ကိုရီးယားကျွန်းဆွယ်မှာ အခြေအနေ ပိုတိုးတင်းမာလာချိန်အတွင်း ပင်လယ်ဝါထဲမှာ အမေရိကန် လေယာဉ်တင်သင်္ဘောက လေကြောင်းစွမ်းရည် ပြသနေပုံကို အမေရိကန် စစ်တပ်က မတ်လ ၁၅ ရက်မှာ ဖြန့်ချိလိုက်ပါတယ်။
USS Abraham Lincoln လေယာဉ်တင်သင်္ဘော ကုန်းပတ်ပေါ်ကနေ တိုက်လေယာဉ်တွေ ပျံတက်နေပုံနဲ့ လေထဲမှာတင် လောင်စာဆီ ဖြည့်နေပုံတွေကို ပြသခဲ့တာပါ။
ကိုရီးယားအခြေစိုက် အမေရိကန်တပ် USFK က အရာရှိတွေလည်း ဒုံးကျည်စနစ်တခုနဲ့အတူ စစ်ရေးလေ့ကျင့်နေပုံတွေကို ရိုက်ကူးထားပါတယ်။ဒီစစ်ရေးလေ့ကျင့်မှုအတွက် သီးခြား လွတ်လွတ်လပ်လပ် စစ်ဆေး အတည်ပြုနိုင်တာတော့ မရှိပါဘူး။
မြောက်ကိုရီးယားရဲ့ လတ်တလော ဒုံးကျည်ပစ်လွှတ် စမ်းသပ်ချက်ကို လက်တုံ့ပြန်တဲ့အနေနဲ့ အိုစန် လေတပ်အခြေစိုက်စခန်းမှာ လေကြောင်းရန်ကာကွယ်ရေး အမြောက်တပ်ခွဲက စွမ်းရည်ပြဖို့ ပိုတိုးလေ့ကျင့်နေတယ်လို့ USFK က ပြောပါတယ်။
မြောက်ကိုရီးယားဟာ မတ်လ ၁၆ ရက်မှာ အမျိုးအမည်မသိတဲ့ အရာတခုကို ပစ်ခတ် စမ်းသပ်ခဲ့ပါသေးတယ်။ ဒါပေမယ့် ပစ်ခတ်အပြီး ချက်ချင်းပဲ မအောင်မမြင် ဖြစ်ခဲ့ပုံ ပေါ်တယ်လို့ တောင်ကိုရီးယားစစ်တပ်က ပြောပါတယ်။
ဂျပန်မီဒီယာတွေကလည်း နျူကလီးယား လက်နက်ပိုင်ရှင် မြောက်ကိုရီးယားက ဒုံးကျည်လို့ သံသယရှိတဲ့ အရာတခု ပစ်လွှတ်ခဲ့ကြောင်း အစောပိုင်းက ဖော်ပြခဲ့ပါတယ်။