လီဂူးဝမ်းချန်ပီယံ ပါရစ်စိန့်ဂျာမိန်း (ပီအက်စ်ဂျီ) အသင်းဟာ လက်ရှိအိမ်ကွင်း ပါ့ပ်ဒီပရန့်စ်ကနေ ပြောင်းရွှေ့နိုင်ဖို့ ပြင်သစ်နိုင်ငံရဲ့ အကြီးဆုံး အားကစားကွင်း စတက်ဒီဖရန့်စ်ကို ဝယ်ယူဖို့ ကမ်းလှမ်းသွားမယ်လို့ မတ် ၁၀ ရက်က ပြောကြားပါတယ်။
ပါရီမြို့တော်ဝန် အန်နီ ဒယ်လ်ဂိုက ပါ့ပ်ဒီပရန့်စ် ကွင်းဟာ ရောင်းဖို့ မဟုတ်ဘူးလို့ ပြောထားတာကြောင့် ပီအက်စ်ဂျီအသင်းအနေနဲ့ "တခြားရွေးချယ်စရာ" တွေကို ရှာဖွေသွားမယ်လို့ ဇန်နဝါရီက တုံ့ပြန်ပြောဆိုခဲ့ပါတယ်။
စကတ်ဒီဖရန့်စ်ကွင်းကြီးဟာ ၁၉၉၈ ခုနှစ် ကမ္ဘာ့ဖလားဖိုင်နယ်ပွဲစဉ် အပါအဝင် ချန်ပီယံလိဂ် ဖိုင်နယ်ပွဲစဉ် တွေကိုပါ ၂၀၀၀ ခုနှစ်ကတည်းက လက်ခံကျင်းပလာခဲ့တာဖြစ်ပြီး မနှစ်က လီဗာပူးအသင်းကို အနိုင်ယူခဲ့တဲ့ ရီးရဲလ်အသင်းရဲ့ ဖိုင်နယ်ပွဲစဉ်လည်း ပါဝင်ပါတယ်။
ဒီအားကစားကွင်းကြီးဟာ လူပေါင်း ၈ သောင်း ဝန်းကျင် ၀င်ဆံ့နိုင်ပါတယ်။ ပီအက်စ်ဂျီအသင်း ပြောရေးဆိုခွင့်ရှိသူတဦးက ကလပ်အသင်းအနေနဲ့ စတက်ဒီဖရန့်စ် ကွင်းကြီးကိုဝယ်ယူဖို့ ကမ်းလှမ်းသွားမှာဖြစ်ပေမယ့် လက်ရှိ အိမ်ကွင်း ပါ့ပ် ဒီ ပရန့်စ်ကို ပြန်လည်ပြင်ဆင်နိုင်မယ့် ရွေးချယ်မှုအပေါ်မှာလည်း သဘောကျကြောင်း ရိုက်တာသတင်းဌာနကို ပြောပါတယ်။
ပါရီမြို့တော်ကောင်စီက ပိုင်ဆိုင်ထားတဲ့ ပါ့ပ်ဒီပရန့်စ်ကွင်းဟာ ၁၉၇၄ ခုနှစ်မှာ ပြင်သစ် ထိပ်တန်းလိဂ်ကို ပီအက်စ်ဂျီအသင်း ဝင်ရောက်လာနိုင်ချိန်ကတည်းက အိမ်ကွင်းအဖြစ် အသုံးပြုနေခဲ့တာ ဖြစ်ပါတယ်။
၂၀၁၃ ခုနှစ်မှာတော့ ပီအက်စ်ဂျီအသင်းနဲ့ ပဲရစ်မြို့တော်ကောင်စီကြားက အငှားစာချုပ်ကို ၂၀၄၃ ခုနှစ် မတိုင်ခင်အထိ သက်တမ်းတိုးဖို့ သဘောတူညီခဲ့ကြပြီး ၃ နှစ်တာကာလအတွင်း အိမ်ကွင်း အဆင့်မြှင့်တင်မှုအတွက် အမေရိကန်ဒေါ်လာ သန်း ၈၀ နီးပါး အသုံးပြုမှာ ဖြစ်ပါတယ်။
