မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) စစ်ကြောင်း-၃၊ ချင်းတွင်းဒေသတပ်ရင်းမှာ တပ်တွင်းရိက္ခာဖူလုံရေးအတွက် အခုနှစ်နွေရာသီမှာ နွေစပါး ၂ ဧက စတင်စိုက်ပျိုးပါတယ်။
စိုက်ပျိုးထားတဲ့စပါးမှာ ရက် ၉၀ စပါးဖြစ်ပြီး ကုန်ကျစရိတ်အနေနဲ့ ၁ ဧက ၅ သိန်းဝန်းကျင် ရှိပါတယ်။ ပြည်သူတွေရဲ့ လှူဒါန်းကူညီမှုတွေအပြင် မိမိတို့တပ်ရင်း တပ်ဖွဲ့တွေရဲ့ လုပ်အားစိုက်ထုတ်မှုတွေနဲ့ တပ်ရိက္ခာဖူလုံရေးအတွက် စီစဥ်ဆောင်ရွက်ထားပါတယ်လို့ ABSDF (ချင်းတွင်းဒေသ) တာဝန်ရှိသူထံက သိရပါတယ်။
ABSDF စစ်ကြောင်း-၃ (ချင်းတွင်းဒေသ) တပ်ရင်းမှူး ရဲဘော်ဇေယျက “လက်ရှိအခြေအနေအရ တပ်တွင်းရိက္ခာက အဆင်ပြေတယ်။ ပြည်သူလူထုရဲ့ ထောက်ပံ့မှုတွေနဲ့ ရပ်တည်တာဖြစ်ပေမဲ့ အချိန်ကြာလာတာနဲ့အမျှ ပြည်သူတွေက ငွေကြေးဖောင်းပွတာတွေ၊ ကုန်စျေးနှုန်းကြီးမြင့်တာတွေ ကြုံလာနိုင်တယ်။ အဲ့ဒီအခက်ခဲကြုံလာရင် ပြည်သူတွေ ဝန်ထုပ်ဝန်ပိုးမဖြစ်အောင် တတ်နိုင်တဲ့ အတိုင်းအတာထဲကနေ ဆောင်ရွက်တာဖြစ်ပါတယ်” လို့ ဒီဗွီဘီကို ပြောပါတယ်။
ABSDF စစ်ကြောင်း-၃ အတွင်းရှိ တပ်ရင်းများက တခြားရိက္ခာတွေဖြစ်တဲ့ မြေပဲ၊ နေကြာနဲ့ သီးနှံမျိုးစုံကို စိုက်ပျိုးပြီး တပ်တွင်းရိက္ခာဖူလုံရေးအတွက် ဆောင်ရွက်နေတယ်လို့လည်း သိရပါတယ်။
စစ်တပ်အာဏာသိမ်းပြီးနောက်ပိုင်း ဧရာဝတီတိုင်းအတွင်းက တောင်သူလယ်သမားတွေကို နွေစပါး စိုက်ပျိုးဖို့အတွက် ၁၀ ဧကကို ဓာတ်မြေဩဇာ ၂ အိတ်နှုန်းနဲ့ စစ်ကောင်စီက ရောင်းချပေးနေတယ်လို့ သိရပါတယ်။
တောင်သူလယ်သမားတွေအနေနဲ့ နွေစပါးအတွက် စိုက်ပျိုးလယ် ၁၀ ဧကကို ဓာတ်မြေဩဇာ ၂ အိတ်နှုန်း ရရှိဖို့အတွက် ငွေ ကျပ် ၃၅၀၀၀ ကြိုသွင်းရသလို ၁၀ ဧကထက်ကျော်တဲ့ တောင်သူတွေကိုလည်း ၂ အိတ်နှုန်းသာ ရောင်းချပေးတယ်လို့ ဒေသခံတောင်သူလယ်သမားတွေက ပြောပါတယ်။
ငပုတောဒေသခံလယ်သမားတဦးက “အဲဒီနှစ်အိတ်ရဖို့ကို မြို့နယ်ရုံးမှာ ပိုက်ဆံအရင်သွင်းရတဲ့ မသွင်းတဲ့သူကတော့ မရဘူးပေါ့။ ရသလောက်လေးကို လုယူနေရတာ အပြင်မှာက ၃ ဆလောက် ဈေးကြီးတာကို လောက်မှာတော့ မဟုတ်ဘူး။ ဒါပေမဲ့ သူတို့ခေတ်ဆိုတော့ ဘာမှပြောခွင့်မရဘူးလေ”လို့ ပြောပါတယ်။
စစ်ကောင်စီက ထုတ်ပေးတဲ့ ပုလဲဓါတ်မြေဩဇာ ၁ အိတ်ကို ၃၅၀၀၀ နှုန်းနဲ့ ဝယ်ယူရပြီး မလောက်ငလို့ အပြင်က ပြန်လည်ဝယ်ယူရတဲ့အခါ ၁ အိတ်ကို ကျပ် ၉ သောင်းနှုန်းထိ ပေါက်ဈေးရှိနေတာကြောင့် လောက်ငအောင် ဝယ်မသုံးနိုင်တဲ့ လယ်သမားတွေလည်း ရှိတယ်လို့ ဆိုပါတယ်။
ဧရာဝတီတိုင်းက လယ်သမားတွေအနေနဲ့ စစ်ကောင်စီက ထုတ်ပေးတဲ့ ဓာတ်မြေဩဇာနဲ့ မလောက်ငသလို ဝယ်သုံးဖို့လည်း မတတ်နိုင်တာကြောင့် ထွက်နှုန်းကောင်းအောင်လုပ်ဖို့အတွက် အခက်အခဲတွေနဲ့ ရင်ဆိုင်နေရတယ်လို့ သိရပါတယ်။
