အာဖဂန်နစ္စတန်နိုင်ငံက တာလီဘန်တွေက ကဘူးလ်မြို့တော် အရှေ့မြောက်ဘက်က ပန်ရှီယာ တောင်ကြားမှာ တပ်စွဲထားတဲ့ အတိုက်အခံတပ်တွေအပေါ် အောင်ပွဲခံခဲ့ပြီးပြီလို့ စက်တင်ဘာ ၆ ရက်မှာ အခိုင်အမာ ပြောလိုက်ပါတယ်။

အာဖဂန် တနိုင်ငံလုံးအပေါ် သိမ်းပိုက်မှု ပြီးစီးပြီဖြစ်လို့ အစိုးရသစ် မကြာခင် ဖွဲ့တော့မယ်လို့လည်း ကတိပြုလိုက်ပါတယ်။

ပန်ရှီယာ ခေါင်းဆောင် အာမဒ်မာဆွဒ် ဦးစီးတဲ့ အာဖဂန်အမျိုးသားခုခံရေးတပ်ဦးနဲ့ ရက်ချီ တိုက်ပွဲဝင်အပြီး တာလီဘန်တွေဟာ ပန်ရှီယာ ပြည်နယ်အုပ်ချုပ်ရေးမှူးရုံး ပရဝဏ်ရဲ့ ဝင်ပေါက်ရှေ့မှာ ရပ်နေတဲ့ပုံတွေကို လူမှုကွန်ရက်မီဒီယာတွေပေါ်မှာ အစောပိုင်းက တွေ့ရတာပါ။

ပန်ရှီယာ ဒေသခံတွေဟာ ပတ်ရှ်တွန် တိုင်းရင်းသားအများစု ပါဝင်တဲ့ တာလီဘန်တွေနဲ့ မျိုးနွယ်စုချင်း ခြားနားနေပြီး ၁၉၉၆-၂၀၀၁ တာလီဘန်အစိုးရ အုပ်ချုပ်ချိန်က တိုက်ခိုက်ခဲ့ဖူးပါတယ်။

တာလီဘန်တွေကတော့ သူတို့က ပန်ရှီယာ ဒေသခံတွေကို ခွဲခြားဖိနှိပ်တာမျိုးလုပ်မှာ မဟုတ်ဘူးလို့ အာမခံ ပြောဆိုထားပါတယ်။

ထွက်ပြေးတဲ့ အရပ်သားတွေ အိမ်တွေဆီ ပြန်လာကြဖို့ကိုလည်း တာလီဘန်ခေါင်းဆောင် မူလာ ဟိဒါယတ် အူလာဘာဒါက တိုက်တွန်းထားပါတယ်။

ဒါပေမဲ့ အာဖဂန်အစိုးရစစ်တပ်ထဲက အကြွင်းအကျန်တပ်တွေနဲ့ ဒေသခံ ပြည်သူ့စစ်တွေကို ဦးဆောင်နေတဲ့ မာဆွတ်ကတော့ အရှုံးမပေးဘဲ ဆက်ပြီး အာခံနေဆဲဖြစ်ပြီး သူ ဘယ်ရောက်နေတယ်ဆိုတာ မသိရဘဲ ဘေးကင်းတယ်လို့သာ ပြောထားပါတယ်။

မာဆွဒ်နဲ့ အာဖဂန် ဒုသမ္မတဟောင်း အမ်ရူလာဆာလေးတို့ဟာ အိမ်နီးချင်း တာဂျစ်ကစ္စတန် နိုင်ငံထဲကို ထွက်ပြေးလွတ်မြောက်သွားပြီလို့ သိထားကြောင်း တာလီဘန် ပြောခွင့်ရက ဆိုပါတယ်။

အာဖဂန်နစ္စတန်နိုင်ငံမြောက်ပိုင်းမှာ တာလီဘန်တွေကို တိုက်နေတဲ့ တပ်တွေက ပန်ရှီယာ တောင်ကြားနားက ခရိုင် ၃ ခုကို ပြန်သိမ်းနိုင်ပြီလို့ ရိုက်တာသတင်းဌာနက သြဂုတ် ၂၁ ရက်မှာ ဖော်ပြပါတယ်။

ဒီတောင်ကြားမှာ အစိုးရစစ်တပ် အကြွင်းအကျန်တွေနဲ့ တခြား ပြည်သူ့စစ်အုပ်စုတွေ စုရုံး တည်ရှိနေတာပါ။

သူတို့ ဘယ်ခရိုင်တွေကို သိမ်းပြီးပြီဆိုတာကို တိုက်ခိုက်ရေးသမားတွေက အတိအကျ မပြောပေမဲ့ သူတို့က ပန်ရှီယာ တောင်ကြားနားက အန်ဒါရပ်ဘ်ခရိုင်မှာ ဒေသခံတွေနဲ့ စကားပြောနေတဲ့ ရုပ်သံကိုတော့ လူမှုကွန်ရက် မီဒီယာပေါ်မှာ တွေ့ရပါတယ်။

ကိုယ့်နိုင်ငံကို ကာကွယ်ဖို့ နဲ့ တာလီဘန်တွေကို အရှုံးမပေးဖို့ တိုက်ခိုက်ရေးသမားတွေက ရွာသားတွေကို အားပေးနေတာ တွေ့ရပါတယ်။

အာဖဂန်ကာကွယ်ရေးဝန်ကြီး ဗိုလ်ချုပ်ကြီး ဘစ်မီလာမိုဟမ်မာဒီကတော့ တာလီဘန်တွေကို ခုခံဖို့ ကတိပြုထားပြီး ဘာဂ်လန်ပြည်နယ် ဒါဆာလေး၊ ဘာနိုနဲ့ ပါလ်ဟေဆာ ခရိုင်တွေကနေ မြောက်ပိုင်း ပန်ရှီယာပြည်နယ်ထိ နယ်မြေတွေကို သိမ်းယူပြီးပြီ လို့ တွစ်တာ လူမှုကွန်ရက်ပေါ်မှာ ပြောပါတယ်။

တာလီဘန်တွေဟာ သီတင်းပတ် တပတ်အတွင်း အာဖဂန်ရဲ့ အဓိက မြို့တွေ အားလုံးကို သိမ်းပိုက်ခဲ့တာပါ။

ဘယ်တပ်တွေက တာလီဘန်တွေဆီက နယ်မြေတွေကို ပြန်သိမ်းခဲ့တယ်ဆိုတာ ချက်ချင်း ရှင်းရှင်းလင်းလင်း မသိရသေးပေမဲ့ တိုက်ပွဲတွေကတော့ တာလီဘန်တွေကို ဆန့်ကျင်သူတွေ ပြန့်ကျဲ တည်ရှိနေတာကို ညွှန်ပြနေတယ်လို့ ရိုက်တာသတင်းဌာနက သုံးသပ်ထားပါတယ်။