ဗုဒ္ဓဂါယာဘုရားဖူးနဲ့ ပြည်ပကို MOU စနစ်နဲ့ သွားရောက်လုပ်ကိုင်မယ့်သူတွေကို သီးခြားအစီအစဥ်ဖြစ်တဲ့ Green Channel နဲ့ နိုင်ငံကူးလက်မှတ်ထုတ်ပေးနေတာကို ဒီနေ့ ဇန်နဝါရီ ၁၇ ရက်ကစပြီး ထပ်မံရပ်ဆိုင်းလိုက်တယ်လို့ သိရပါတယ်။
Green Channel နဲ့ နိုင်ငံကူးလက်မှတ် လျှောက်ထားခွင့်ရထားတဲ့ ကုမ္ပဏီတချို့ဟာ ငွေကြေးရယူပြီး လုပ်ကိုင်နေတာတွေကြောင့် ပြဿနာတွေဖြစ်ပေါ်ပြီး အခုလို ရပ်ဆိုင်းလိုက်တာလို့ မြန်မာနိုင်ငံကူးလက်မှတ် ထုတ်ပေးရေးအဖွဲ့နဲ့ နီးစပ်သူတဦးက ဆိုပါတယ်။
“လူတယောက်ကို သိန်း ၂၀ လောက်ယူပြီး လုပ်ပေးနေတာတွေ သတင်းပေါက်ကြားပြီး ပြဿနာတွေ ဖြစ်ကြတယ်ကြားတယ်။ အဲဒါနဲ့ အကုန်ပိတ်ခိုင်းလိုက်တာလို့ သိရတယ်။”
အဲဒီလိုလုပ်ဆောင်နေတဲ့ ကုမ္ပဏီ ၁၄၃ ခုကို မြန်မာနိုင်ငံကူးလက်မှတ်ထုတ်ပေးရေးအဖွဲ့က Black List စာရင်းသွင်းထားပြီး အဲဒီထဲမှာ ပြည်အလုပ်အကိုင်အေဂျင်စီ ၁၃၃ ခုအထိ ပါဝင်နေတယ်လို့ စစ်ကောင်စီလက်အောက်ခံ အလုပ်သမားဝန်ကြီးဌာနက မြန်မာပြည်ပအလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ် (MOEAF) ထံ ဇန်နဝါရီ ၁၂ ရက်က အကြောင်းကြားထားတဲ့စာမှာ ဖော်ပြထားပါတယ်။
အဲဒီအေဂျင်စီတွေကို နိုင်ငံကူးလက်မှတ်လျှောက်ထားမှု အစီအစဥ်မှာ မပါဝင်အောင် စိစစ်ဖို့ကိုလည်း ညွှန်ကြားခဲ့ပါတယ်။
MOEAF ရဲ့ မနေ့ကထုတ်ပြန်တဲ့စာမှာတော့ Black List သွင်းခံရတဲ့ ကုမ္ပဏီတွေတင်မကဘဲ Green Channal နဲ့ နိုင်ငံကူးလက်မှတ် လျှောက်ထားမှုအားလုံး ဇန်နဝါရီ ၁၇ ရက်ကစပြီး ရပ်ဆိုင်းကြောင်း ဖော်ပြထားပါတယ်။
အဲဒီလို ရပ်ဆိုင်းလိုက်တာကြောင့် ပြည်ပကိုသွားရောက်ဖို့ နိုင်ငံကူးလက်မှတ် မရှိသူတွေ၊ သက်တမ်းတိုးရမယ့်သူတွေအတွက် အခက်အခဲတွေ ရှိလာနိုင်တယ်လို့ အလုပ်သမားတဦးက ဆိုပါတယ်။
“သက်တမ်းတိုးမရဘဲ ပြည်ပထွက်ဖို့က မဖြစ်နိုင်ဘူး။ ဘယ်တော့ပြန်ဖွင့်ပေးမယ် ဆိုတာလည်း မသိရတော့ တော်တော်အခက်ဖြစ်ရတယ်။”
စစ်ကောင်စီဟာ ဒီဇင်ဘာလဆန်းက နိုင်ငံကူးလက်မှတ်လုပ်ဖို့ QR ကုတ်နဲ့ ရက်ချိန်းယူရတဲ့ အစီအစဥ်ကို ရပ်ဆိုင်းလိုက်ပြီး အဲဒီလကုန်ပိုင်းမှာပဲ ရက်ချိန်းယူထားပြီးသူတွေကို နိုင်ငံကူးလက်မှတ် ဆက်ထုတ်ပေးနေတာကိုပါ ရပ်ဆိုင်းလိုက်ပါတယ်။
