မကွေးတိုင်း ပခုက္ကူမြို့၊ ပခုက္ကူအကျဉ်းထောင်မှာ အကျဉ်းသားတွေ အောက်တိုဘာ ၁၆ မနက်ကနေ ဒီနေ့အထိ အစာငတ်ခံဆန္ဒပြနေကြတယ်လို့ ထောင်နဲ့နီးစပ်သူတွေက ပြောပါတယ်။
အောက်တိုဘာ ၁၅ ရက်နေ့မှာ ပခုက္ကူအကျဥ်းထောင်ကနေ လွတ်မြောက်ရေးအတွက် ကြိုးစားခဲ့တဲ့ အကျဥ်းသားတွေကို တိုက်ပိတ်၊ ရိုက်နှက်၊ အစာမကျွေး၊ ရေမတိုက်ဘဲ ထားတာကြောင့် အကျဉ်သားအားလုံး အခုလို အစာငတ်ခံ ဆန္ဒပြနေကြတာလို့ သိရပါတယ်။
“တိုက်ပိတ်ခံရတဲ့ ၆ ဦးကို ထောင်အာဏာပိုင်တွေက ညှဉ်းပန်းနှိပ်စက်လို့ ဆန္ဒပြနေကြတယ်။ ကျနော်တို့ ထောင်ဝန်ထမ်းမိသားစုတွေဆီကနေ သိရတယ်ဗျ” ထောင်နဲ့နီးစပ်သူတဦးက ပြောပါတယ်။
အကျဉ်းသားတွေကို အနိုင်ကျင့်တဲ့ ထောင်ဝန်ထမ်းတွေကတော့ တပွင့်ဗိုလ်အဆင့်ရှိ ဘိုဘိုမျိုးလှိုင်၊ ဇော်မျိုးထိုက်၊ လွင်မိုးဦး၊ ဝင်းနိုင်နဲ့ တကြပ်ကြီးအဆင့်ရှိ ဂတ်စာရေးဆရာရွှေ၊ တကြပ် ဝေယံဦး၊ ဒုတပ်ကြပ် ထိန်လင်းနဲ့ မူဝါး၊ တပ်သားအဆင့်ရှိ ညီညီနိုင်စိုး၊ ဇင်မင်းထိုက်၊ ဟန်ဌေးဝင်း၊ ဖြိုးကျော်၊ နေလင်းနဲ့ ထက်ဖြိုးငြိမ်းတို့ ဖြစ်တယ်လို့ ဆိုပါတယ်။
ဒ့ါအပြင် ရိုက်နှက်တိုက်ပိတ်ခံထားရတဲ့ အကျဉ်းသား ၆ ဦးလုံးကို စစ်ကောင်စီက ဆေးဝါးကုသ မပေးတာကြောင့် အသက်အန္တရာယ်စိုးရိမ်ရတယ်လို့ သိရပါတယ်။
ပခုက္ကူအကျဉ်းထောင်အတွင်းမှာ အကျဉ်သား ၈၀၀ ကျော်တဲ့အနက် ၆၀၀ ကျော်က နိုင်ငံရေးအကျဉ်းသားတွေဖြစ်ပါတယ်။ အောက်တိုဘာ ၁၅ ရက်နေ့ကလည်း အကျဉ်းသားတွေကို ထောင်ပြောင်းရွှေ့တာတွေ လုပ်နေတယ်လို့ ဒေသခံတွေက ပြောပါတယ်။
မကွေးတိုင်း ပခုက္ကူခရိုင် အကျဥ်းထောင်မှာ ဖမ်းဆီးထိန်းသိမ်းခံထားရပြီး အမှုစစ်ဆေးနေဆဲ နိုင်ငံရေးအကျဥ်းသား ၅ ယောက် စက်တင်ဘာ ၁၀ ရက် မနက် ၆ နာရီလောက်က ထောက်ဖောက် ထွက်ပြေးလာတယ်လို့ ပခုက္ကူမြိုနယ်ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။
"သူတို့ အစီစဥ်နဲ့ သူတို့ ထောင်ဖောက်ပြီး ထွက်လာတယ်။ အပြင်ရောက်တော့မှ ကျနော်တို့ကို ချိတ်ဆက်လို့ မြို့နယ်ပကဖနဲ့အဖွဲ့တွေ ချိတ်ဆက်ပြီး လမ်းကြောင်းကူညီပေးခဲ့တာပါ။ အခုတော့ လွတ်မြောက်တဲ့နေရာ ရောက်နေပြီ။"
ထွက်ပြေးလွတ်မြောက်သွားတဲ့ နိုင်ငံရေးအကျဥ်းသား ၅ ယောက်ထဲမှာ တော်လှန်ရေးရဲဘော် နှစ်ယောက်ပါဝင်ပြီး နိုင်ငံရေးပုဒ်မတွေနဲ့ဖမ်းဆီးခံထားရသူ ၃ယောက် ပါဝင်တယ်လို့ သူက ပြောပါတယ်။
ပခုက္ကူခရိုင်အကျဥ်းထောင်ထဲကနေ အကျဥ်းသား ၅ ယောက် ထွက်ပြေးသွားပြီးနောက် အကျဥ်းထောင်ကို အကျဥ်းဦးစီးဌာန တာဝန်ရှိသူတွေ ရောက်လာပြီး အကျဥ်းသားတွေကို ကား လေးစီး နဲ့ ပခုက္ကူအခြေစိုက် တပ်မ ၁၀၁ ထဲ ခေါ်ဆောင်သွားခဲ့တယ်လို့ ပြောပါတယ်။
ပခုက္ကူမြို့နယ် ပြည်သူ့ကာကွယ်ရေးအဖွဲ့ (ပကဖ) နဲ့ ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့ PPDF၊ Young Force (UG) တပ်ဖွဲ့၊ ပခုက္ကူမြို့ပြပျောက်ကျားတပ်ဖွဲ့ (၂)၊ Pakokku Ranger၊ RSO (PKU) အဖွဲ့နဲ့ သက်ဆိုင်ရာနယ်မြေခံအဖွဲ့တွေ ပူးပေါင်းကာ နေရာအလိုက် တာဝန်ခွဲဝေပြီး ကယ်ထုတ်ပေးနိုင်ခဲ့တယ်လို့ ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့က စက်တင်ဘာ ၁၁ ရက်မှာ သတင်းထုတ်ပြန်ပါတယ်။
အကျဉ်းသားတွေ လွတ်မြောက်သွားတာနဲ့ ပတ်သက်လို့ စစ်ကောင်စီဘက်က သတင်းထုတ်ပြန်တာ မရှိသေးပါဘူး။
