မန္တလေးတိုင်းဒေသကြီး စဉ့်ကိုင်မြို့နယ် ပလိပ်အင်း မှာ  နှစ်စဉ်ဝင်ရောက်ကျက်စားလေ့ရှိတဲ့ ဆောင်းခိုငှက်တွေကို ထိန်းသိမ်းစောင့်ရှောက်သူ မရှိတဲ့အတွက် အဆိပ်ချ၊ ဖမ်းဆီးသတ်ဖြတ်သူ တွေ များပြားနေတယ်လို့ ဒေသခံတွေဆီက သိရပါတယ်။ 

အရင်နှစ်တွေက ငှက်ချစ်သူတွေ လာရောက်ထိန်းသိမ်းစောင့်ရှောက်တာကြောင့် ဆောင်းခိုငှက်တွေအား သတ်ဖြတ်တာကို တားမြစ်ပိတ်ပင်နိုင်ခဲ့ပေမယ့် ဒီနှစ်မှ်တော့ စောင့်ရှောက်ပေးသူ မရှိဖြစ်နေတယ်လို့ ဆိုပါတယ်။

စောင့်ရှောက်မှုနည်းတာကြောင့် ငှက်မုဆိုးတွေက ငှက်ထောင်ဖမ်းဆီးတာတွေအပြင် အဆိပ်ချ ဖမ်းဆီးတာတွေ ပြုလုပ်နေကြတယ်လို့ ဒေသခံတစ်ဦးက ပြောပါတယ်။

“ခါတိုင်းကျတော့ ငှက်ချစ်သူများအသင်းက စောင့်ရှောက်တာပေါ့။ အင်းမှာက အရင်က တရားဥပဒေနည်းနည်းစိုးမိုးတာပေါ့။ အခုကျတော့ စားဝတ်နေရေး ကျပ်တည်းတဲ့သူတွေ ငှက်မုဆိုးတွေရှိတာပေါ့။ စားဝတ်နေရေးကြောင့် ခါတိုင်းမလုပ်ပေမယ့် အခုလည်း ထုတာတွေ လုပ်တာတွေရှိတယ်။ ဆေးချတာတွေလည်းရှိနေတယ်။”

ပလိပ်အင်း စိုက်ခင်းတွေထဲမှာ ဆောင်းခိုငှက် သေတွေကို တောင်သူတွေ တွေ့ရှိနေရပြီး လက်ရှိအချိန်မှာ ငှက်တွေကို ဆေးချဖမ်းသူတွေအား ဖမ်းဆီးအရေးယူရေး တိုင်တန်းဖို့ မဖြစ်နိုင်တဲ့ အခြေအနေဖြစ်နေတယ်လို့ ဆိုကြပါတယ်။

“ငှက်က လိုက်ပစ်တဲ့သူမတွေ့ဘူး၊ ဒါပေမယ့် ငှက်တွေကတော့ သေနေတာတွေပဲတွေ့တယ်။ သေနေတယ်ဆိုတာက သူတို့ ငှက်သားတွေ ဘာတွေစားနေတာ၊ ငှက်တွေက ကျနော်တို့အင်းထဲမှာကျတဲ့ ငှက်တွေပေါ့လေ။” လို့ ဒေသခံက ပြောပါတယ်။

ဆောင်းခိုငှက်တွေဟာ ယခင်က တောင်သမန်အင်း၊ ပလိပ်အင်းနဲ့ ဗနောအင်းတွေမှာ အတွေ့ရများပြားပြီး အင်းရေ ရရှိမှု လျော့နည်းသွားတာနဲ့ အဆိပ်ချဖမ်းဆီးတာတွေကြောင့် တစ်နှစ်ထက်တစ်နှစ် ဝင်ရောက်မှု လျော့နည်းလာတယ်လို့ သိရပါတယ်။ 

ဆောင်းခိုငှက် မျိုးစိပ်ပေါင်း ၁၈၀ ကျော်ရှိပြီး ဆေးချတာ၊ ဖမ်းဆီးသတ်ဖြတ်တာတွေ ပြုလုပ်တဲ့ သူတွေကို ဇီဝမျိုးစုံမျိုးကွဲဥပဒေနဲ့ အရေးယူနိုင်ပြီး အမြင့်ဆုံးပြစ်ဒဏ် ထောင် ၁၀ နှစ်အထိ ချမှတ်နိုင်တယ်လို့ ဇီဝမျိုးစုံမျိုးကွဲ ဥပဒေမှာပါရှိပါတယ်။

