ကချင်ပြည်နယ်၊ ပူတာအိုခရိုင်ထဲက နောင်မွန်မြို့နယ်မှာ ဩဂုတ် ၂၉ ရက်လောက်ကစပြီး မိုးအဆက်မပြတ်ရွာသွန်းကာ ရေကြီးလို့ လယ်ယာဧက ၁၅၀ ကျော် ပျက်စီးသွားတယ်လို့ နောင်မွန် လူမှုကူညီရေးအသင်း တာဝန်ရှိသူတယောက်က ဒီဗွီဘီကို ပြောပါတယ်။
“ကဆန်ချောင်းနဲ့ ရနမ်ချောင်းရေကြီးလို့ လယ်ယာဧက ၁၅၁ ခန့် ပျက်စီးသွားတယ်။ ၇ ဧကတော့ ကျောက်ပုံဖြစ်သွားတယ်။ လုံးဝပျက်စီးသွားတယ်။ အိမ်မွေးတိရစ္ဆာန်တွေလည်း ပါသွားတယ်။ နောင်မွန်မြို့နယ် ဒေသခံတွေက နှစ်တိုင်း ၉ လနဲ့ ၁၀ လကြား ကောက်သစ်မပေါ်ခင် စားသောက်ရေး အခက်တွေ့ကြတယ်။”
နောင်မွန် လူမှုကူညီရေးအသင်းအနေနဲ့ အရင်နှစ်တွေက ကူညီနိုင်ခဲ့ပေမဲ့ အခုနှစ်မှာ မကူညီနိုင်လို့ မိဘပြည်သူတွေအနေနဲ့ ဝိုင်းဝန်းကူညီပေးကြဖို့ နောင်မွန် လူမှုကူညီရေးအသင်း တာဝန်ခံက ပြောပါတယ်။
နောင်မွန်မြို့နယ်မှာ မိုးရာသီရောက်တိုင်း အသွားအလာခက်ခဲပြီး ဒေသခံပြည်သူတွေ စားသောက်ရေး အခက်တွေ့တယ်လို့ နောင်မွန်မြို့နယ် ရှိမန်ကျေးရွာခံ ပြည်သူတယောက်ကလည်း ပြောပါတယ်။
“ဒီနှစ်က ကုန်ဈေးနှုန်းလည်းတက်တယ်။ ရေကြီးတာလည်း ကဆန်ချောင်းဘေးက ရွာတိုင်း အိမ်တွေပါ မြုပ်တဲ့ထိ ရေကြီးသွားတယ်။ နဂိုကတည်းက ဦးလေးတို့ဒေသက အခက်အခဲ အများကြီးနဲ့ ရင်ဆိုင်နေရတာပါ။ ခု ရေကြီးတော့ လမ်းကသွားလို့မရ၊ ပူတာအိုလည်း မတက်နိုင်တဲ့ကြားမှာ စားဝတ်နေရေးအတွက် ရုန်းကန်ရတယ်။”
နောင်မွန်မြို့နယ်ဟာ မြန်မာနိုင်ငံရဲ့ အမြင့်ဆုံးတောင် ခါကာဘိုရာဇီတောင်ရှိရာ မြို့နယ်ဖြစ်ပြီး လမ်းပန်းဆက်သွယ်ရေး၊ ဖုန်းလိုင်း၊ အင်တာနက်လိုင်းတွေမရလို့ ဒေသခံပြည်သူတွေ ကဏ္ဍစုံ အခက်အခဲနဲ့ ရင်ဆိုင်နေရပါတယ်။
ပူတာအိုခရိုင်မှာ ၂၀၁၈ ခုနှစ်ကလည်း ရေကြီးခဲ့လို့ ပူတာအိုမြို့နယ်ထဲက အထက်ဆန်ခေါင်ရွာမှာ လူနေအိမ်နဲ့ လယ်ဧကပေါင်း မြောက်မြားစွာ ပျက်စီးခဲ့သလို နောင်မွန်မြို့နယ်မှာလည်း လယ်ယာတွေ ပျက်စီးဆုံးရှုံးခဲ့တယ်လို့ သိရပါတယ်။
ကချင်ပြည်နယ်၊ ပူတာအိုခရိုင် နောင်မွန်မြို့နယ်က ကဆန်ချောင်းနဲ့ ရနမ်ချောင်းဟာ စက်တင်ဘာ ၃ ရက်နေ့က စတင်ကာ မိုးသည်းထန်စွာရွာသွန်းပြီး ချောင်းရေကြီးလာတဲ့အတွက် လယ်ဧက ၂၀ ကျော်နဲ့ လူနေအိမ်တွေ ရေလွမ်းမိုး ပျက်စီးသွားတဲ့အတွက် အကူအညီတွေ လိုအပ်တယ်လို့ ဒေသခံတွေက ပြောပါတယ်။
“၃ ရက်နေ့ကတည်းက ချောင်းရေ စကြီးတာ။ နေအိမ်တွေ ရေလွမ်းမိုးသွားတယ်။ အသုံးအဆောင်ပစ္စည်းတွေလည်း ရေလွှမ်းသွားတယ်။ စပါးကျီလည်း ရေမြုပ်သွားတယ်။ ရေတက်လါတော့ စိုက်ခင်းတွေလည်း နုန်းမြေတွေတင်ကျန်ခဲ့တယ်။ အဓိက လိုအပ်တာကတော့ စားသောက်ကုန်နဲ့ ဆေးဝါးပစ္စည်းပဲ” လို့ ဒေသခံအမျိုးသားတဦးက ပြောပါတယ်။
ရေကြီးရေလျှံမှုဖြစ်ပွားခဲ့တဲ့အတွက် နောင်မွန်မြို့က လူနေအိမ်ခြေ ၅၀ ကျော် ရွှေ့ပြောင်းခဲ့ရပြီး လယ်ဧက ၂၀ ကျော် ရေလွှမ်းမိုးခံခဲ့ရတာပါ။
“နောင်မွန်မြို့နဲ့ ရမ်ဘော့၊ ပါဘော့ ကျေးရွာတွေက လယ်တွေ ပျက်စီးသွားတယ်။ သိရသလောက် အားလုံးပေါင်း ဧက ၂၀ကျော်လောက်ရှိမယ်။ စပါးပင်တွေကို နုန်းမြေတွေဖုံးသွားတယ်။ ဒီအချိန် ဆိုတော့ ပြန်စိုက်လို့လည်း မလွယ်တော့ဘူး။ စပါးကျီတွေလည်း ရေတွေ ဝင်ပြီး ပျက်စီးသွားပြီ" လို့ ဒေသခံအမျိုးသမီးတဦးက ပြောပါတယ်။
ပူတာအိုခရိုင်ဟာ မိုးရာသီအတွင်း တလနီးပါး မိုးအဆက်မပြတ် ရွာသွန်းတက်တဲ့ ဒေသတခု ဖြစ်ပြီး စက်တင်ဘာ ၃ ရက်နေ့ကလည်း မိုးသည်းထန်စွာ ရွာသွန်းခဲ့တဲ့အတွက် ကဆန်ချောင်းကူး ကြိုးတံတား ပျက်စီးခဲ့ပါသေးတယ်။
