မြောက်ကိုရီးယားက မတ် ၉ ရက်နေ့မှာ တာတိုပစ် ပဲ့ထိန်းဒုံးကျည်တစင်းကို ပင်လယ်ဝါထဲ ပစ်လွှတ်ခဲ့တယ်လို့ တောင်ကိုရီးယားစစ်တပ်က ပြောပါတယ်။
ဒုံးကျည်ကို မြောက်ကိုရီးယားနိုင်ငံ နမ်ပိုမြို့နားကနေ ညနေ ၆ နာရီ မိနစ် ၂၀ လောက်က ပစ်ခတ်ခဲ့တာလို့ ပူးတွဲစစ်ဦးစီးအရာရှိချုပ်က ကြေညာချက်ထုတ်ပြန် ပြောဆိုပါတယ်။
စမ်းသပ်ဆဲ ဒုံးကျည်တစင်းစင်းကို ပစ်ချခဲ့ရင် ဒါဟာ စစ်ကြေညာတာလို့ မှတ်ယူမယ့်အကြောင်း မြောက်ကိုရီးယားအစိုးရက ဒီအပတ်အစောပိုင်းမှာ ပြောခဲ့ပါတယ်။
အမေရိကန်နဲ့ တောင်ကိုရီးယား ပူးတွဲစစ်ရေးလေ့ကျင့်မှုကိုလည်း တင်းမာမှုတွေ ပိုတိုးလာစေတယ်လို့ မြောက်ကိုရီးယား အစိုးရမီဒီယာ KCNA က ကြေညာပါတယ်။
အမေရိကန်နဲ့ တောင်ကိုရီးယားတို့ဟာ မတ် ၁၃ ကနေ ၂၃ ရက်ထိ လွတ်လပ်ခြင်းဒိုင်းလို့ နာမည်ပေးထားတဲ့ အကြီးစားစစ်ရေးလေ့ကျင့်တာတွေ လုပ်ဖို့ စီစဉ်ထားပါတယ်။
အရင်စစ်ရေးလေ့ကျင့်မှုတွေကို မြောက်ကိုရီးယားက ဒုံးကျည်တွေပစ်လွှတ်တာ၊ နျူးကလီးယားနဲ့ ခြိမ်းခြောက်တာတွေလုပ်ရင်း ပြတ်ပြတ်သားသား တုံ့ပြန်ခဲ့ပါတယ်။
ကိုရီးယားကျွန်းဆွယ်မှာ အခြေအနေ ပိုတိုးတင်းမာလာချိန်အတွင်း ပင်လယ်ဝါထဲမှာ အမေရိကန် လေယာဉ်တင်သင်္ဘောက လေကြောင်းစွမ်းရည် ပြသနေပုံကို အမေရိကန် စစ်တပ်က မတ်လ ၁၅ ရက်မှာ ဖြန့်ချိလိုက်ပါတယ်။
USS Abraham Lincoln လေယာဉ်တင်သင်္ဘော ကုန်းပတ်ပေါ်ကနေ တိုက်လေယာဉ်တွေ ပျံတက်နေပုံနဲ့ လေထဲမှာတင် လောင်စာဆီ ဖြည့်နေပုံတွေကို ပြသခဲ့တာပါ။
ကိုရီးယားအခြေစိုက် အမေရိကန်တပ် USFK က အရာရှိတွေလည်း ဒုံးကျည်စနစ်တခုနဲ့အတူ စစ်ရေးလေ့ကျင့်နေပုံတွေကို ရိုက်ကူးထားပါတယ်။ဒီစစ်ရေးလေ့ကျင့်မှုအတွက် သီးခြား လွတ်လွတ်လပ်လပ် စစ်ဆေး အတည်ပြုနိုင်တာတော့ မရှိပါဘူး။
မြောက်ကိုရီးယားရဲ့ လတ်တလော ဒုံးကျည်ပစ်လွှတ် စမ်းသပ်ချက်ကို လက်တုံ့ပြန်တဲ့အနေနဲ့ အိုစန် လေတပ်အခြေစိုက်စခန်းမှာ လေကြောင်းရန်ကာကွယ်ရေး အမြောက်တပ်ခွဲက စွမ်းရည်ပြဖို့ ပိုတိုးလေ့ကျင့်နေတယ်လို့ USFK က ပြောပါတယ်။
မြောက်ကိုရီးယားဟာ မတ်လ ၁၆ ရက်မှာ အမျိုးအမည်မသိတဲ့ အရာတခုကို ပစ်ခတ် စမ်းသပ်ခဲ့ပါသေးတယ်။ ဒါပေမယ့် ပစ်ခတ်အပြီး ချက်ချင်းပဲ မအောင်မမြင် ဖြစ်ခဲ့ပုံ ပေါ်တယ်လို့ တောင်ကိုရီးယားစစ်တပ်က ပြောပါတယ်။
ဂျပန်မီဒီယာတွေကလည်း နျူကလီးယား လက်နက်ပိုင်ရှင် မြောက်ကိုရီးယားက ဒုံးကျည်လို့ သံသယရှိတဲ့ အရာတခု ပစ်လွှတ်ခဲ့ကြောင်း အစောပိုင်းက ဖော်ပြခဲ့ပါတယ်။