အဲဒီနောက် Green Channel နဲ့ နိုင်ငံကူးလက်မှတ်တွေ ဆက်လုပ်ပေးနေခဲ့ပြီး တလမပြည့်ခင်မှာတင် အဲဒီအစီအစဥ်ကိုပါ ရပ်ဆိုင်းလိုက်တာလည်း ဖြစ်ပါတယ်။
နိုင်ငံကူးလက်မှတ် ပတ်စ်ပို့စာအုပ်လုပ်ဖို့ အွန်လိုင်းကနေဘွတ်ကင်တင်ပြီး ရက်ချိန်း QR code ယူရတဲ့စနစ်ဟောင်းကို ဒီဇင်ဘာ ၅ ရက်မှစပြီး ရပ်ဆိုင်းကြောင်း မြန်မာနိုင်ငံကူးလက်မှတ်ထုတ်ပေးရေးရုံး(ရန်ကုန်)က ဒီဇင်ဘာ ၄ ရက်က ကြေညာထားပါတယ်။
အွန်လိုင်းကဘွတ်ကင်တင်ပြီး ရက်ချိန်း QR code ယူတဲ့ စနစ်က အဆင်မပြေမှုများစွာရှိနေပြီး ပွဲစားတွေရဲ့ တရားမဝင်ဈေးကွက်ကြောင့် ပိတ်စ်ပို့စာအုပ်လုပ်ဖို့ ရက်ချိန်း QR code တစ်ခုကို မြန်မာငွေ ကျပ် ၃၀၀၀၀ မှ တစ်သိန်းထိ ပေးနေရကြောင်း ပတ်စ်ပို့စာအုပ်လုပ်ဖို့ ကြိုးပမ်းနေတဲ့ လူငယ်တစ်ဦးက ပြောပါတယ်။
"စာအုပ်လုပ်ဖို့ ကိုယ့်ဘာသာကိုယ် QR code ယူတော့လည်း အနည်းဆုံး သုံး၊လေးလကြာမှ ရက်ချိန်းက ရတယ်၊ ဒါတောင် မိုးလင်းကတည်းက ဝက်ဆိုဒ်ကို ထိုင်ဖွင့်နေရတာ မလွယ်ပါဘူး။ ပွဲစားတွေတော့ QR code ရောင်းတာရှိတယ်။ ရက်နီးရင် တစ်သိန်းလောက်တောင်းတယ်၊ နှစ်လ ၊ သုံးလလောက်ဝေးရင်တော့ သုံးသောင်းလောက်ပဲ ပေးရတယ်။”
စနစ်ဟောင်းနဲ့ ဘွတ်ကင်တင်ထားသူတွေကို ယူထားတဲ့ ရက်ချိန်းအတိုင်း ဆက်လက်ပြီး လုပ်ဆောင်ပေးမှာ ဖြစ်ပြီး ၂၄ နာရီ ၇ ရက်တပတ်လုံး ကာယကံရှင်ကိုယ်တိုင် လွယ်ကူစွာလျှောက်ထားနိုင်မယ့် အွန်လိုင်းဘိုကင်စနစ်သစ်ကို ပြင်ဆင်ရေးဆွဲနေတယ်လို့ နိုင်ငံကူးလက်မှတ်ထုတ်ပေးရေးအဖွဲ့ရဲ့ ဝက်ဆိုဒ်မှာ ကြေညာထားပါတယ်။
"ဘယ်လိုစနစ်ထပ်ပြောင်းဦးမလဲ မသိပေမဲ့ ပွဲစားတွေရဲ့ မှောင်ခိုဈေးကွက်ရှိနေသရွေ့ကတော့ ကျနော်တို့လို ကိုယ်တိုင်လုပ်ရမယ့်လူတွေအတွက်ကတော့ ခက်ခဲနေဦးမှာပဲ၊ စနစ်သစ်ဆိုတာကို စောင့်ပြီးမှပဲ ထပ်ကြိုးစားတော့မယ်" လို့ ပတ်စ်ပို့လုပ်ဖို့ကြိုးပမ်းနေတဲ လူငယ်က ဆက်ပြောပါတယ်။
၂၀၂၂ မတ်လ ၂၁ ရက်မှာ စတင်ကျင့်သုံးခဲ့တဲ့ အွန်လိုင်းမှ ဘွတ်ကင်တင်ပြီး စာအုပ်လုပ်ဖို့ ရက်ချိန်းယူရတဲ့ စနစ်ကို ကျင့်သုံးပြီး ကိုးလအကြာမှာ အခုလိုဖျက်သိမ်းလိုက်တာဖြစ်ပြီး စနစ်သစ်တစ်ခုပြင်ဆင်ရေးဆွဲနေကြောင်း ကြေညာထားတာ ဖြစ်ပါတယ်။
