မကွေးတိုင်း၊ ပခုက္ကူမြို့၊ ပခုက္ကူ မြို့ရှောင်လမ်းမှာ မတ်လ ၂၇ ရက်နေ့ မနက် ၂ နာရီဝန်းကျင်က ဆိုင်ကယ်နဲ့ ကင်းလှည့်စစ်ဆေးနေတဲ့ စစ်ကောင်စီတပ်သားတွေ မိုင်းဆွဲတိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။
ဆိုင်ကယ် ၃ စီးနဲ့ ကင်းလှည့်နေတဲ့ စစ်ကောင်စီတပ်သား ၆ ဦး မိုင်းဆွဲတိုက်ခိုက်ခံခဲ့ရတာဖြစ်ပြီး ထိခိုက်သေဆုံးမှု ရှိနိုင်တယ်လို့ ဒေသခံတဦးက ပြောပါတယ်။
“အသံကြားရတာတော့ ၂ လုံးက အကျယ်ကြီးပဲ၊ ကျန် ၃ လုံးကတော့ သိပ်မကျယ်ဘူး၊ အသံကအုံထွက်တာ။”
အဆိုပါ တိုက်ခိုက်မှုကို Southern YSO PDF နဲ့ Pakokku North PDF မဟာမိတ်နှစ်ဖွဲ့က ပြုလုပ်ခဲ့တာလို့ သိရပါတယ်။
ဒေသခံတဦးက “ကင်းလှည့်တဲ့စစ်သားတွေပါ။ ညတိုင်း သူတို့ ကင်းလှည့်ကြတယ်။ သေနတ်ပစ်ဖောက်တာတွေ၊ မူးရူးပြီး အော်ဟစ်ဆဲဆိုတာတွေ ရှောင်တခင်စစ်ဆေးတာတွေလည်း ရှိတယ်” လို့ ပြောပါတယ်။
စစ်ကောင်စီတပ်သားတွေဟာ မိုင်းဆွဲတိုက်ခိုက်ခံရပြီးနောက် မြို့ရှောင်လမ်းအနီးက ယောကျာ်းလေး၊ မိန်းကလေးအကုန် လိုက်စစ်နေတယ်လို့ သိရပါတယ်။
မြို့ရှောင်လမ်းမှာ နေ့စဉ်လိုလို ပတ်ကင်းလှည့်တဲ့ စစ်ကောင်စီတပ်သားတွေက သောက်စားမူးယစ်ပြီး သူတို့ စစ်ချင်တဲ့ နေအိမ်တွေကို ဝင်စစ်ကာ ပြည်သူတွေဆီကနေ တန်ဖိုးကြီးပစ္စည်းတွေ အတင်းယူဆောင်သွားကြသလို လူငယ်တွေကို ရိုက်နှက်ဖမ်းဆီးတာတွေ လည်း ရှိတယ်လို့ ဒေသခံတွေက ပြောပါတယ်။
ညမထွက်ရအမိန့်ထုတ်ပြန်ထားတဲ့ ပခုက္ကူမြို့မှာ အောက်တိုဘာ ၁၈ ရက် ည ၈ နာရီ မိနစ် ၂၀ လောက်က မြို့ရှောင်လမ်းက မြို့ဝင်ဂိတ်အနီး ဖြတ်သန်းသွားလာသူကို စစ်ကောင်စီတပ်က ပစ်ခတ်မှု ဖြစ်ခဲ့တယ်လို့ လမ်းဘေးအနီးဝန်းကျင် ဒေသခံတွေဆီက သိရပါတယ်။
ဂိတ်အနီး ဖြတ်သန်းသွားတဲ့ ဆိုင်ကယ်စီးသွားတဲ့ အမျိုးသားကို သေနတ်နဲ့ အချက်ပေါင်းများစွာ လိုက်လံပစ်ခတ်ခဲ့တာဖြစ်တယ်ပြီး သေနတ်ကျည်ဆန် ထိမှန်ခြင်းရှိမရှိတော့ မသိရသေးဘူးလို့ လမ်းအနီးဝန်းကျင် မျက်မြင်တွေ့သူတွေက ပြောပါတယ်။
ဒေသခံတစ်ဦးက “ည ၈ နာရီမထွက်ရဆိုတာကို ထွက်လာလို့ နေမှာပေါ့၊ အချက်က ပစ်တာက ၆ ချက်လောက် ရှိတယ် လိုက်ပစ်တာ။ ပစ်တာကတော့ ဆက်တိုက်လိုက်ပစ်တာ အတွဲလိုက်ပစ်တာ၊ မှန်တော့ မမှန်ဘူး ထင်တယ်။ ဆိုင်ကယ်သမားကတော့ အတင်းမောင်းပြီးတော့ မြို့ထဲဝင်လာတာပဲ။ ဟိုတနေ့ကလည်း အဲဒီဂိတ်မှာပဲ ဗုံး နှစ်ခါပေါက်သေးတယ်။ အဲဒါကြောင့် အစောင့်တွေ ပိုချထားပုံရတယ်။ ည ၈ နာရီကနေ မနက် ၄ နာရီအထိ အပြင်မထွက်ရအမိန့် ထုတ်ထားတာ အခုဟာက ၈ နာရီကျော်ပြီဆိုတော့ သူတို့က ပစ်တာထင်တယ်” လို့ ပြောပါတယ်။
ပခုက္ကူမြို့မှာ ည ၈ နာရီကနေ မနက် ၄ နာရီအထိ အပြင်မထွက်ရအမိန့် ထုတ်ထားတဲ့အပြင် မနက် ၁၀ နာရီကနေ ညနေ ၄ နာရီအထိ အပြင်မထွက်ရအမိန့် ထုတ်ထားတာဖြစ်ပါတယ်။
ပခုက္ကူမြို့ရဲ့ မြို့ဝင် ၄ နေရာကို စစ်ကောင်စီတပ်တွေက ဂိတ်တွေနေရာချထားပြီး ညနေ ၄ နာရီကျော်မှသာ မြို့ထဲ အဝင်ခံတာဖြစ်ပါတယ်။ တစ်ရက်နဲ့ တစ်ရက် တူညီမှုမရှိဘဲ တချို့ရက်တွေမှာ ညနေ ၅ နာရီမှသာ မြို့ထဲ အဝင်ခံတာဖြစ်တယ်လို့ ဒေသခံတွေဆီက သိရပါတယ်။
