အာဏာသိမ်း စစ်ကောင်စီက ကျင်းပမယ့် ရွေးကောက်ပွဲဟာ ရလဒ်ကောင်း ရရှိမှာ မဟုတ်သလို သွေးထွက်သံယိုမှုပိုများတဲ့ ပဋိပက္ခဆီ ဦးတည်နေတယ်လို့ မွန်ပြည်ပါတီက ဖေဖော်ဝါရီ ၅ ရက် ဒီနေ့ကျရောက်တဲ့ ၇၆ ကြိမ်မြောက် မွန်အမျိုးသားနေ့မှာ ထုတ်ပြန်လိုက်ပါတယ်။

အဲဒီထုတ်ပြန်ကြေညာချက်မှာတော့ မွန်ပြည်သစ်ပါတီဟာ စစ်ကောင်စီ ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို တက်ရောက်ဆွေးနွေးခဲ့ပေမယ့် စစ်ကောင်စီက ၂၀၀၈ ဖွဲ့စည်းပုံ အခြေခံဥပဒေကို ဆုပ်ကိုင်ထားတာကြောင့် မျှော်မှန်းထားတဲ့ တိုင်းရင်းသားလူမျိုးအခွင့်အရေးရဖို့ အလှမ်းဝေးနေဆဲဖြစ်တယ်လို့ ဖော်ပြပါတယ်။

လက်ရှိနိုင်ငံရေး အခင်းအကျင်းမှာ အဖွဲ့အစည်းသစ်တွေများစွာ ပေါ်ပေါက်လာတာကြောင့် အာဏာလက်ရှိကိုင်စွဲထားတဲ့သူတွေအနေနဲ့ တိုင်းရင်းသားလက်နက်ကိုင်အဖွဲ့အစည်းတွေကိုသာ ငြိမ်းချမ်းရေး ဖိတ်ခေါ်ဆွေးနွေးရုံနဲ့ လုံလောက်မှာ မဟုတ်ဘူးလို့ ဆိုပါတယ်။

တပြည်လုံးငြိမ်းချမ်းလိုတဲ့ စိတ်ဆန္ဒအမှန်တကယ်ရှိရင် ပါဝင်ပတ်သက်တဲ့ အဖွဲ့အစည်းသစ်တွေကိုလည်း စိတ်ရှည်စွာ ဖိတ်ခေါ်ဆွေးနွေးရမှာဖြစ်ပြီး အာဆီယံ ဘုံသဘောတူညီချက် ၅ ရပ်ကိုလည်း နှစ်ဖက်စလုံးမှ လိုက်နာလက်ခံ အကောင်အထည်ဖော်ဖို့ မွန်ပြည်သစ်ပါတီက တိုက်တွန်းထားပါတယ်။

မွန်ပြည်သစ်ပါတီအနေနဲ့ လက်ရှိဖြစ်ပေါ်နေတဲ့ နိုင်ငံရေးအပြောင်းအလဲကို မျက်ခြည်မပြတ် စောင့်ကြည့်သုံးသပ်ပြီး ကိုယ့်ကြမ္မာကိုယ်ဖန်တီးနိုင်ရေးကို ရှေးရှုဦးတည်လျက် နည်းလမ်းပေါင်းစုံနဲ့ ဆက်လက်တိုက်ပွဲဝင်သွားမယ်လို့ ထုတ်ပြန်ချက်မှာ ဖော်ပြထားပါတယ်။

မွန်လူထုတွေအနေနဲ့လည်း ရည်မှန်းချက်ပန်တိုင်း အမြန်ရောက်ရှိနိုင်ဖို့အတွက် ဘဝတူတိုင်းရင်းသားတွေ နဲ့ လက်တွဲချိတ်ဆက်ပြီး မိမိတို့ရဲ့ သမိုင်းပေးတာဝန်ကို ကျေပွန်အောင် တက်ညီလက်ညီကြိုးပမ်းထမ်းဆောင်ကြဖို့ တိုက်တွန်းထားပါတယ်။

