ယူကရိန်းနိုင်ငံသား ဒမစ်ထရို ကိုတော့ဗ်စကီးဟာ FIS အလွတ်ခုန် နှင်းလျှောစီး ကမ္ဘာ့ဖလားပြိုင်ပွဲမှာ အခက်အခဲဆုံး ပြကွက်တွေထဲက တစ်ခုကို လုပ်ဆောင်ပြသနိုင်ခဲ့တဲ့ အတွက် ကမ္ဘာ့ဖလားသမိုင်းတလျှောက် အမြင့်ဆုံး ရမှတ်နဲ့အတူ စံချိန်သစ်တင်နိုင်ခဲ့ပါတယ်။
အမေရိကန်နိုင်ငံ၊ ယူတားပြည်နယ်၊ ဒီးရားဗယ်လီ နှင်းလျှောစီးအပန်းဖြေစခန်းမှာ ကျင်းပတဲ့ ဒီကမ္ဘာ့ဖလားပြိုင်ပွဲမှာ ကိုတော့ဗ်စကီးက ကစားသမားဘ၀မှာ ပထမဆုံးအကြိမ် အနိုင်ရရှိခဲ့တာပါ။
အသက် ၂၁ အရွယ် ယူကရိန်းနှင်းလျှောစီး ကစားသမားဟာ သူရဲ့ တတိယအကြိမ်မြောက် FISကမ္ဘာ့ဖလား ပြိုင်ပွဲကို ဝင်ရောက်ယှဉ်ပြိုင်ခဲ့တာ ဖြစ်ပြီး "The Hurricane" လို့ သိထားကြတဲ့ အမြင့်ခုန်ပြကွက်ကို လုပ်ဆောင်ရင်း မြေပြင်ပေါ် အမှားအယွင်းမရှိ ဆင်းသက်နိုင်ခဲ့တာကြောင့် ပွဲစီစဉ်သူတွေက အများဆုံး ရရှိနိုင်တဲ့ ရမှတ် ၁၅၀ ထဲက သူ့ကို ၁၃၈.၃၂ မှတ်အထိ ပေးခဲ့တာကြောင့် အခုလို စံချိန်တင်နိုင်ခဲ့တာ ဖြစ်ပါတယ်။
ဒီပြိုင်ပွဲမှာ နိုင်ခဲ့တဲ့ အတွက် ကိုတော့ဗ်စကီးဟာ ကမ္ဘာ့အဆင့် ရပ်တည်ချက်မှာလည်း ၂၅၁ မှတ်နဲ့ ဒုတိယနေရာကို တက်လှမ်းလာနိုင်ခဲ့ပါတယ်။
ဖေဖော်ဝါရီ ၃ ရက်က ဖိုင်နယ်ပွဲစဉ်အထိ တက်ရောက်နိုင်ခြင်းမရှိတဲ့ ကမ္ဘာ့အဆင့်တစ်နေရာက ဆွစ်ဇာလန်နိုင်ငံသား နိုဝယ်ရော့တ်နဲ့ ၁၈ မှတ်သာ ကွာဟပါတော့တယ်။
FIS ကမ္ဘာ့ဖလား အမျိုးသမီးပြိုင်ပွဲမှာတော့ သြစတြေးလျနိုင်ငံသူ ဒန်နီရယ်လ် စကော့တ် က ကစားသမားဘ၀ အမြင့်ဆုံးရမှတ်ဖြစ်တဲ့ ၁၁၅.၂၀ မှတ်ရရှိကာ ဒီရာသီအတွက် ဒုတိယ မြောက် နိုင်ပွဲကို ရယူနိုင်ခဲ့ပါတယ်။
အခုလို အနိုင်ရရှိခဲ့တဲ့ စကော့တ်ဟာ ဒုတိယနေရာမှာ ၉၉.၉၇ မှတ်နဲ့ ရပ်တည်ခဲ့တဲ့ ကနေဒါနိုင်ငံသူ မယ်ရီယွန် သနော့တ် အထက် ၇ မှတ်အကွာက ဦးဆောင်နိုင်ခဲ့တာကြောင့် FIS ကမ္ဘာ့ဖလား ရွှေတံဆိပ်ဆုကို ထိုက်ထိုက်တန်တန် ရရှိခဲ့တာပါ။
အိုလံပစ်ရွှေတံဆိပ် ၃ ဆုရှင် သြစတြီးယားနိုင်ငံသား မက်သိုင်းရက်စ်မေယာဟာ နှင်းလျှောစီး အားကစားသမားဘဝကနေ အနားယူတော့မယ်လို့ ဒီဇင်ဘာ ၂၉ ရက်က အီတလီနိုင်ငံ၊ ဘော်မီယိုမြို့မှာ သတင်းထောက်တွေကို ပြောပါတယ်။
ဒီဆုံးဖြတ်ချက်ကို ရက်ပေါင်းများစွာ စဉ်းစားသုံးသပ်ပြီးမှ လုပ်ဆောင်ခဲ့ဖြစ်တယ်လို့ ဒီနှစ် ဘေဂျင်း ဆောင်းရာသီအားကစားပြိုင်ပွဲမှာ အောင်မြင်မှု ရရှိခဲ့တဲ့ အသက် ၃၂ နှစ်အရွယ် မက်သိုင်းရက်စ်က ပြောခဲ့တာပါ။
မက်သိုင်းရက်စ်ဟာပြီးခဲ့တဲ့နောက်ဆုံး ဆောင်းရာသီအားကစားပြိုင်ပွဲက စူပါဂျီနှင်းလျှောစီးပြိုင်ပွဲမှာ ရွှေတံဆိပ်ဆုရရှိခဲ့သလို တောင်ဆင်း နှင်းလျှောစီးပြိုင်ပွဲမှာလည်း ကြေးတံဆိပ်ဆုရယူနိုင်ခဲ့ပါတယ်။
၂၀၁၈ ခုနှစ်၊ တောင်ကိုရီးယား ဖြောင်ချန်းအိုလံပစ် ပြိုင်ပွဲတုန်းက စူပါဂျီနှင်းလျှောစီးပြိုင်ပွဲမှာ ရွှေတံဆိပ်ဆုရယူနိုင်ခဲ့တဲ့ မက်သိုင်းရက်စ်ဟာ ၂၀၁၄ ခုနှစ်၊ ရုရှားဆိုချီ အိုလံပစ်ပြိုင်ပွဲရဲ့ တောင်ဆင်းနှင်းလျှောစီးပြိုင်ပွဲမှာလည်း ရွှေတံဆိပ် ရယူနိုင်ခဲ့တာကြောင့် အိုလံပစ်ရွှေတံဆိပ်ဆု ၃ ဆုရှင် ဖြစ်လာခဲ့ပါတယ်။
ဒီ အိုလံပစ်ရွှေတံဆိပ်ဆုတွေအပြင် နှင်းလျှောစီး ကမ္ဘာ့ဖလားပြိုင်ပွဲတွေမှာလည်း အောင်မြင်မှု ၁၁ ကြိမ်အထိ ရရှိခဲ့သူဖြစ်ပါတယ်။
မက်သိုင်းရက်စ်က ဘော်မီယိုမြို့မှာ ကျင်းပမယ့် စူပါဂျီကမ္ဘာ့ဖလား နှင်းလျှောစီးပြိုင်ပွဲကိုလည်း ဝင်ရောက်ယှဉ်ပြိုင်တော့မှာ မဟုတ်ဘူးလို့ ပြီးခဲ့တဲ့ ကြာသပတေးနေ့နှောင်းပိုင်းက ဖြည့်စွက်ပြောကြားခဲ့ပါတယ်။