ဆောင်းခိုငှက်တွေကို ဖမ်းဆီးသတ်ဖြတ်နေတာဟာ ဇီဝမျိုးစုံမျိုးကွဲ ဥပဒေကိုကျူးလွန်ရုံသာမက ပတ်ဝန်းကျင် ဂေဟစနစ်ကိုပါ ထိခိုက်လာနိုင်တဲ့အတွက် ထိန်းသိမ်းစောင့်ရှောက်သင့်တယ်လို့ မြန်မာငှက်ချစ်သူတွေက ဆိုပါတယ်။

မန္တလေးတိုင်း၊ စဉ့်ကိုင်မြို့နယ်၊ ပလိပ်အင်းမှာ  နှစ်စဉ်ဝင်ရောက်ကျက်စားလေ့ရှိတဲ့ ဆောင်းခိုငှက်တွေ ဒီနှစ်မှာ အရင်နှစ်တွေကထက် စောပြီး ဝင်လာကြတယ်လို့ ပုလိပ်အင်းအနီး နေထိုင်သူတွေက ပြောပါတယ်။

အခုလို စောပြီး ဝင်ရောက်လာပေမဲ့ နှစ်တိုင်းလို အကောင်ရေမများဘဲ အကောင်ရေ နည်းပါးပြီး အုပ်လိုက် ဝင်ရောက်မှု နည်းနေတယ်လို့ ဒေသခံတွေဆီက သိရပါတယ်။

နှစ်စဉ်နှစ်တိုင်းမှာ မတ်လနဲ့ ဧပြီလပိုင်းလောက်မှ ငှက်တွေ ဝင်လေ့ရှိပေမယ့်လည်း ဒီနှစ်မှာတော့ နိုဝင်ဘာလကုန်လောက်ကတည်းက ဝင်ရောက်နေတာဖြစ်တယ်လို့ ဒေသခံတွေကဆိုပါတယ်။

အင်းအနီးနေထိုင်သူတစ်ဦးက “ပျံသန်းနေတာတွေတော့ များတယ်။ ဒါပေမဲ့ နားတာ၊ အင်းထဲဝင်တာ နည်းတာ။ ခါတိုင်းဆိုရင် ဒီလိုနေရာတွေဆိုရင် ပြုံခဲနေတာပဲ။ အခု ဆောင်းကုန်ကို တစ်လလောက်တောင်စောကျတာ။ တန်ဆောင်မုန်းလလောက်ကတည်းက လာနေတာ ငှက်တွေက။ ငှက်တွေက ပေါတယ်”လို့ ပြောပါတယ်။

အရင်နှစ်တွေက ငှက်ထိန်းသိမ်းစောင့်ရှောက်သူတွေက လာရောက် စောင့်ရှောက်မှုတွေရှိ ခဲ့ပေမယ့် ဒီနှစ်မှာတော့ စောင့်ရှောက်သူ မရှိဘူးလို့ သိရပါတယ်။

နှစ်တိုင်းမှာ အခင်းတွေထဲက ခြောက်ထုတ်နေရတဲ့အနေအထားဖြစ်ပြီး ဒီနှစ်မှာတော့ အဲ့လောက်ထိ အကောင်ရေမများသေးဘူးလို့ သိရပါတယ်။ 

အင်း ရေကျချိန်မှာ အင်းအတွင်းက ငါး၊ ပုဇွန်စတဲ့ အစာရေစာနဲ့ အခင်းထဲက အစာတွေကို စားသုံးကြတဲ့အတွက် ရေကျချိန်မှသာ လာရောက်မှုများလေ့ရှိတယ်လို့သိရပါတယ်။

ပလိပ်အင်းအတွင်း ဒီနှစ်မှာ ရေဝင်ရောက်မှုနည်းပါးတာကြောင့် ဆောင်းခိုငှက်တွေရဲ့ ကျက်စားမှု ပုံစံပြောင်းလဲလာတယ်လို့ မြန်မာ့ငှက်နဲ့သဘာ၀ ထိန်းသိမ်းရေးအသင်းက သိရပါတယ်။