စစ်ကိုင်းတိုင်း ပုလဲမြို့နယ်ထဲက ပန်းရွာကို စစ်ကောင်စီတပ်ဖွဲ့ဝင်တွေ ဝင်ရောက်မီးရှို့ ဖျက်ဆီးခဲ့တာကြောင့် နေအိမ် ၁၇၄ အိမ် မီးလောင်ပျက်စီးသွားတယ်လို့ ဒေသခံတွေက ပြောပါတယ်။

စစ်ကောင်စီတပ်သား အင်အား ၈၀ လောက်ဟာ ဇန်နဝါရီ ၃၁ ရက် ညက မွေ့တုံရွာကို မီးရှို့ပြီး ပန်းရွာဘက်ကို စစ်ကြောင်းထိုးလာတဲ့ သတင်းကြိုရတာကြောင့် ရွာထဲရှိ လူအကုန် မနက်အစောပိုင်းထဲက ဘေးကင်းရာကို ရှောင်နေကြတာပါ။ 

ဖေဖော်ဝါရီလ ၁ ရက် မနက် ၁ နာရီခွဲလောက်မှာ ပန်းရွာအလယ်ပိုင်းလောက်ကနေ စတင်မီးရှို့တာလို့ ဒေသခံတဦးက ပြောပါတယ်။

“မနက် ၇ နာရီလောက်မှာ ရွာသူ ရွာသားတွေကပဲ မီးငြှိမ်းသတ်ခဲ့ရတယ်” လို့ ပန်းရွာရဲ့ လုံခြုံရေး တာဝန်ခံက ပြောပါတယ်။ 

ပန်းရွာကို မီးရှို့ခဲ့တဲ့ စစ်ကောင်စီတပ်သားတွေဟာ ရွာအနောက်ဘက်နေကြာခင်းထဲမှာ ညအိပ်ပြီး မနက် ၅ နာရီ လောက်မှာ တနယ်ရွာဘက်ကို  ဦးတည်သွားတယ်လို့ ဆိုပါတယ်။

စစ်ကောင်စီတပ်သားတွေ မီးရှို့ခဲ့လို့ ပန်းရွာက လူနေအိမ် ၁၇၄ လုံး မီးလောင်ကျွမ်းသွားတဲ့အပြင် အိမ်မှာမွေးထားတဲ့ ကျွဲ၊ နွား၊ တိရစ္ဆာန်တွေပါ သေဆုံးခဲ့ရတယ်လို့ သိရပါတယ်။

မီးရှို့ဖျက်ဆီးခံလိုက်ရတဲ့ ပန်းရွာဟာ အိမ်ခြေပေါင်း ၈၅၀ ကျော်ရှိပြီး ဒေသခံ ၁၅၀၀ ကျော် အိုးမဲ့ အိမ်မဲ့ဖြစ်ပြီး အကူအညီများ လိုအပ်နေတယ်လို့ သိရပါတယ်။

ဇန်နဝါရီ ၃၁ ရက် ည ၈ နာရီလောက်က စစ်ကောင်စီတပ်က မွေ့တုံကျေးရွာကို မီးရှို့ဖျက်ဆီးခဲ့တာကြောင့် နေအိမ် ၂၀၀ ကျော် ဆုံးရှုံးခဲ့တယ်လို့ သိရပါတယ်။

စစ်ကိုင်းတိုင်း ပုလဲမြို့နယ် ပန်းရွာမှာ စက်တင်ဘာ ၁၅ ရက်က စစ်ကောင်စီတပ်တွေ  ရွာထဲ ဝင်လာပြီးနောက် ရွာသား ၄၀ ဝန်းကျင်ကို ဖမ်းဆီးကာ နေအိမ်တွေက ဖုန်းနဲ့ဆိုင်ကယ် ၈ စီးကို သိမ်းယူခဲ့တယ်လို့ ဒေသခံတွေက ပြောပါတယ်။ 

"မနက် ၈ နာရီလောက် ရွာထဲ ဝင်လာတာ။ ရွာကလူတွေလည်း ရုတ်တရက်ဆိုတော့ ပြေးဖို့က မမီတော့ဘူး။ သူတို့က အိမ်တွေမှာ ဖျက်ဆီးပြီးမွှေနေတာ။ ည ၇ နာရီလောက်ကျတော့ စစ်ကားနှစ်စီးနဲ့ ရွာထဲကို အင်အားထပ်တိုးရောက်လာတယ်။ တရွာလုံးလည်း ပြေးနေကြပြီ" လို့ ဒေသခံတစ်ဦးက ပြောပါတယ်။ 

ရွာထဲဝင်လာတဲ့ စစ်ကောင်စီတပ်တွေဟာ ရွာသားတွေကို ဖမ်းဆီးပြီး CDM လုပ်တဲ့ ဆေးမှူးကိုလည်း နေအိမ်မှာ ဝင်ရောက်ရှာဖွေ ဖမ်ဆီးခဲ့တယ်လို့ ဆိုပါတယ်။

ဖမ်းဆီးခံထားရတဲ့ ပြည်သူတွေထဲမှာ စစ်တပ်က စစ်သားရဲ့အဖေပါတာကြောင့် စစ်သားက ဖုန်းဆက်ပြောတဲ့အခါ ပြန်လွှတ်ပေးလိုက်တယ်လို့ ဆိုပါတယ်။ 

"ရွာထဲကအိမ်တွေကို ဝင်ရှာဖွေဖျက်ဆီးတယ်။ စျေးဆိုင်တွေထဲက ပစ္စည်းတွေလည်း ယူတယ်။ ခုက အားလုံးက ရွာကို ပစ်ပြီးပြေးနေရတာဆိုတော့ အိမ် ဘယ်လောက် ဖျက်ဆီးခံထားရလဲဆို​တာ အတိအကျ မသိဘူး" လို့ ဒေသခံတစ်ဦးက ပြောပါတယ်။ 

ရွာထဲကို စစ်အုပ်စုက ဝင်လာတာကြောင့် ထွက်ပြေးရတဲ့သူတွေထဲမှာ မကျန်းမာတဲ့သူတွေ၊ အသက်ရွယ်ကြီးရင့်သူနဲ့အောက်ဆီဂျင်အသုံးပြုနေရသူတွေပါတာ​ကြောင့် ထွက်ပြေးတိမ်းရှောင်ရ တာ အခက်ခဲဖြစ်နေတယ်လို့သိရပါတယ်။ 

စစ်အုပ်စုက ဘာမှမပြောဘဲ ပန်းရွာထဲဝင်လာပြီး ရှာဖွေတာတွေ လုပ်ဆောင်တဲ့အပြင် ရွာထဲ က ဝက်တွေကိုလည်း ချက်စားနေတယ်လို့ သိရပါတယ်။