မြောက်ကိုရီးယားနိုင်ငံဆိုင်ရာ အမေရိကန်အထူးကိုယ်စားလှယ် ဆောင်ကင်မ်ဟာ  တောင်ကိုရီးယားရဲ့ နျူးကလီးယားအရေး ညှိနှိုင်းမှုအကြီးအကဲ ကင်မ်ဂန်းနဲ့ ဧပြီ ၆ ရက်က တွေ့ဆုံခဲ့ပါတယ်။

မြောက်ကိုရီးယားရဲ့ နျူးကလီးယားနဲ့ ဒုံးကျည်ခြိမ်းခြောက်မှုတွေကြားမှာ ဆောင်ကင်မ်ဟာ သူ့ရဲ့ တောင်ကိုရီးယားကိုယ်စားလှယ် ကင်မ်ဂန်နဲ့ ဂျပန်မိတ်ဘက် တာကီဟီရိုဇူနာကိုရှီတို့နဲ့ အစည်းအဝေးတွေကျင်းပဖို့ ၂ ရက်တာ ခရီးစဉ်အတွက် ဆိုးလ်ကို မနေ့က ရောက်ရှိလာခဲ့တာလို့ အမေရိကန်နိုင်ငံခြားရေးဌာန ထုတ်ပြန်ချက်မှာ ဖော်ပြပါတယ်။

ဆောင်ကင်မ်ဟာ ဂျပန်နဲ့ တောင်ကိုရီးယားတို့ရဲ့ ကာကွယ်ရေးဆိုင်ရာ အမေရိကန်ရဲ့ ကတိကဝတ်တွေကို ထပ်လောင်းပြောကြားမယ်လို့ မျှော်လင့်ကြောင်း နိုင်ငံခြားရေးဌာနက ပြောပါတယ်။

အမေရိကန်နဲ့ တောင်ကိုရီးယား တပ်ဖွဲ့တွေဟာ အမေရိကန် လေယာဉ်တင်သင်္ဘောနဲ့ B-1B နဲ့ B-52 ဗုံးကြဲလေယာဉ်တွေ ပါဝင်တဲ့ လေကြောင်းနဲ့ ရေကြောင်းလေ့ကျင့်မှု အပါအဝင် နှစ်စဉ် နွေဦးရာသီ လေ့ကျင့်ခန်းနဲ့ ၅ နှစ်အတွင်း သူတို့ရဲ့ ပထမဆုံး ကုန်းရေ ၂ သွယ် ဆင်းသက် လေ့ကျင့်မှုတွေကို လုပ်ဆောင်နေတာ ဖြစ်ပါတယ်။

ဒီလေ့ကျင့်မှုအပေါ် မြောက်ကိုရီးယားက ဒေါသတကြီး တုံ့ပြန်ခဲ့ပြီး သူတို့ကိုကျူးကျော်ဖို့ အစမ်းလေ့ကျင့်မှု လုပ်နေတာလို့ ခေါ်ဆိုခဲ့ပါတယ်။

မြောက်ကိုရီးယားဟာ လတ်တလော ရက်သတ္တပတ်တွေအတွင်း သူ့ရဲ့ စစ်ရေးလှုပ်ရှားမှုတွေကို အရှိန်မြှင့် လုပ်ဆောင်လာခဲ့ပြီး သစ်လွင်ပြီး ပိုသေးငယ်တဲ့ နျူးကလီးယား ထိပ်ဖူးအသစ်တွေကိုလည်း ထုတ်ပြလာပါတယ်။

ဒါ့အပြင် အမေရိကန်နဲ့ ဘယ်နေရာကိုမဆို ပစ်လွှတ်နိုင်တဲ့ တိုက်ချင်းပစ်ဒုံးကျည်ကို ပစ်ခတ်နေပြီး နျူးကလီးယားစွမ်းရည်ရှိတဲ့ ရေအောက်တိုက်ခိုက်ရေး ဒရုန်းကိုလည်း စမ်းသပ်ပြခဲ့ပါတယ်။

မြောက်ကိုရီးယားဟာ မတ်လ ၁၆ ရက် အစောပိုင်းက ပြုံယမ်းမြို့အနီးကနေ အရှေ့ဘက်ကို တိုက်ချင်းပစ်ဒုံးကျည် (ICBM) ၁ စင်း ပစ်လွှတ်ခဲ့တယ်လို့ ဂျပန်အစိုးရ ထိပ်တန်း ပြောရေးဆိုခွင့်ရှိသူက ပြောပါတယ်။