ပီအက်စ်ဂျီအသင်းဘက်ကတော့ ပါ့ပ်ဒီပရန့်စ်ကွင်း ပြုပြင်မွမ်းမံရေးအတွက် နောက်ထပ်ယူရိုငွေ သန်း ၅၀၀ အသုံးပြုဖို့ ရည်မှန်းထားပေမယ့် ဒီအိမ်ကွင်းကို အသင်းအနေနဲ့ ပိုင်ဆိုင်ခွင့်ရမှသာ လုပ်ဆောင်သွားမယ်လို့ ကြေညာခဲ့ပါတယ်။
တတိယမြောက် ရွေးချယ်စရာကတော့ ပီအက်စ်ဂျီအသင်းရဲ့ အိမ်ကွင်းအသစ်တစ်ခုကို ပဲရစ် မြို့ပြင်မှာ တည်ဆောက်ဖို့ ဖြစ်တယ်ဆိုပြီး ပြောရေးဆိုခွင့်ရှိသူက ဆိုပါတယ်။
၂၀၁၁ ခုနှစ်မှာ ပီအက်စ်ဂျီအသင်းကို ကာတာအားကစားရင်းနှီးမြှုပ်နှံမှုအဖွဲ့က ဝယ်ယူခဲ့ပြီး နောက်ပိုင်း ပြင်သစ်နိုင်ငံရဲ့ အအောင်အမြင်ဆုံး ကလပ်အသင်းတစ်ခု ဖြစ်လာခဲ့ပြီး ၁၁ နှစ်တာကာလအတွင်း ပြည်တွင်းလိဂ်မှာ ၈ကြိမ်အထိ အောင်မြင်မှု ရရှိထားပါတယ်။
ပြင်သစ်နိုင်ငံရဲ့ အခြားပြည်တွင်းဖလား ပြိုင်ပွဲတွေမှာလည်း ပီအက်စ်ဂျီအသင်းက အောင်မြင်မှု ရရှိခဲ့ပေမယ့် ချန်ပီယံလိဂ်ဆုဖလားကိုတော့ လက်ရှိအချိန်ထိ ရယူနိုင်ခြင်းမရှိသေးသလို ဒီနှစ်မှာ လည်း ချန်ပီယံလိဂ် ၁၆သင်းအဆင့်ကနေ ထွက်ခွာခဲ့ရပါတယ်။
အာဂျင်တီးနားတိုက်စစ်မှူး မက်ဆီဟာ ပီအက်စ်ဂျီအသင်းနဲ့ စာချုပ်သက်တမ်းတိုးဖို့ သဘောတူညီမှု ရသွားပါတယ်။
မက်ဆီနဲ့ ပီအက်စ်ဂျီအသင်းတို့ရဲ့ လက်ရှိစာချုပ်သက်တမ်းက အခုနှစ်ရာသီ အကုန်မှာ ကုန်ဆုံးမှာပါ။
ကမ္ဘာ့ဖလားပြိုင်ပွဲအပြီးမှာတော့ စာချုပ်သက်တမ်းတိုးဖို့ မက်ဆီဘက်က ခေါင်းညိတ်ခဲ့ပြီး နောက်ထပ်တစ်နှစ်သက်တမ်းတိုးခွင်လည်း ပါဝင်တယ်လို့ သိရပါတယ်။
ဒါကြောင့် မက်ဆီဟာ ၂၀၂၅ ခုနှစ်အထိ ပီအက်စ်ဂျီမှာ ဆက်ရှိနိုင်ပါတယ်။ ဘာစီလိုနာဘက်က မက်ဆီကို ပြန်ခေါ်မယ်လို့ သတင်းထွက်ခဲ့ပေမယ့် ကမ်းလှမ်းမူတော့မရှိခဲ့ဘူးလို့ မီဒီယာတွေက ဖော်ပြခဲ့ကြပါတယ်။
မက်ဆီဘက်ကလည်း ပဲရစ်မှာအဆင်ပြေနေတာကြောင့် ဘာစီလိုနာကိုပြန်သွားဖို့ စိတ်ကူး မရှိတော့ကြောင်း စပိန်ဂျာနယ်လစ် ဂီလင်ဘာလာဂေ့ချ်က ဘီဘီစီအားကစားအစီအစဉ်နဲ့ အင်တာဗျူးမှာ ပြောခဲ့ပါတယ်။
