ကနေဒါနိုင်ငံရဲ့ လူဦးရေအများဆုံးပြည်နယ် အွန်တဲရီယိုမှာ ပညာရေးလုပ်သား ၅ သောင်း ၅ ထောင်ကို ကိုယ်စားပြုတဲ့ သမဂ္ဂတစ်ခုဟာ နိုဝင်ဘာ ၄ ရက်က ဆန္ဒပြခဲ့ကြပါတယ်။
ကျောင်းတွေမှာ လစာပိုကောင်းဖို့နဲ့ လူတွေနဲ့တိုက်ရိုက်ဆက်ဆံရတဲ့ ရှေ့တန်းဝန်ထမ်းတွေကို ပိုခန့်ထားပေးဖို့ ပြည်နယ်အစိုးရနဲ့ သဘောတူညီမှု မရခဲ့တာကြောင့် ဆန္ဒပြခဲ့ကြတာပါ။
ပညာရေးလက်ထောက်တွေ၊ အတွင်းရေးမှူးတွေနဲ့ စာကြည့်တိုက်လုပ်သားတွေ ပါ၀င်တဲ့ အလုပ်သမားတွေရဲ့ ရုတ်တရက် သပိတ်မှောက်မှုကြောင့် နိုဝင်ဘာ ၄ ရက်မှာ ရာနဲ့ချီတဲ့ စာသင်ကျောင်းတွေကို ပိတ်လိုက်ရပါတယ်။
သပိတ်မှောက်မှုတွေ ဆက်ရှိနေချိန်မှာ ကျောင်းတွေအားလုံး ပိတ်ထားမှာဖြစ်ကြောင်း ကနေဒါနိုင်ငံရဲ့ ကြီးကြပ်မှုအောက်က အကြီးဆုံးတိုရွန်တိုခရိုင် ကျောင်းဘုတ်အဖွဲ့က ပြောကြားခဲ့ပါတယ်။
အလုပ်သမားတွေဟာ နိုဝင်ဘာ ၆ ရက်မှာ သပိတ်မှောက်ဖို့ သတိပေးချက် ထုတ်ပြန်ခဲ့ပါတယ်။
သပိတ်မှောက်မှာကို ကြိုတင်ခန့်မှန်းထားတဲ့ Ford အစိုးရကလည်း ကနေဒါပြည်သူ့ဝန်ထမ်းသမဂ္ဂ (CUPE) ကနေ ကိုယ်စားပြုတဲ့ အလုပ်သမားတွေကို စာချုပ်ချုပ်ဆိုဖို့ ဖိအားပေးတဲ့ အငြင်းပွားဖွယ်ဥပဒေတစ်ရပ်ကို အတည်ပြုခဲ့ပြီး သပိတ်မမှောက်အောင် တားဆီးထားပါတယ်။
Ford အစိုးရက အလုပ်သမားတွေရဲ့တောင်းဆိုမှုက မြင့်မားလွန်းပြီး COVID-19 ကပ်ရောဂါကြောင့် လူကိုယ်တိုင် ကျောင်းတက်ဖို့ ၂ နှစ်ကြာ နှောင့်နှေးခဲ့ရပြီးနောက်မှာ စာသင်ခန်းတွေကို ဖွင့်ထားဖို့ ဥပဒေ လိုအပ်ကြောင်း ငြင်းခုံစောဒက တက်ထားပါတယ်။
ကျောင်းသားတွေကို စာသင်ခန်းထဲမှာပဲ ရှိရမယ်ဆိုတဲ့ အက်ဥပဒေဟာ CUPE လုပ်သားတွေကို သပိတ်မှောက်ခြင်းပြစ်မှု ဖြစ်စေခဲ့ပြီး တဦးစီအတွက် ဒဏ်ငွေ ကနေဒါ ဒေါ်လာ ၄ ထောင်အထိ ဆောင်ရမယ်လို့ ဆိုပါတယ်။
သမဂ္ဂက လိုအပ်လာရင် တိုက်ဖျက်မယ် ဒါမှမဟုတ် ဒဏ်ကြေးဆောင်မယ် လို့ ပြောထားပါတယ်။ ဒါပေမယ့် နိုဝင်ဘာ ၄ ရက် မနက်ပိုင်းမှာ အလုပ်သမားတွေဟာ အွန်တဲရီယို ပညာရေးဝန်ကြီး Stephen Lecce ရဲ့ ရုံးအပြင်ဖက်နေရာ အပါအဝင် ပြည်နယ်အနှံ့ နေရာအများအပြားမှာ သပိတ်လှိုင်းတွေ စတင်ခဲ့ပါတယ်။
