မြန်မာအာဏာသိမ်းစစ်တပ်ရဲ့ အကြမ်းဖက်မှုတွေရပ်တန့်ရေး အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်နဲ့ ယူကေနိုင်ငံခြားရေးဝန်ကြီးတို့ တွေ့ဆုံဆွေးနွေးခဲ့ကြတယ်လို့ ဖေဖော်ဝါရီ ၇ ရက်မှာ သတင်းထုတ်ပြန်ပါတယ်။
နိုင်ငံခြားရေးဝန်ကြီးဌာနပြည်ထောင်စုဝန်ကြီး ဒေါ်ဇင်မာအောင်ဟာ ယူကေ နိုင်ငံခြားရေးဝန်ကြီး ဂျမ်းစ်ကလယ်ဗာလီနဲ့ လန်ဒန်မြို့ရှိ ယူကေနိုင်ငံခြားရေးဝန်ကြီးရုံးမှာ ဖေဖော်ဝါရီ ၆ ရက်နေ့ ယူကေစံတော်ချိန် ညနေ ၃ နာရီခွဲအချိန်တွင် တွေ့ဆုံဆွေးနွေးခဲ့ကြတာဖြစ်ပါတယ်။
အဆိုပါဆွေးနွေးပွဲမှာ မြန်မာပြည်အရေးနဲ့ စပ်လျဥ်းပြီး နှစ်နိုင်ငံပူးပေါင်းဆောင်ရွက်ရေး၊ အကြမ်းဖက်စစ်အုပ်စုရဲ့ အကြမ်းဖက်မှုများရပ်တန့်နိုင်ရန် ဆောင်ရွက်နိုင်ရေး၊ လူနည်းစုလူမျိုးများအရေးနဲ့ တခြား အကြောင်းအရာများတွေ ဆွေးနွေးခဲ့ကြတယ်လို့ NUG နိုင်ငံခြားရေးဌာနက သတင်းထုတ်ပါတယ်။
ပြည်ထောင်စုဝန်ကြီးဒေါ်ဇင်မာအောင်ဟာ ယူကေခရီးစဥ်အတွင်း ယူကေအစိုးရရဲ့ တခြားသော သက်ဆိုင်ရာတာဝန်ရှိသူတွေနဲ့လည်း ဆက်လက်တွေ့ဆုံပြီး မြန်မာ့အရေးပူးပေါင်းဆောင်ရွက်နိုင်ဖို့ တွေ့ဆုံဆွေးနွေးသွားမယ်လို့ဆိုပါတယ်။
မြန်မာနိုင်ငံတွင်း စစ်အာဏာရှင်ရဲ့ အကြမ်းဖက်မှုတွေကြောင့် နေရပ်စွန့်ခွာထွက်ပြေးနေကြရတဲ့ စစ်ဘေးရှောင်ပြည်သူတွေအတွက် လူသားချင်းစာနမှုအကူအညီတွေ အမြန်ဆုံးရရှိရေး ကြိုးပမ်း ဆောင်ရွက်သွားမယ်လို့ ဝန်ကြီး ဒေါ်ဇင်မာအောင်က လန်ဒန်ခရီးစဉ်အတွင် ယူကေရောက် မြန်မာအသိုက်အဝန်းနဲ့ တွေ့ဆုံရာမှာ ပြောကြားထားပါတယ်။
Photo-NUG
အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်ရဲ့ တရုတ်နိုင်ငံကိုလာရောက်မယ့် ခရီးစဉ်ကို ကြိုဆိုပါကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝမ်ဝင်ဘင်က ဇန်နဝါရီ ၁၇ ရက် ပုံမှန်သတင်းစာရှင်းလင်းပွဲမှာ ပြောပါတယ်။
ဘလင်ကန်ဟာ ဖေဖော်ဝါရီ ၅ ရက်မှာ တရုတ်နိုင်ငံကို သွားရောက်မှာဖြစ်ကြောင်း အမေရိကန်မီဒီယာ ထုတ်ပြန်ချက်နဲ့ပတ်သက်တဲ့ မေးခွန်းကို ဝမ်ဝင်ဘင်က တုံ့ပြန် ဖြေကြားလိုက်တာပါ။
“တရုတ်နိုင်ငံဟာ နိုင်ငံခြားရေးဝန်ကြီး ဘလင်ကန်ရဲ့ တရုတ်နိုင်ငံခရီးစဉ်ကို ကြိုဆိုပါတယ်။ တရုတ်နဲ့ အမေရိကန် နှစ်နိုင်ငံစလုံးဟာ အခု သီးခြားအစီအစဉ်တွေနဲ့ ပတ်သက်ပြီး ဆက်သွယ်နေကြပါပြီ” လို့ ဝမ်က ပြောပါတယ်။
တရုတ်အစိုးရဟာ သမ္မတ ရှီကျင့်ဖျင် အဆိုပြုထားတဲ့ အပြန်အလှန်လေးစားမှု၊ ငြိမ်းချမ်းစွာ အတူယှဉ်တွဲနေထိုင်ရေးနဲ့ နှစ်ဦးနှစ်ဖက် အကျိုးရှိရှိ ပူးပေါင်းဆောင်ရွက်ရေး မူကြီးသုံးရပ်အရ တရုတ်-အမေရိကန် ဆက်ဆံရေးကို အမြဲတစေရှုမြင်ပြီး ဖွံ့ဖြိုးတိုးတက်အောင် လုပ်ဆောင်နေကြောင်းလည်း ဆိုပါတယ်။
ဒါ့အပြင် အမေရိကန်အနေနဲ့ ထိပ်တိုက်ရင်ဆိုင်မယ့်အစား တွေ့ဆုံဆွေးနွေးရေးကို ကိုင်စွဲပြီးတော့ တရုတ်နိုင်ငံအပေါ် မှန်ကန်တဲ့အမြင်ကို ချမှတ်လိမ့်မယ်လို့ မျှော်လင့်ပါကြောင်းလည်း ပြောပါတယ်။
ဘလင်ကန်ဟာ ဖေဖော်ဝါရီ ၅ ရက်မှ ၆ ရက်အထိ တရုတ်နိုင်ငံခြားရေးဝန်ကြီး ချင်ဂန်းနဲ့ ပေကျင်းမှာ တွေ့ဆုံမှာဖြစ်ကြောင်း ပေါ်လစ်တီကို သတင်းဌာနက ဖော်ပြခဲ့တာ ဖြစ်ပါတယ်။
