အသက် ၅၆ နှစ်ရှိပြီဖြစ်တဲ့ ဂျပန်တိုက်စစ်မှူး မီယူယာဟာ ပေါ်တူဂီဒုတိယတန်းကလပ် အိုလေဗီရန်စီ အသင်းဆီ ပြောင်းရွှေ့ကစားမှာဖြစ်ပါတယ်။
ဂျေလိဂ်ကလပ် ယိုကိုဟားမားအသင်းကနေ အငှားစာချုပ်နဲ့ ပြောင်းရွှေ့ခဲ့တာပါ။ ကမ္ဘာ့အသက်အကြီးဆုံးဘောလုံးသမားအဖြစ် စံချိန်တင်ထားတဲ့ ကာဇူယိုရှီ မီယူယာဟာ မနှစ်က ဂျပန်စတုတ္ထတန်းကလပ် ဆူဇူကာပွိုင့်ဂတ်တာစ် အသင်းမှာ အငှားထွက်ကစားခဲ့ပြီး စုစုပေါင်း ၁၈ ပွဲမှာ ၂ ဂိုးသွင်းခဲ့ပါတယ်။
တခါမှမကစားဖူးသေးတဲ့ လိဂ်ပြိုင်ပွဲအသစ်ဖြစ်ပေမယ့် အကောင်းဆုံးခြေစွမ်းထုတ်ပြနိုင်အောင် ကြိုးပမ်းသွားမယ်လို့ စာချုပ်ချုပ်ဆိုအပြီးမှာ မီယူယာကပြောပါတယ်။
သူဟာ ၁၉၈၆ ခုနှစ်ကတည်းက ဘရာဇီးကလပ်ဆန်းတို့စ်အသင်းမှာ ကစားသမားဘ၀ စတင်ခဲ့ပြီး အီတလီ၊ ခရိုအေးရှားနဲ့ သြစတြေးလျနိုင်ငံတွေကလိဂ်ပြိုင်ပွဲတွေမှာလည်း သွားရောက်ကစားခဲ့ ပါသေးတယ်။
ဂျပန်လက်ရွေးစင်ဟောင်းဖြစ်ပြီး စုစုပေါင်း ၈၉ ပွဲမှာ ၅၅ ဂိုးသွင်းခဲ့ပါတယ်။ အသက် ၆၀ အထိ ဘောလုံးဆက်ကစားဖို့ ရည်မှန်းထားကြောင်း မီယူယာက ပြောထားပါတယ်။
မန်ယူအသင်းနဲ့ စာချုပ်ဖျက်သိမ်းခဲ့တဲ့ စီရော်နယ်ဒိုဟာ အသင်းဟောင်း စပို့တင်းလစ္စဘွန်းဆီ ပြောင်းရွှေ့ဖို့ နီးစပ်နေပါတယ်။
အသက် ၃၇ နှစ်ရှိ ပေါ်တူဂီတိုက်စစ်မှူးဟာ လက်ရှိအချိန်မှာ ကလပ်အသင်းလက်မဲ့ဖြစ်သွားပြီး ဘယ်အသင်းကိုမဆို အလွတ်ပြောင်းရွှေ့ကြေးနဲ့ ပြောင်းရွှေ့ ခွင့်ရှိပါတယ်။
ရော်နယ်ဒိုအနေနဲ့ ကမ္ဘာ့ဖလားအပြီးမှာ ဘယ်အသင်းကို ပြောင်းရွှေ့မလားဆိုတာ ယတိပြတ်ဆုံးဖြတ်ဖို့ ရှိပါတယ်။
လက်တလော သတင်းတွေအရတော့ အသင်းဟောင်း စပို့တင်းဆီကို ပြောင်းရွှေ့ဖို့ ရေပန်းအစားဆုံး ဖြစ်နေတာပါ။
ဒါ့အပြင် ယူနိုက်တက်ရဲ့ ပြိုင်ဘက် ချဲလ်ဆီးအသင်း၊ အမေရိကန်မေဂျာလိဂ်ကလပ်တွေနဲ့ ဘိုင်ယန်မြူးနစ်အသင်းတွေက ရော်နယ်ဒိုကို ခေါ်ယူဖို့ ကြိုးပမ်းလာနိုင်ပါတယ်။
ရော်နယ်ဒိုကတော့ အင်တာဗျူးက ပြောစကားတွေကြောင့် စာချုပ်ဖျက်သိမ်းခဲ့ရပေမယ့် စိန်ခေါ်မှုအသစ်တွေ ရှာဖွေဖို့ အကောင်းဆုံးအချိန်ဖြစ်ကြောင်း ပြောခဲ့ပါတယ်။
