ရိုမေးနီးယားနိုင်ငံ အလယ်ပိုင်းမှာ မြောက်အတ္တလန္တိတ် စစ်ရေးမဟာမိတ်အဖွဲ့ (နေတိုး) အဖွဲ့ဝင် နိုင်ငံတွေက စစ်သားတွေ နိုဝင်ဘာ ၉ ရက်က စစ်ရေးလေ့ကျင့်ခဲ့ပါတယ်။
ရိုမေးနီးယား၊ အမေရိကန်၊ ဒတ်ခ်ျနဲ့ ပြင်သစ်တို့ဟာ ရိုမေးနီးယားမြို့တော် ဘူချာရက်စ်ကနေ ၁၆၄ မိုင်ဝေးတဲ့ စင်ကူအရပ်ကနေ ‘Justice Sword’ လေ့ကျင့်ခန်းရဲ့ တစိတ်တပိုင်းအဖြစ် စစ်ရေး ပါဝင်လေ့ကျင့်ခဲ့ပါတယ်။
ဒီစစ်ရေးလေ့ကျင့်မှုမှာ စစ်သား ၁,၂၀၀ လောက် ပါဝင်ခဲ့ပြီး သံချပ်ကာ သယ်ဆောင်သူတွေ၊ (APCs)၊ တင့်ကားတွေ၊ လေးတဲ့အမြောက်တွေ၊ ဒုံးကျည်တွေနဲ့ ဒရုန်းတွေကိုသုံးပြီး စစ်ဆင်ရေးတွေ လုပ်ဆောင်ခဲ့ပါတယ်။
Justice Sword လေ့ကျင့်ခန်းကို အောက်တိုဘာ ၂၇ ရက်က စတင်ခဲ့ပြီး နိုဝင်ဘာ ၁၁ ရက်မှာ ပြီးဆုံးမှာပါ။
နေတိုးအဖွဲ့ဝင်တွေဟာ ဖေဖော်ဝါရီ ၂၄ ရက်မှာ ရုရှားက ယူကရိန်းကို မကျူးကျော်မီ ယူကရိန်းနဲ့ နယ်နိမိတ်တလျှောက် ရုရှားရဲ့ စစ်ရေးတည်ဆောက်မှုကို တုံ့ပြန်တဲ့အနေ ဥရောပ အရှေ့ဘက်ခြမ်းမှာရှိတဲ့ နိုင်ငံတွေဆီကို တပ်ဖွဲ့ဝင်တွေ စေလွှတ်ခဲ့ပါတယ်။
ရိုမေးနီးယားနိုင်ငံဟာ ၂၀၀၄ ခုနှစ်ကတည်းက နေတိုးအဖွဲ့ဝင်နိုင်ငံ ဖြစ်လာခဲ့ပြီးနောက် ရိုမေးနီးယားနိုင်ငံထဲမှာ ပြင်သစ် ဦးဆောင်တဲ့ နိုင်ငံစုံ မြေပြင်တပ်ဖွဲ့လည်းဖြစ်တဲ့ နေတိုးတပ်ဖွဲ့ဝင် အယောက် ၄,၀၀၀ အထိ ရှိနေပါတယ်။
မြောက်အတ္တလန္တိတ် စစ်ရေးမဟာမိတ်အဖွဲ့ နေတိုး အဖွဲ့ဝင်နိုင်ငံတွေက ယူကရိန်းကို နောက်ထပ် လက်နက်တွေ ပံ့ပိုးပေးဖို့ သဘောတူလိုက်ပြီလို့ ရိုက်တာသတင်းမှာရေးပါတယ်။
ဘယ်လ်ဂျီယံနိုင်ငံ ဘရပ်ဆဲလ်မြို့မှာ ဧပြီ ၇ ရက် ပြီးဆုံးခဲ့တဲ့ နိုင်ငံခြားရေးဝန်ကြီးတွေရဲ့ ၂ရက်ကြာ အစည်းအဝေးအတွင်း ဆုံးဖြတ်ချက် ချလိုက်ကြတာဖြစ်ပြီး နေတိုးရဲ့ ဆုံးဖြတ်ချက်ထဲမှာ အသေးစိတ် ကတိကဝတ်တွေတော့ မပါသေးပါဘူး။
နေတိုးအဖွဲ့ဝင် နိုင်ငံတွေဟာ ယူကရိန်းကို မတူကွဲပြားတဲ့ လက်နက်တွေ ပံ့ပိုးနေခဲ့ပြီးပြီလို့ နေတိုးအတွင်းရေးမှူးချုပ် ယန်းစတော့တန်ဘာ့ဂ်က ပြောပါတယ်။
ဒီအစည်းအဝေးကို ယူကရိန်းနိုင်ငံခြားရေးဝန်ကြီး ဒမစ်ထရို ခူလေဘာကိုလည်း ဖိတ်ကြားခဲ့ပြီး ဖြစ်နိုင်သမျှ အမြန်ဆုံး ယူကရိန်းကို စစ်ရေးအထောက်အပံ့တွေနဲ့ လက်နက်တွေပိုပြီး ပို့ပေးကြဖို့ နေတိုးအဖွဲ့ဝင် နိုင်ငံတွေကို ဆော်ဩခဲ့ပါတယ်။
ရုရှားအပေါ် ဒဏ်ခတ်တာတွေအားဖြည့်လုပ်ဆောင်ကြဖို့လည်း ခူလေဘာက နေတိုးအဖွဲ့ဝင် နိုင်ငံတွေကို ဆော်ဩခဲ့ပါတယ်။
ယူကရိန်းကို နောက်ထပ်လက်နက်တွေ ပံ့ပိုးရေးကိစ္စနဲ့ ပတ်သက်ပြီး နေတိုးအဖွဲ့ဝင်နိုင်ငံတွေ သဘောထားကွဲလွဲနေဆဲပဲလို့ အကဲခတ်တွေက ပြောပါတယ်။
ယူကရိန်းကို လက်နက်တွေ ပံ့ပိုးဖို့ ပိုလန်နဲ့ လစ်သူအေးနီးယားတို့က နေတိုးကို တိုက်တွန်းပေမဲ့ ဂျာမနီအပါအဝင် တချို့ နိုင်ငံတွေကတော့ ပဋိပက္ခထဲမှာ သိပ်များများ ပါဝင်ပတ်သက်ဖို့ မလိုလားဘဲ သတိနဲ့ နေနေကြတယ်လို့လည်း မီဒီယာ တွေက သုံးသပ်ဖော်ပြပါတယ်။
နေတိုးက ယူကရိန်းကို နောက်ထပ်စစ်ရေး အထောက်အပံ့ပေးဖို့ ဆုံးဖြတ်ချက်ဟာ အကူအညီရမှာ မဟုတ်ဘဲ ရုရှား- ယူကရိန်း ညှိုနှိုင်းဆွေးနွေးပွဲကို အဖျက်သဘော သက်ရောက်စေ လိမ့်မယ်လို့ ရုရှား သမ္မတရုံး ပြန်ကြားရေး အတွင်းဝန် ဒမစ်ထရီ ပဲ့စ်ကို့ဗ်က ပြောပါတယ်။
