေကြတာပါ” လို့ ဒီဗွီဘီကို ပြောပါတယ်။
မန္တလေးမြို့ထဲက ဘားတွေ ကလပ်တွေမှာ လူတွေ အရမ်းစည်ကားနေပြီး စစ်ကောင်စီနဲ့ ပတ်သက်တဲ့ မူးယစ်ဆေးရောင်းသူတချို့လည်း သွားရောက်ကြတယ်လို့ သိရပါတယ်။
နိုက်ကလပ်တွေအနေနဲ့ မြို့ပြပြောက်ကျားတပ်ဖွဲ့တွေရဲ့ သတိပေးစာကို ပူးပေါင်းဆောင်ရွက်ခြင်း မရှိပါက နောင်တရလိမ့်မယ်လို့ Anonymous Force MDY က ပြောပါတယ်။
အလားတူ ရန်ကုန်မြို့မှာလည်း ဘားတွေ၊ ကလပ်တွေမှာ လူတွေ အရမ်းစည်ကားနေပြီး ပုံမှန်သွားလာ ပျော်ပါးနေကြတာ မြင်တွေ့ရပါတယ်။