မွန်ပြည်သစ်ပါတီဟာ NLD အစိုးရလက်ထက် ၂၀၁၈ ခုနှစ်မှာ တနိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် NCA မှာ လက်မှတ်ရေးထားသလို စစ်တပ် အာဏာသိမ်းပြီးနောက် စစ်ကောင်စီ ဖိတ်ခေါ်တဲ့ ငြိမ်းချမ်းရေး ဆွေးနွေးပွဲကို ၃ ကြိမ်တိုင် တက်ရောက်ဆွေးနွေးထားတဲ့ တိုင်းရင်းသားလက်နက်ကိုင်အဖွဲ့အစည်းတခု ဖြစ်ပါတယ်။

ဆိုးသွမ်းမှုတွေက ယူကရိန်းနိုင်ငံကို ဖျက်ဆီးနိုင်မှာ မဟုတ်ဘူးလို့ ယူကရိန်း သမ္မတ ဇလန်းစကီးက အော်သိုဒေါ့က်စ် အီစတာအခမ်းအနားအတွက် သတင်းစကားမှာ ထည့်သွင်းပြောဆို ကတိပြုလိုက်ပါတယ်။

မြို့တော် ကိယက်ဗ်က အနှစ်တထောင်ကျော် သက်တမ်းရှိပြီဖြစ်တဲ့ စိန့်ဆိုဖီယာ ခရစ်ယာန် ဘုရားကျောင်းမှာ ဖွင့်တဲ့ ရုပ်သံမိန့်ခွန်းအတွင်း သူက ခုလိုပြောလိုက်တာပါ။

အိမ်နီးချင်း ရုရှားနိုင်ငံက ဆောင်ကြဉ်းလာတဲ့ဖြစ်နေဆဲ ပဋိပက္ခ အမှောင်တိုက်ကနေ ယူကရိန်း နိုင်ငံဟာ ကျော်လွှားနိုင်လိမ့်မယ်လို့လည်း သူက ဆက်ပြောပါတယ်။ 

ရုရှားသမ္မတ  ပူတင်က အထူးစစ်ဆင်ရေးလို့ ကြေညာတဲ့ ရုရှား၀ရဲ့ ကျူးကျော်စစ် ၂ လ ပြည့်တဲ့နေ့လည်းဖြစ်တဲ့ တနင်္ဂနွေနေ့မှာ ယူကရိန်းနိုင်ငံတလွှား အီစတာပွဲတော်ကို အကျဉ်းချုံး ကျင်းပခဲ့တာပါ။ 

ခါတိုင်းက အီစတာဝတ်ပြုပွဲကို ညလုံးပေါက်နဲ့ တမနက်လုံး ခရစ်ယာန်ဘုရားကျောင်းတွေမှာ လူပြည့် တက်ရောက်ပေမယ့် ဒီနှစ်မှာတော့ ဒုံးကျည် နဲ့ တိုက်မယ့် ပစ်မှတ် ဖြစ်လာမှာ စိုးရိမ်လို့ လူတွေ ခရစ်ယာန် ဘုရားကျောင်းတွေမှာ မစုရုံးကြဖို့ ပြောထားပါတယ်။

စစ်ပွဲအတွင်း ကလေး ၂၁၃ ယောက်ထက် မနည်းသေဆုံးခဲ့ပြီး နိုင်ငံတောင်ပိုင်း အိုဒက်ဆာမြို့ မှာ ဧပြီ ၂၃ ရက်က ပစ်ခတ်မှုအတွင်း ၃လသား ကလေးတယောက် သေဆုံးတယ်လို့ ဒေသန္တရ အရာရှိတွေက ပြောထားပါတယ်။

ရုရှားကတော့ အရပ်သားတွေကို ပစ်မှတ်ထားတယ်ဆိုတဲ့ စွဲချက်ကို ထပ်ခါတလဲ ငြင်းထားပါတယ်။