ဒီပစ်လွှတ်မှုဟာ နျူးကလီးယားလက်နက် ကိုင်ဆောင်ထားတဲ့ မြောက်ကိုရီးယားကို တန်ပြန်မယ့် နည်းလမ်းတွေကို ဆွေးနွေးဖို့ မျှော်လင့်ထားတဲ့ ထိပ်သီးဆွေးနွေးပွဲအတွက် တိုကျိုမြို့ကို လေယာဉ်ခရီး မစတင်ခင် နာရီပိုင်းလောက်မှာ လုပ်ဆောင်ခဲ့တာပါ။

“ဒီနေ့ကျင်းပတဲ့ ဂျပန်-တောင်ကိုရီးယား ထိပ်သီးအစည်းအဝေးမှာ မြောက်ကိုရီးယားရဲ့ ပြီးပြည့်စုံတဲ့ နျူးကလီးယားကင်းစင်ရေးကို ဦးတည်ပြီး တောင်ကိုရီးယားနဲ့ အမေရိကန်တို့ အနီးကပ် ပူးပေါင်းဆောင်ရွက်မှုကို အတည်ပြုသွားမှာဖြစ်ကြောင်း” ဂျပန်အစိုးရအဖွဲ့ အတွင်းဝန် ဟီရိုကာဇု မတ်ဆုနိုက သတင်းထောက်တွေကို ပြောပါတယ်။

ပြုံယမ်းက ရန်လိုတဲ့လုပ်ရပ်အဖြစ် ရှုတ်ချထားတဲ့ စစ်ရေးလေ့ကျင့်မှုကို တောင်ကိုရီးယားနဲ့ အမေရိကန်တို့ ပူးတွဲလုပ်ဆောင်နေတဲ့ကြားကပဲ မြောက်ကိုရီးယားဟာ အခုသီတင်းပတ်အတွင်း ဒုံးကျည်အများအပြား ပစ်လွှတ်နေတာ ဖြစ်ပါတယ်။

တောင်ကိုရီးယား နိုင်ငံခြားရေးဝန်ကြီးဌာနကလည်း မြောက်ကိုရီးယားရဲ့ တိုက်ချင်းပစ် ဒုံးကျည် (ICBM) ပစ်လွှတ်မှုကို မတ်လ ၁၆ ရက်က ရှုတ်ချလိုက်ပြီး ပြတ်ပြတ်သားသား တုံ့ပြန်ခဲ့ပါတယ်။

“ဒီနေ့ သမ္မတ ယွန်းဆွတ်ခ်ယိုး ဂျပန်နိုင်ငံကို မလာရောက်မီလေးမှာပဲ မြောက်ကိုရီးယားက တာဝေးပစ် ပဲ့ထိန်းဒုံးကျည်တစင်း ပစ်လွှတ်တာကို ကျနော်တို့အစိုးရက ပြင်းပြင်းထန်ထန် ရှုတ်ချပါတယ်” လို့ တောင်ကိုရီးယား နိုင်ငံခြားရေးဌာန ပြောရေးဆိုခွင့်ရှိသူ လင်းမ်ဆူဆွတ်ခ်က ပြောပါတယ်။

ဒီကနေ့ တာဝေးပစ် ပဲ့ထိန်းဒုံးကျည် အပါအဝင် မြောက်ကိုရီးယားရဲ့ မကြာသေးမီက ဆက်တိုက်ပစ်လွှတ်ခဲ့တဲ့ ဒုံးကျည်တွေဟာ လုံခြုံရေးကောင်စီရဲ့ ဆုံးဖြတ်ချက် အများအပြားကို ရှင်းရှင်းလင်းလင်း ချိုးဖောက်ခဲ့တာဖြစ်ကြောင်းနဲ့ ဒါဟာ ဒေသတွင်း တင်းမာမှုတွေ ပြင်းထန်လာစေတဲ့ အဓိက ရန်စမှုတခုလည်းဖြစ်ကြောင်း ပြောပါတယ်။

ခိုင်မာတဲ့ တောင်ကိုရီးယား-အမေရိကန် ပူးတွဲကာကွယ်ရေး ရပ်တည်ချက်ကို ထိန်းသိမ်းထားသမျှ တောင်ကိုရီးယားအစိုးရဟာ နိုင်ငံတကာ အသိုက်အဝန်းနဲ့ လက်တွဲလုပ်ဆောင်မှာဖြစ်ပြီး တရားမဝင် ရန်စမှုတွေကနေတဆင့် ဘာကိုမှ မရနိုင်ကြောင်းကို မြောက်ကိုရီးယားက သေချာ နားလည်သဘောပေါက်အောင် အခိုင်အမာ တုံ့ပြန်သွားမှာ ဖြစ်ကြောင်းလည်း တောင်ကိုရီးယား နိုင်ငံခြားရေးဌာန ပြောရေးဆိုခွင့်ရှိသူ လင်းမ်ဆူးဆွခ်က ပြောပါတယ်။